Vānpalāi ngāi
nēka Nāi Pasal alian
1
1 Tian lāi han Pathianin koini na chipui ngāi kōma hun tamtak le kong tin peia Deari ngāi amanga chong ei hong ril ani na.
Hiva nikhua honga heka hin a Nāi Pasal amanga koini kōma chong ei hong ril ani zei.
2 Ama chu alom pei chunga dōngluapu achang ranga Pathianin ei hong aruat ani na.
Ama zāra hin maniapūr hek lui ngāi hi ei sin ani na.
3 Ama chu Pathian lianna ra-āng a-ēl le anzuizeka atak aphua sārina aphua tatak ani na.
Asin thōtheina chong lehan alom peia amān ei madōm kiar ani na.
Amān koini masial ngāi dōra amansāi suale chung ansānga Alian khīt achang tianga avān suta.
4 Ama chu vānpalāi ngāi nēka alian ei ni sika amāni nēka raming ahui ei raput ani na.
5 Asik chu Pathianin vānpalāi ngāi kāra tu kōm mo hiva chong hi ei la ril?:
“Nang hi ka Nāi Pasal na ni.
Avian hin kei na nei ani zei,”
(Sām 2:7 )
ati na.
Hanūk chu ati rēta:
“Koi hi ama a Pa chang ka ti.
Ama chu ka ranga Nāi Pasal
chang inti,”
ati na.
6 Hanūk chu anāi pasal atontīr maniapūra ahong tīr rang lāi han,
hintin hin ati rēta:
“Pathian vānpalāi ngāi dōrān
um ama chu amōk u rase,”
(Dān.32:43 )
ati na.
7 Hatuka vānpalāi ngāi ruia hiva hi ati na:
“Amān vānpalāi ngāi chu
rathāna asina.
Ama dorbōndom ngāi um
moidona asin,”
(Sām 104:4 )
ati na.
8 Tenchu Nāi Pasal ruia chu hiva hi ati na:
“O Pathian,
na chōmphāng
chu tāituan tāituana om
inti.
Na ram ruirilna thīr sunrol chu
dikna thīr sunrol ani na.
9 Dikna chu nangin nei madit
ani na.
Tenchu dān tel nōkna chu nei
mumāk.
Hasika han Pathian,
nang na
Pathian ngētin
na lōm chāngpui ngāi nēka
ansānga ei na siaka
rāisānna sariak lehan ei na
manthi,”
(Sām 45:6,7 )
ati na.
10 Hanūk chu ati rēta:
“Nang Puma,
anphuta
maniapūr andingna hi
nangin nei phūm ani na.
Hanūk chu anvān hi nang na
kut sin thō kiar ani na.
11 Hava ngāi dōra anpei kiar
inti,
tenchu nang chu a om chian kēng na ni.
Hava ngāi dōra ha puan anga
anrua kiar inti.
12 Puan anzual anga la zual in
na ti,
Hanūk chu hava ngāi dōra la
thūl kiarin na ti.
Tenchu nang chu amuntit rang
kēng na ni.
Nang na kum ngāi um ei
hekna om nō ni,”
(Sām 102:25 -27 )
ati na.
13 Tenchu Pathianin vānpalāi ngāi kāra tu kōma mo hiva chong hi ala ril ngāi?
“Na rāldui ngāi na kepha
siakna mun ka manchang
māseng,
Ka chang tianga ansut ro,”
(Sām 110:1 )
ati na.
14 Vānpalāi ngāi hi tu mo?
Hiva ngāi hi ratha dorbōndom ngāi ani u na.
Amāni chu sandamna alua ngāi rang dorbōndom ranga Pathian tīr ani u na.