Ɨkalaata ɨya bhɨɨlɨ ɨya nʼsontwa ʉPaulo hwa
Bhakolinto
ɄPaulo ahubhalamuha aBhakolinto
1
Ɨkalaata ɨnɨ ɨfumile huliinɨ anɨ nɨPaulo,
nɨnʼsontwa wa Yeesu ʉKilisitia nanshi ʉNgʉlʉbhɨ sha‑ahwanza.
Anɨ nʉ mwoziwa ʉwamwetu ʉTiimoti tihubhalamuha amwɨ mwa muli mpʉga ya bhooziwa mwi‑ibooma ɨlyɨ Kolinto,
peeka na bhooziwa bhonti ɨbho bhali mu mukowa ʉgwɨ Akaaya.
2 Ɨmpyana nʉ tengaanu afume hwa Ngʉlʉbhɨ,
ʉDaada weetu,
na hwa Mwɨnɨ weetu ʉYeesu ʉKilisiti,
vibhanje peeka naamwɨ.
Ʉjinjizyo wa Ngʉlʉbhɨ mu mayɨmba
3 Amwamihwaje ʉNgʉlʉbhɨ,
ʉDaada ʉwa Mwɨnɨ weetu ʉYeesu ʉKilisiti,
ʉDaada ʉwɨ nkʉmbʉ,
nantele yʉ Ngʉlʉbhɨ ʉyo ahutijinjizya amooyo hu gonti.
4 Ʉmwene ahutijinjizya amooyo mu mayɨmba geetu gonti,
huje natɨ tibhajinjizye bhaala bha bhali mu mayɨmba agɨ waaji wuwinji wuwinji.
Tihubhajinjizya nanshi ɨsho ʉNgʉlʉbhɨ ahutijinjizya atɨ.
5 Sha shɨɨsho ʉKilisiti sha‑ahayɨmbɨle tee,
natɨ tiyɨmba,
ɨpo ʉNgʉlʉbhɨ ajendeelela atijinjizye amooyo ashilile hwa Kilisiti.
6 Hwope nkashele tiyɨmba,
tiyɨmba hu nongwa yɨ jinjizyo nʉ fyʉli weenyu.
Nantele,
hu habhaazyo ɨho atɨ tijinjiziwa amooyo,
ɨpo namwɨ muhwambɨɨlɨla ʉjinjizyo ʉwo wuhubhabhomba huje mujimbiilile mu mayɨmba ɨgo natɨ tiyɨmba.
7 Ʉlusʉʉbhɨlo lwetu huliimwɨ lugoosi,
pɨpo timɨɨnye ɨsho muyɨmba nanshi atɨ,
ɨsho sha mujinjiziwa amooyo nanshi atɨ.
8 Mwɨ bhooziwa bhamwetu,
tihwanza mumanye ɨsho tahayɨmbɨle mu mukowa ʉgwɨ Aasiya.
Amayɨmba ɨgo gahataajile,
gahatibiduuye tee ashile ikhone lyetu,
tahali tisɨɨbha huje tɨnza‑afwe.
9 Lyoli tahali nanshi abhantu ɨbho bhalongwilwe agogwe.
Ɨlyo lyahafumiiye huje tileshe asʉʉbhɨle ikhone lyetu,
leelo tinʼsʉʉbhɨle ʉNgʉlʉbhɨ,
ʉyo azyʉsya abhafwe.
10 Ʉmwene ya‑ahatifyʉlɨle lwa tili mu lʉgʉ ʉwa‑afwe,
nantele ahayijendeelela hutifyʉle.
Atɨ tihunʼsʉʉbhɨla ʉmwene huje ahayibha ahutifyʉla hu habhaazyo honti,
11 alɨngaane naamwɨ hutaavwe hwi‑idala ɨlyɨ mpuuto zyenyu hwa Ngʉlʉbhɨ.
Ʉmwene ahwʉmvwa ɨmpuuto zyenyu na hutisaye atɨ.
Ɨpo abhantu abhinji bhahayibha bhahunʼsalifya ʉNgʉlʉbhɨ hu nongwa yɨ mpyana yaakwe huliitɨ.
ɄPaulo agalulanya ʉzingatizu waakwe ʉwa‑abhale hu Kolinto
12 Ɨshi,
atɨ tihwibaada hu hantu hamo,
amooyo geetu gahutisimishizya huje tikhɨɨye mu nsi ʉmu,
hu mwoyo ʉnʼzelu na hu lyoli afume hwa Ngʉlʉbhɨ.
