Ānei anrum ngāi
ruia anrēngna
5
1 Ānchong ngāi,
atun rangāi u ta,
na chung u na achān antakna honga tung rang sika chap u tānla ankhēk u ro.
2 Na dōnglua u ngāi chuaia anpei sua zeia,
na puan u ngāi lāngin asāk sua zei.
3 Na rāngkachak le na sumru u ngāi nār ēkin ama siat sua zeia.
Hava nār ēk ha nei dik u nōkna ngāi anān riatpu chang unti.
Hava ngāi hān na me u ngāi ha moi anga kānga na sāk unti.
Hiva nikhua heka hin kēng dōnglua nei mankhōm u hile.
4 Rangāi u ta,
na lui u na sāng āt ranga anlō ngāi alō nei huanga nei pēk u nōk sika ei man u rang alō ngāi ankhēka ei chap u na rasa chu Sipai ngāi Puma kuara avān thang zei.
5 Ramuala hin na nuam na ninga nei om u,
rahāi ansaka na om u na.
Tenchu athatna rang nikhua tika rang anga na malung u ngāi na lei vāia nei siak u kēng ani zei.
6 Mi dik chu amānīn anānduipui u nōkam āsia nei manlō na nei that u chachak.
Antakna kāra dūk diartheina
7 Hasika han unāi ngāi,
Puma ahong māseng chu dūk adiar chunga lei om u ro.
Rangāi u ro,
phāi athōpun ruati mānsa le ruati nukhōn chu aman kār pei chu antak adiartita phāia sapār alutak chu ei ngāk ani na.
8 Nangnīm antak adiartita pei om u ro,
na malung mandet u ro.
Asik chu Puma ahong rang anāi zei.
9 Unāi ngāi,
āsia anlōna nei om u nōkna ranga siat anril u nō ro.
En u ro,
ruirilpu chu suakkhār kōla anding chian kēng ani zei.
10 Unāi ngāi,
Puma raminga chong aril tiana deari ngāiin antak ei tiara dūk ei diar zia u ha aenruana la u ro.
11 En u ro,
antaka dūk adiar ngāi chu bōrsāng atung kēng.
Joba antakna ei tiar zia ha na loma na riat kiar u na.
Hatuka nukhōna Pumān atak chunga sin ei thō pe hām na mu u na.
Ani,
Puma chu riangvāimuna le lungpōngna adōn kēng.
12 Hatuka ka unāi ngāi,
hava ngāi chunga han,
khomāk ansam u nō ro.
Anvān le mo ani,
phil le mo ani,
atei itē lehan khomāk ansam u nō ro.
Hatuka nangnīn ‘Ani’ nei ti u chu ‘Ani’ ni rase.
Hatuka ‘Ni mak’ nei ti u chu ‘Ni mak’ ni rase.
Hano ten āsia anlōna nei om u rang kēng.
Iamna bōrzong
13 Na bil u na antakna ātiar mo na om u?
Ama chu bōr zong rase.
Rāi ansān mo na om u?
Ama chu anpākna la thō rase.
14 Na bil u na adam nōk mo na
om u?
Ama chu kuibing upa ngāi kui rase,
hatuka amānīn Puma raminga sariak akhuana achunga bōr zong pe u rase.
15 Hatuka iamna bōrzongna zāra adam nōk chu adama om inti.
Pumān ama chu mandam intia,
āsia ei thō
a om ten,
anduala om inti.
16 Hasik han adama nei om thei u na ranga nei masial u ngāi ansīra thupha chōi anlōm u tānla bōr anzong anlōm u chachak ro.
Asik chu mi dik abōrzongna ranak hān sin alian tak athōthei kēng.
17 Elija chu koini ngāi anga nungchang anput miring dēn ani na.
Amān rua ei chul nōkna ranga takasat sabaka bōr azonga.
Hatuka kum anthum le tha ruk sūnga phila rua ramal chul pap mak.
18 Hava suale chu bōr azong rēta,
anvān āta rua ahong masula philin mara ahong mazir rēta.
19 Ka unāi ngāi,
nangni bila angkhat pei chongtak āta ankhāi a om theia,
tenchu nangni bila angkhat peiin hong makhīr rēt rase.
20 Hanūk chu hiva chong hi retit u ro:
Mi salui khat lam anvāi āta ahong ankhīr tak chu thīna nāta aratha ei mandampe ani zei.
Hanūk chu masial tamtak ei thō hām ei mahīp pe kēng ani zei.