1
1 Koi Pātar hin Pathian mi thang nupang le anāi ngāi kōma hiva lekha hi kei maziak.
Nangni ngāi hi taktaka kei madit ngāi na ni u na,
koi rong ni mak tenchu chongtak ariat dōrān um ei na madit u ani na.
2 Koini na malung sūnga a om chian le tāituan tenpei a om chian rang chongtak sika han kei na dit u ani na.
3 Pa Pathian le Pa anāi
Pasal Puma Isua Krista kōm
āta lungkhamna,
riangvāina,
phūkdāina chu chongtak le anditna lehan koini na bila om chian rase.
4 Nang na nāi ngāi bila senkhat Pain chong ei na pēk ang taka chongtaka kal achōia kei mu sika achān ka rāi asān.
5 Ka pi,
atun hin na kōma chongpēk athar ni mak kei maziak,
tenchu aphut len āta nei man chongpēk rui ha kēng kei maziak.
Hava chongpēk ani zei:
Koini le koini ngāi nei andit anlōm rang ani na.
6 Hatuka chu hiva hi anditna chu ani:
Ama achongpēk ngāi anga kal nei chōi hi ani.
Hava lampui ang taka kal nei chōi thei u na ranga aphut len āta na lei hong riat u achongpēk ha ani na.
7 Asik chu maniapūra hin mi huang ngāi tamtak asuak kēng ani u zei.
Hava ngāi hān Isua Krista hi miring taksa anchanga ahong ati na pom lui ngāi ani u na.
Hava ang mi ha mi huang le Krista rothol ani u na.
8 Koini nei pōngna mara ei anpei nōkna ranga,
anrēng u ro.
Tenchu koinīn na loma akipa rātpāk chang thei u na rei.
9 Tukareng Krista anchūnana om luia dān ākhēl tak chu Pathian dōn lui ani na.
Tukareng Krista anchūnana a om tak chu Pa le Nāi Pasal aninīn ādōn rit ani na.
10 Tukhatin mo hiva anchūna hong chōi luia nangni kōma ahong tak chu,
na ina mantung nō ro,
phām um nō ro.
11 Asik chu alei aphām tak chu amān āsia ei thō bila han anchelpui kēng ani zei.
12 Nangni kōma chong ātampa anziak rang ka dōna,
tenchu lekhati le lakhapuana maziak zōt makunga.
Hanēk anten,
koini na rāisānna ei kip theina ranga na kōm u na ahonga māi anmu hianga achong ranga kei sabei ani na.
13 Pathian mi thang,
na zuarpui anthangnu anāi ngāiin chibai ana thō u.
Amen.