Puma nikhua hongna rang rui
3
1 Ka lōm andit ngāi,
hiva hi na kōm u na ka lekhamathuan annina ani zei.
Ka lekha mathuan aninīna han na malung u na andonna anthiang nei dōn u ha anān har rēt u ranga kei zōt sika anān riat rēt u ranga kei maziak ani na.
2 Tiana deari ānthiang ngāiin aphā mān āta chong alei ril u ngāi le,
koini na kuitīr ngāiin na kōm u na koini na Puma le Sandampu chongpēk nei na ril u ngāi ha nei riattit u rang hi kei na zōt u ani na.
3 Nei riat mānsa u rang chu,
nikhua ngāi ahong ahek rang tika chu mani ēro athō ngāi la hong suak untia,
aning u na āsia ningōlnān aruaia mani ēro na thō unti.
4 Amānīn:
“Ho mo le hava ei hongna ranga achongtin?
Asik chu koini na chipui ngāi dōra ei thi u hun len āta atun ten pei ramual ansin ei anphut lena āta alom peia ei om ang balama ala om kiar hile!”
ti unti.
5 Tian lāi hun len āta Pathian chong lehin anvān hi ei hong man om ani na.
Hanūk chu maniapūr um tī nāta tānga ei hong man om kēng ti chongtak hi azōt uama tel lui om ei thō u ani na.
6 Hava tī lehan tian lāia maniapūr chu tīlian sāngin ei khuma ei pei ani na.
7 Tenchu atun taka anvāna le phila a om ngāi dōra moia akāng rang le Pathian tel lui ngāi apei ranga ruiril nikhua tika ranga ansiaka anhōi ani na.
8 Tenchu ka lōm andit ngāi,
hiva chong angkhat hi mangil u nō ro:
‘Puma kōma chu nikhat hi kum asāngkhat ang,
hatuka kum asāng khat hi nikhat ang kēng,’
ti hi re u ro.
9 Mi senkhatin asōta ei mandon anga Puma chu achongtin ālen ranga sōt ngāi mak.
Asik chu tukareng ei anpei rang hi ama malung vong ni mak,
tenchu miring dōra ei ansīrna ranga koini ranga amalung ei la manchual kēng.
10 Tenchu Puma nikhua chu zāna anru anga hong inti,
hava nikhua tika chu anvān hi rahupui lehan anpei inti.
Ramuala neinun a om ngāi dōra moia kānga anpei inti.
Hatuka phil le asūnga asin thō ngāi dōra ahek phāta kāng inti.
11 Havan tin han aloma a om ngāi dōra hi ei lān pei rang ei ni sika han hong zāt miringa mo na lei om u rang ei nāng ha?
Hava ariata hava tika nunchang anthiang tak le Pathian andonna dōn chunga na lei om u rang anānga.
12 Pathian nikhua na lei ngāk chiana anrapa ei hong lilīp rang na lei phāma na lei mangang u ang taka lei om u ro.
Hava nikhua han anvān hi moia kānga anpei inti,
hanūk chu asūnga a om ngāi dōrām alumin mazōi zit inti.
13 Tenchu Pathian achongtin ang taka anvān athar ngāi le phil athar,
dikna ei omna mun chu koinīn na lei ngāk
ani na.
14 Hasika han ka lōm andit ngāi,
hava ngāi ha na lei ngāk u na hin ama kunga annim kop lui le manu buia le phūkdāia nei anlang thei u na ranga achālaka taksat u ro.
15 Koini na Puma malung ei
anchualna hi sandamna kēng ti hi na malunga khum u ro.
Koini na parual andit Paul akōma Pathianin malung vārna ei pēk anga han na kōm u nām han tin dēn han ei maziak ani na.
16 Ama lekha mathuan ngāi kipa aloma han hava ngāi rui dēn kēng ei rila ei maziak chachak.
Ama lekha mathuan ngāi bila chongkam khakhat chu ariat antak a om.
Hava ngāi ha riatna bui le malung vārna abui ngāiin Pathian lekhabūna chong chu aleko tianga ei ril u ang dēn han ama alekha mathuana chong ngāi um aleko tianga ei ril u sika anpeina ei pha u chachak ani na.
17 Hasika han ka lōm andit ngāi,
aphā mān āta hava ngāi rui ha na lei riat u sika anrēng u ro.
Asik chu anuam le aninga om āsia thō ngāi siatna bila ana ruai u na adettita nei om u na mun āta ana masul ving u thei kēng.
18 Tenchu koini na Puma le Sandampu Isua Krista lungkhamna le riatna lama ansōn tir u ro.
Atun le tāituan tāituan peia ama ei anlianna om chian rase.
Amen.