Ratha ngāi chu mansin u ro
4
1 Kei madit ngāi,
aloma ratha dōra hi iam zit u nō ro.
Tenchu Pathian āta ahong mo ahong nōk mo ati na nei riat thei u na ranga ratha ngāi chu mansin u ro.
Asik chu deari rothol ātampa maniapūra asuak kēng ani zei.
2 Hivan tin hin Pathian Ratha chu riat thei un na ti:
Isua Krista hi miring taksa anchanga ahong kēng ati na apom Ratha adōn tak chu Pathian āta ahong ani na.
3 Isua Krista chu taksa anchanga ahong ati na apom nōk Ratha adōn tak chu Pathian āta ahong ni mak.
Hava tak ha Krista rothol ratha ani zei.
Hatuka chu ahong rang ani zei ati na na lei riat u ha atun len hin maniapūra a om sua kēng ani zei.
4 Nāi ngāi,
nangni hi Pathian mi na ni u na,
hanūk chu hava ngāi ha antor sua kēng na ni u zei.
Asik chu maniapūra alei a om nēka han na kōm u na a om ha kēng alian ual ani na.
5 Amāni chu maiapūr mi ani u na,
hasik han maiapūr chong kēng ei ril u,
hanūk chu maniapūrin um amāni chong kēng ei rangāi.
6 Koini chu Pathian mi na ni na,
Pathian ariat ngāiin koini na chong chu ana rangāi pena.
Pathian mi ni lui ngāi chu koini na chong na rangāi pe mak.
Havan tin han koinīn Ratha dik tak le ratha dik nōk chu nei riat thei ani na.
Pathian maditna le
koini maditna
7 Kei dit ngāi,
koini le koini andit anlōm u rei,
asik chu anditna hi Pathian āta asuak kēng.
Tukareng anditna anei tak chu Pathian āta anzir le Pathian ariat mi ani na.
8 Tukareng anditna dōn lui chu Pathian ariat ni mak,
asik chu Pathian hi anditna ani na.
9 Hiva taka hin Pathian chu ei na ditna koini kōma ei hong manlang ani na:
Ama zāra sandama nei om theina ranga Pathianin anāi pasal khatdak hi maniapūra ei hong tīr ani na.
10 Hiva hi anditna chu ani:
Koinīn Pathian nei dit ni mak,
tenchu ama kēng koini anān dit ei chang ani na.
Hanūk chu koini nei siat sika āsia lenna ranga anthiarna ranga Pathianin anāi pasal ei hong tīr ani na.
11 Kei madit ngāi,
Pathianin hatuk pei ha koini ngāi ei na hong adit sika,
koini le koini ngāi um nei andit rang ani na.
12 Tutēn Pathian hi amu la om ngāi mak,
tenchu koini le koini ngāi anditna na dōn ten,
Pathian chu koini kāra a om ani zei,
hatuka anditna chu koinia hin ei kip ani na.
13 Asik chu ama a Ratha koini na kōma ei na pēk sika Pathian chu koinia hin ei om,
hanūk chu koinīm Pathiana hin nei om ti nei riat ani na.
14 Hanūk chu Pain anāi pasal chu maniapūr sandampu achang ranga ei hong tīr ti hi koinīn nei mu sua le nei manriat sua ani na.
15 Tukareng Isua hi Pathian Nāi Pasal ati na apuang tak chu,
Pathian chu akōma a om ani na,
amām Pathiana a om ani na.
16 Pathianin koini ranga anditna ei dōn ha koinīn nei riata nei iam ani na.
Pathian chu anditna ani.
Tukareng anditna kōma a om tak chu Pathian kōma a om ani na,
Pathian um ama kōma a om ani na.
17 Koinīn ruiril nikhua tika anngāmna nei dōn theina ranga anditna chu koini kōma hin ei kipa ei om ani na.
Asik chu ama ei ni anga koinīm hi maniapūra nei ni ani na.
18 Asik chu anditna hīn anchina dōn pial mak.
Tenchu anditna akipin anchina chu ei razūl kēng.
Asik chu anchina ei om na bila ansinsaknām a om ani na.
Tukareng anchina ādōn chu anditna la makhip lui ani na.
19 Hasik han amān ei dit mānsa sika koinīm ama nei madit ani zei.
20 Mi tu khatin mo Pathian ka dit ti sela tenchu aparual amumāk aniten,
hava mi ha milak athei ani na.
Asik chu aparual ei mu thei lua mana adit mak,
Pathian ei mu thei nōk vāng chu hontin mo ei dit thei rang?
21 Ama kōm āta hiva chongpēk hi koinīn nei man:
Tukareng Pathian andit tak chu aparual um madit rase.