Saga tahabhombile ɨlyo hu njeele zyetu,
lyoli hu mpyana ya Ngʉlʉbhɨ.
13-14 Mwɨ‑ɨlyo saga tihubhasimbila amazwi amakhome,
lyoli ɨgo mubhajiiye abhaazye na hugaaganye shinza.
Poshe hu habhaazyo ɨha mutagɨɨnye hashe,
ɨsʉʉbhɨla huje isiku limo mwahayihugaaganya gonti.
Ɨpo lwa‑ahayiweela ʉMwɨnɨ weetu ʉYeesu,
mwahayihwibaada hu nongwa yeetu,
nanshi atɨ ɨsho tihwibaada hu nongwa yeenyu.
15 Lwɨ‑ɨndi nʉ lusʉʉbhɨlo ʉlwo,
nahabhɨɨshɨle ʉzingatizu ʉwa hwɨnze nasʉʉti huliimwɨ.
Hwɨ‑ɨlyo mwɨnzaga‑asayiwe hwa hwɨnze anɨ ʉlwa bhɨɨlɨ.
16 Nahaamula ashilile huliimwɨ hu habhaazyo ɨho ɨmbala huula hu mukowa ʉgwɨ Makedoniya na lwɨ‑ɨweela afume huula hu Makedoniya,
ɨmbwele nantele huliimwɨ huje munaavwe ɨsha‑ashʉʉle abhale huula hu mukowa ʉgwɨ Yudeeya.
17 Wɨlɨ,
hu habhaazyo ɨho ɨnamuuye agalulanye ʉzingatizu waanɨ ʉwa hwɨnze huliimwɨ,
musɨɨbha huje ɨndi nʼgalunʼgalu?
Lumo musɨɨbha huje anɨ ɨlongozewa nɨ nsɨɨbho ɨzyɨ shimʼbɨlɨ,
huje ɨnjanje huje,
“Ena,”
nantele ɨnjanje huje,
“Ndaadi!”
18 Leelo ɨshi nanshi ʉNgʉlʉbhɨ sha‑ali nʼnʉnjɨsu,
ɨgo tahabhabhʉzɨɨzye amwɨ,
saga gahali ga‑ayanje huje,
“Ena,”
nantele ayanje huje,
“Ndaadi.”
19 Ɨyanga ɨsho,
pɨpo ʉYeesu ʉKilisiti ʉMwana wa Ngʉlʉbhɨb ʉyo anɨ nʉ Silwanoc nʉ Tiimoti tahanʼnʉmbɨlɨɨye huliimwɨ,
saga ahali muntu wa‑agalulanye ɨnongwa aje,
“Ena,”
nantele aje,
“Ndaadi,”
lyoli ʉmwene hu habhaazyo honti huje,
“Ena.”
20 Gonti ɨgo ʉNgʉlʉbhɨ ahalapile huje ahayihutipeela hwi‑idala ɨlya Kilisiti,
gɨ lyoli.
Sha shɨɨsho mwa Yeesu ʉKilisiti tiyiga,
“Aameni,”
hwa huje gɨ lyoli,
hu nongwa ɨya humʼmwamishe ʉNgʉlʉbhɨ.
21 ɄNgʉlʉbhɨ ya yʉʉyo ahutijinjizya atɨ naamwɨ hwi‑idala ɨlya‑abhe peeka nʉ Kilisiti,
nantele atisaluuye abhe bhooziwa bha Kilisiti,
22 na hutibhɨɨshe ɨshimanyishizyo abhe bhantu bhaakwe.
Ɨshimanyishizyo ɨsho yʉ Mʼpepo ʉMʼfinjiled ʉyo akhala mu mooyo geetu na‑asimishizye ɨgo ʉNgʉlʉbhɨ alapile hutipeele.
23 Saga nahɨnzɨle nantele ʉhwo hu Kolinto,
pɨpo saga nahanzaga avwalazye amooyo geenyu.
Ɨga ɨyanga gɨ lyoli,
wope ʉNgʉlʉbhɨ nʼsimishizi waanɨ.
24 Saga huje atɨ tihwanza hubhabijiilizye ɨgo mukhondɨɨye abhombe mu lwɨtɨho,
pɨpo amwɨ mukhamantɨɨne mu lwɨtɨho.
Ɨsho shɨ‑ɨhwanziwa huliitɨ hwa‑abhombe ɨmbombo peeka naamwɨ huje museshele.