1
1 Paul,
Krista Isuana ankhit le ka parual Timothi hīn,
Na mal madit le na sinthōpui Philemon akōma nei maziak.
2 Koini na unāi andit Apphia kōma,
na sipai changpui Arkippa kōma,
le na ina kuibing ankhōm ngāi kōma:
3 Pathian,
koini na Pa le Puma Isua Krista lungkhamna le phūkdāina na kōm u na om rase.
Rāisān chong
rilna le bōrzongna
4 Ka bōrzongnana na raming kei china kei na riattit u chachak anga hin ka Pathian kōma rāisānna chong ka mantung babanga.
5 Asik chu Puma Isuana nei iamna rui le mīn thiang ngāi dōra tak chunga na mi maditna rui ha ka lei riat chachaka.
6 Havan tin han koinīn Kristana rui āsa tin rēng nei dōn ha akip zita nei riat theia,
nei iamna ha nei ansempui riam theina ranga bōr kei zong chachak ani na.
7 Ka parual,
na mi maditna lehin achālaka rāisānna le lungngamna nei man ani na,
asik chu nang na sika mīn thiang ngāiin malung harna ei man u ani na.
Ārotpu Onesima sika
Paulin anthēmna chong aril
8 Hava sika han nang nei thō rang tuk sin nei thōthei ranga chong ana pēk theina khop Kristana anngamna adōn ka ni na.
9 Hanum nisela anditna sika hin koi Paulatartak,
atun tenām Krista Isua sika ankhum nei na riat chunga kei na hong mathēma kei na zong ani zei.
10 Ankhumna ina ka om lāia nāi pasal kei nei,
Onesima ranga na kōma kei na hong mathēma kei na zong ani zei.
11 Ama hi hava mān han na ranga ei nemna bui ani thei,
tenchu atun hin chu nang le koi nanīn ranga ānem sabak kēng
ani zei.
12 Ka malung thungna khīt,
ama hi na kōm dēna ka hong tīr rēt zei.
Na lei pom pe ro.
13 Ama hi ka bila adōn chian ranga kei zōt ani na,
asik chu thang ahui sika kei ankhuma hin amān nang na rathūla ka dorbo ana dom pe sabak theia.
14 Tenchu nang nei phalna anchel luia itē ti zōt makunga,
asik chu hava sin āsa ha nei thō khakhak rang na ti makunga,
tenchu nang na malung sūng āta nei zōt anga nei thō chang rase.
15 Atuna hun atōmte ranga na kōm āta ei rot hi tāituana nei man rētna ranga ani theia.
16 Suak anga ni lāi mak,
tenchu suak nēka parual andit anga,
aliaktena koi ka ranga,
ama chu ka ranga andit aruai ani na,
nang na rang vāng chu taksa tianga le Puma tianga parual andit anga nei man rēt theina rang ani na.
17 Hasika han koi na lōm changpui anga na na be ten,
koi nei na phām anga hin amām lei phām ro.
18 Hanūk chu na chunga masial ei thō mo a om ole hong mo ei antāng mo a om hava ngāi ha chu koi kei antāng anga na be pe ro.
19 Koi Paulin hiva ngāi hi ka kut ngēt le kei hong maziak ani na,
koi ngētin na thuan ka ting.
Tenchu nang na pum len hi ka kōma nei antāng rui chu aril lele rang zōt makung.
20 Ka parual andit,
Puma matona na kōm āta alakte lua chu rāisānna aman ranga kei phām ani na,
Pumana hin ka malung chu na manhar pe ro.
21 Hē nei
tel thei zia ka riata achālaka kan ngama,
hasik han koiin kei ril ngāi nēka hin ātam vura thōn na ti kei riat sika na kōma kei maziak ani na.
22 Hanūk angkhat rēt chu,
kei tungna rang in khat na lei mansūk pe ro,
asik chu na bōrzong u na zāra na kōm una ana honga pan len thei ranga kan iama.
23 Krista Isua sika kei ankhitpui Epaphra hān chibai ana hong thō u.
24 Havan tin dēn han ka sinthōpui ngāi Marka,
Aristarka,
Dema,
Luka ngāiin um chibai ana hong thō u.
25 Puma Isua Krista lungkhamna na ratha kōma om rase.
Amen.