Abhabhomvi abhi‑ilagano ipya
3
Wɨlɨ,
musɨɨbha huje tandile nantele ahwibaade?
Wɨlɨ,
tihwanza abhe nanshi abhantu abhanjɨ ɨbho bhaleeta ɨkalaata ɨzya hwibhonesye huliimwɨ,
awe alaabhe ɨkalaata huliimwɨ ɨzya hwimanyisye hwa bhantu abhanjɨ?
2 Amwɨ muli nanshi ɨkalaata ɨyeetu ɨyo,
ɨyo ɨsimbwilwe mu mooyo geetu.
Ɨbhaaziwa na‑amanyiihane na bhantu bhonti.
Amwɨ muli nanshi ɨkalaata ɨyo,
ɨyo ɨsimbwilwe mu mooyo geetu.
Abhantu bhonti bhahuyibhaazya na‑amanye ɨmbombo ya Ngʉlʉbhɨ ɨyo tibhombile huliimwɨ.
3 Mulolesya huje amwɨ muli nanshi ɨkalaata ɨyo ɨfuma hwa Kilisiti,
ɨyo ɨlolesya ɨmbombo ɨyo tibhombile huliimwɨ.
Ɨkalaata ɨyo saga ɨli nanshi ɨkalaata ɨyo ɨsimbwilwe nɨ nsimbilo,
lyoli ɨsimbwilwe nʉ Mʼpepo wa Ngʉlʉbhɨ ʉyo ali mwʉmi.
Nantele saga muli nanshi ɨkalaata ɨyo ɨsimbwilwe mu mawe,
leelo ɨyo ɨsimbwilwe mu mooyo ga bhantu.a
4 Tiyanga ɨgo,
pɨpo ʉlwo lwa lusʉʉbhɨlo lwetu hwa Ngʉlʉbhɨ ʉlwo tili nalwo ashilile hwa Kilisiti.
5 Saga ayanje huje tisɨɨbha huje tibhomba hohonti hwi‑ikhone lyetu,
leelo ikhone lyetu lifuma hwa Ngʉlʉbhɨ.
6 Ʉmwene ya yʉʉyo ahatipiiye ikhone ɨlya huje bhabhomvi bhi‑ilaganob ipya lya lifuma hwa Mʼpepo ʉMʼfinjile.
Ilagano ɨlyo saga ndajizyo ɨzyo zisimbwilwe,
hu nongwa ya‑aje ɨndajizyo ɨzyo zisimbwilwe zileeta ʉfwe,
leelo ʉMʼpepo ʉMʼfinjile aleeta ʉzyʉsi.
Ʉmwamu ʉwi‑ilagano ipya
7 Ɨndajizyo ɨzyo zyahasimbwilwe mu mawe,
ɨzyo zyahaleetile ʉfwe,
zyahɨnzɨle mu mwamu ʉwo wahasonziizye huje ɨsheeni sha Moosec shilawushe.
ABhaizilaeeli bhahamenwa humʼmwenye ʉMoose hu sheeni hu nongwa ɨyo,
poshe ʉmwamu ʉwo wahalawuha hu habhaazyo hashe lwene.
d Lyoli ɨmbombo ɨyɨ ndajizyo ɨzyo zileeta ʉfwe yahɨnzɨle mu mwamu nanshi ʉwo,
8 ɨshi ɨmbombo ya Mʼpepo ʉMʼfinjile saga ɨbha nʉ mwamu tee?
9 Leelo ɨmbombo yɨ‑ɨhubhabhɨɨha abhantu huje bhalongwaje,
ɨli nʉ mwamu,
wɨlɨ ɨmbombo yɨ‑ɨhubhabhɨɨha abhantu huje bhagolosu pitagaalila lya Ngʉlʉbhɨ,
saga ɨbha nʉ mwamu tee?
10 Ɨshi ʉmwamu ʉwi‑ilagano ɨlyɨ mandɨ wuli nanshi huje nawumo nantele alɨngaane nʉ mwamu ʉwi‑ilagano ipya,
pɨpo ʉmwamu ʉwi‑ilagano ipya goosi tee.
11 Nkashele ilagano ɨlyɨ mandɨ lyahali lyɨ habhaazyo hashe lwene na lyahali nʉ mwamu,
ilagano ipya ɨlyo hu habhaazyo honti libha nʉ mwamu tee.
12 Ɨshi tibhomba ɨmbombo hu dandamazu,
pɨpo ɨlyo lya lyɨlyo lusʉʉbhɨlo lwetu.
13 Nantele,
atɨ saga tibhomba nanshi ʉMoose ʉyo ahazijile hu sheeni na henda,
huje aBhaizilaeeli bhasahalulole ʉlukhozyo luula ʉlwo lwahali luhwʉnda na‑amalishe lwonti.
14 Leelo aBhaizilaeeli saga bhahanzaga amanye.
Afishe ɨshi,
lwa bhabhaazya ilagano ɨlyɨ mandɨ,
bhapootwa amanye ɨlyoli,
bhabha nanshi aje bhahwikwinshiiye na henda ɨho.
Ahenda ɨho saga heepile hu nongwa ya‑aje ʉKilisiti mwene ya yʉʉyo abhajiiye ahwefwe.
15 Lyoli,
afishe ɨshi ɨleelo,
lwa bhabhaazya ɨvitaabu ɨvyɨ ndajizyo zya Moose,
amooyo gaabho gakwinshiliilwe na henda,
bhapootwa amanye.
16 Leelo ʉmuntu wowonti ʉyo ahumʼmwɨtɨha ʉMwɨnɨ ʉYeesu,
ʉmwene ahumʼmwefwa ahenda ɨho.
17 Ɨshi,
ʉMwɨnɨ yʉ Mʼpepo,
pa pali nʉ Mʼpepo wa Mwɨnɨ pali nʉ waawusu.
18 Ɨshi,
atɨ tenti ɨbho saga tikwinshiliilwe hu maaso na henda,
tilolesya ʉmwamu wa Mwɨnɨ nanshi ɨshilolwe sha shilolesya ɨsheeni.
ɄMwɨnɨ ʉyo yʉ Mʼpepo,
ya yʉʉyo ahutigalulanya alɨngaane nʉ mwene.
Ahutigalulanya afume ʉmwamu afishe ʉmwamu ʉgoosi tee.