2
Ɨshi nahaamula mu mwoyo gwanɨ huje saga nahayɨnza huliimwɨ,
mugandi azugumiziwe amooyo geenyu nantele.
2 Ɨnjanjile ɨsho,
pɨpo nkashele nabhabhomba amwɨ huje mubhe nʉ zugumizu,
weenu wa‑agambɨɨha anɨ huje ɨmbe nʉ luseshelo?
Mwɨnzaga‑asagale mwɨmwɨ lwene mwɨ‑ɨmbazugumiziizye amooyo geenyu!
3 Sha shɨɨsho nahabhasimbiiye mu kalaata ɨla ɨyɨnjɨ huje,
nkashele ɨnɨnze huliimwɨ ɨngandi avwalazwe ʉmwoyo gwanɨ na bhantu ɨbho bhahali bhakhondɨɨye hunsesye.
Ɨmɨɨnye hu lyoli huje anɨ nkashele ɨmbe nʉ luseshelo,
namwɨ mwenti munza‑abhe nʉ luseshelo.
4 Nahabhasimbiiye ɨkalaata ɨla hu zugumizu ʉgoosi na mayɨmba na mansozi.
Ɨnsɨɨbho zyanɨ saga huje nahali ɨhwanza hubhavwalazye mu mooyo geenyu,
lyoli nahali ɨhwanza mumanye ɨsho ɨmbagɨɨne tee.
Ʉkhobhoshelo hwa mʼmomba mbiibhi
5 Ɨshi,
ʉmuntu ʉyo abhasonziizye ʉzugumizu abhamwabho,
saga anzugumiziizye anɨ lwene,
lyoli abhazugumiziizye amwɨ mwenti.
Leelo ɨshi saga ɨsʉngwa abhɨɨshe ɨlyo abhe mayɨmba tee.
6 Ʉlufundo ʉlwo alwajile ʉmuntu ʉyo afume huliimwɨ mwenti,
luhunʼkwɨla.
7 Ɨshi mukhondɨɨye hunʼkhobhoshele na hunʼjinjizye ʉmwoyo ʉmuntu ʉyo,
huje agandi azugumile tee afishe afwe ʉmwoyo.
8 Ɨhubhalaabha mubhe mulolesya huje munʼgɨɨne.
9 Ɨnsɨɨbho yaanɨ ɨya hubhasimbile ɨkalaata ɨla,
yahali ya‑amanye nkashele muhunʉmvwa anɨ mu gonti.
10 Nkashele muhunʼkhobhoshela ʉmuntu,
nanɨ ɨmbala‑abhe ɨnʼkhobhoshɨɨye.
Nkashele galɨɨho ga gakhondɨɨye ahunʼkhobhoshele,
ɨhunʼkhobhoshela pitagaalila lya Kilisiti hu nongwa yeenyu,
11 huje ʉSeetanoa asahasheele hutimene,
pɨpo timɨɨnye ɨnsɨɨbho zyakwe.
ɄPaulo hwi‑ibooma ɨlyɨ Tolowa
12 Ɨshi,
lwa naafiha hwi‑ibooma ɨlyɨ Tolowa alʉmbɨɨlɨle ɨNongwa ɨNyinza ɨzya Kilisiti,
ʉMwɨnɨ ahanigulila ʉlwiji ʉgwa‑abhombe ɨmbombo yaakwe huula.
13 Leelo saga nahali nʉ tengaanu mu mwoyo gwanɨ,
hu nongwa ya‑aje saga nahanʼnolile huula ʉmwoziwa ʉwamwetu ʉTiito.
Ɨpo nahalagana na bhantu abha mwi‑ibooma liila,
na‑asogole abhale hu mukowa ʉgwɨ Makedoniya.
Amene hwi‑ikhone lya Kilisiti
14 Leelo ɨhunʼsalifya ʉNgʉlʉbhɨ,
hu nongwa ya‑aje tipatihɨɨnywe nʉ Kilisiti ʉyo ahutilongozya hubhamene abhalʉgʉ hu habhaazyo honti.
Nantele ahutibhomba atɨ huje tinyampaanye ʉmanyiihanyi ʉwɨ nongwa zya Kilisiti ɨmbali zyonti,
nanshi ʉnunsi ʉwinza sha wunyampaana hwonti.
15 Ɨnjanjile ɨsho,
pɨpo atɨ tili nanshi ʉnunsi ʉwinza ʉwa Kilisiti pitagaalila lya Ngʉlʉbhɨ,
ʉnunsi ʉwo wuhubhafishila abhantu bhonti,
ɨbho bhafyʉlwa nɨ‑ɨbho saga bhafyʉlwa.
16 Hwɨ‑ɨbho bhafyʉlwa,
ʉnunsi ʉwo winza,
wuhubhapeela ʉwʉʉmi.
Leelo hwɨ‑ɨbho saga bhafyʉlwa,
ʉnunsi ʉwo bhiibhi,
wuhubhapeela ʉfwe.
Ɨshi,
weenu ʉyo akhondɨɨye abhombe ɨmbombo ɨnɨ ɨya‑anyampaanye ɨnongwa ɨzya Kilisiti?
17 Atɨ saga tili nanshi abhantu abhinji ɨbho bhabhɨɨshɨle izwi lya Ngʉlʉbhɨ nanshi ahantu aha‑akazye.
Lyoli mwi‑ikhone lya Kilisiti,
tinyampaanya izwi lya Ngʉlʉbhɨ hu mwoyo ʉmwinza pitagaalila lya Ngʉlʉbhɨ nanshi ɨsho ahatisonteleziizye.