1
1 Peter,
Isua Krista kuitīrin,
Ponto ram,
Galatia ram,
Kappadokia ram,
Asia ram le Bithunia ram dāma mun ateteia antheka om Pathian mīn thiang ngāi kōma kei maziak,
2 Pa Pathianin aphāmān āta alei riatsa anga anthang ngāi,
Krista Isua hē tel le athisena anthekna sika Ratha sin thōtheina lehan ānthianga a om sua ngāi dōra kōma:
Lungkhamna le phūkdāina chu na kōm u na pungtir rase.
Nei mangang
ādam sika rāisānna
3 Koini na Puma Isua Krista Pathian le Pa kōma anpākna om rase!
Pathian ariangvāimuna ei tamna zāra Isua Krista chu āthī ngāi kār āta ei mathui rētna lehan nei mangangna adam ei ni sika athara ei na mazir rēt ani zei.
4 Amana han dōngluana khat koinīn nei man ani na,
hava ha neinun ha anpei ngāi lui,
khel ngāi lui le chuai ngāi lui ha nangni ranga vānrama ansiaka a om kēng ani zei.
5 Asik chu hun ahek tika sandamna anlang rang ha ansin sua vang zeia.
Hava rang sik piala han iamna zāra Pathian sin thōtheina lehan anrung kēng na ni u.
6 Atun hin anāng ten,
chomo khat bak ranga ansinna tin rēng atēnga na dūk ei na u rang ani na,
hanum nisela hava taka han achālaka na rāi mansān u ro.
7 Hiva ngāi dōra ei hong omna asik chu nei iam u na rāngkachak nēka alu,
mīn moia ei sake lua mana āsiat thei ani na.
Tenchu hava nei iam u na anthiang hiai vāng chu Isua Krista ahong anlang tika anpākna,
anlianna le lalchina ranga anpom ani na.
8 Ama na mu u nōkām nisela nei madit u ani na,
atun len hin nei mu u nōk ani na hanum nisela ama chu nei iam u,
hanūk chu chong ril theina bui khopa rāi nei mansān u ani na.
Hava rāisānna chu ālian sabak ani na.
9 Asik chu nei iam u na derdīn na ratha u ranga sandamna ha na man u zeia.
10 Na rang u na lungkhamna ahong anlang rui deari ngaiin aphāmān āta alei ril sua u ha sandamna rui ha asa dima ei thūn u le ei ravān u ani na.
11 Amāni kōma om Krista Ratha hān mānsana chu Kristān antak ei tiar rang rui le nukhōna anliana ei om rang rui ha alei hong ril u ani na.
Amānīn hova hun le,
hontin dingmuna mo ei hong ni ranga ha hava rui ngāi ha alei hong thūn u ani na.
12 Tenchu hava ngāi ha amāni aninga ranga ni mak tenchu koini ngāi ranga dorbōndom ani u na,
amāni kōma han hava ngāi ha ei hong anlang ani zei.
Atun chu vānram āta ahong achum Pathian tīr Ratha Ānthiang zāra na kōm u na thang ahui ariat suana thang ahui aril ngāi hān ei hong manlang rēt u ani na.
Hiva ngāi rui hi vānpalāi ngāi um amu ranga ei phām u ani na.
Kristian nun
anthiang le anditna rui
13 Hasika han na malung u chipa sin athō rang anga na kōng khit u ro.
Na ninga anrēngna dōn u ro.
Isua Krista ahong anlang tika na rang u na lungkhamna hong anchōi rang ha akipa lei mangang u ro.
14 Hē tel nāi ngāi anga han om u ro,
tenchu tian lāia riat lui kāra āsia ningōlnana nei om u
ang om ngāi ha la u lāi nō ro.
15 Tenchu nangni ana pāipu u ei anthiang anga han nangnīm na
om dān u tina anthianga om u ro.
16 Hiva chong hi Pathian lekhabūna anziak ani na:
“Ānthiang ni u ro,
asik chu koi ānthiang kēng ka ni,”
(Lev. 11:44 )
ati na.
17 Ami mandang abuia tukareng asin thō ang chipa rui arilpu ha Pa ati na na pāi u ten,
hiva muna hin khual anga ama chu anchi chunga lēng u ro.
18 Na chipui u ngāiin ei na manlōn u miring omdān itē ei nemna bui om dān anga alēng āta han āsiat thei rāngkachak le mo,
rupa le mo anratan ni u mak che ti ha na riat u na.
19 Tenchu ansiatrua abui le manu bui berate anga Krista thisen alu lehan anratan kēng na ni u zei.
20 Ama chu leilung ansin mān āta alei anthangsa ani na.
Tenchu nikhua anruatsa ahek suale chu ei hong anlang ani na.
21 Ama zāra han kēng nangnīn athī āta anthui suale anlianna apēkpu Pathiana nei iam u.
Asik chu nei iam u na le nei mangang u na ha Pathian lam tiang ei ni theina ranga ahong anlang ani na.
22 Ratha zāra chongtak atel chunga na malung manthiang u tānla unāi anditna tatak lehan andit u ro.
Na malung anthiang taka adettita andit anlōm u ro.
23 Asik chu āsiat thei chi muru nāta ni mak tenchu siat thei lui chi muru Pathian chong adam tāituana ādiar thei lehan anzir thar kēng na ni u zeia.
24 Asik chu hiva hi Pathian lekhabūna anziaka:
“Miring dōra hi chiak ang
kēng na ni hile,
Miring ei rīlna ngāi dōra rama
pār ang kēng,
Pārkung ngāi chu achāra,
apār ngāi achuaia achul.
25 Tenchu Puma chong chu
umor tāituana adiara a om
chian kēng,”
(Isa. 40:6 -8 )
ati na.
Hiva chong hi ani zei ha thang ahui nangni na kōm u na anril ha.