Damna chong
1
1 Anphuta a omsa,
koini na kuara nei riat,
na mita nei mu,
koinīn nei en,
na kuta nei tōn,
hava damna chong rui ha koinīn nei ril ani na.
2 Hava damna ha Pathianin ahong manlanga,
koinīn nei muna,
nei manriat ani zei.
Hava tāituan damna,
Pa kōma om ha koini kōma ei hong anlang rui chu nei puang ani na.
3 Koinīn hava nei mu le nei riat ha nangni kōmam nei ril ani na,
koini bila nangnīm nei anlop thei u na ranga.
Hatuka chu koini ngāi nei anlopna hi Pa le anāi pasal Isua Kristana anlopna ani na.
4 Hatuka chu koini na rāisānna ei kip theina ranga hiva ngāi hi nei maziak
ani na.
Ra-ānga kal achōi
5 Hanūk chu koinīn ama kōm āta chongbe nei riata nangni kōma nei ril rēt chu hiva hi ani:
Pathian chu ra-āng ani na,
ama kōma āzīng reng om thak mak.
6 Koinīn ama le anlopna adōn kēng na ni na ti na,
tenchu azīng kāra na la om ten,
milak chong aril kēng na ni zei.
Koini chu chongtak om athō ni lāi mak mena.
7 Tenchu ama chu ra-ānga ei om anga koinīm ama bila ra-ānga na om ten anruala anlopna adōn na ni zei.
Hatuka chu anāi pasal Isua Krista thisenin āsia nei thō ngāi dōra ei na mansāi pe ani na.
8 Koinīn āsia dōn pial mak me,
nān ti ten na nininga anhuang kēng na ni,
chongtak chu koini kōma abui kēng ani zei.
9 Koinīn nei siatna ngāi dōra nān puangpui ten,
ama chu aiamrua le ādik ei ni sika nei siatna ngāi dōra na madual inti,
hanūk chu nei diknōkna ngāi dōra na mansāi inti.
10 Hanūk chu “āsia thō mak me,”
na ti ten ama chu milak atheia nei manlō kēng ani zei,
achong um koini kōma a om ni lāi mak.