Sin āsa athō chian anāng
3
1 Nangin amāni ngāi kōma hiva hi manriat rēt ro.
Rēng ngāi le ningneina dōn ngāi rachama alēng rang le amāni hē tel rang le aloma āsa tin rēng athō ranga ansin u rase.
2 Amānīn tutē siat ril u nō rase,
tenchu mi le ansual zōt lui,
aphūk adāi,
mi tin kōma om annuaina manlang rase.
3 Asik chu koinīm mān lāi han amō na ni na,
hē tel lui,
anhuanga nei om,
ningōlna le rahāi ansakna tin rēng suaka nei anmang ani na,
ān-ēng,
ansuk,
khāmaret anthō chunga nei om ani na.
Hanūk chu na ninga mumāk akāi khopa nei om anga koinīm mīn ei na mumāk ani na.
4 Tenchu koini na Sandampu Pathian alungkhamna le miring chunga ami maditna chu ahong manlang zeia.
5 Koinīn adika sin āsa nei thō sika ni mak,
tenchu anzirtharna anthiang lehan Ratha Ānthianga anthar rētna lehan alungkhamna zāra ei na hong mandam ani na.
6 Hava Ratha Ānthiang ha koini na Sandampu Isua Krista zāra koini na chunga ātam sabaka ei na hong pēk ani na.
7 Havan tin han alungkhamna zāra asat nei anlōna,
nei mangang tāituan damna lehan dōng aluapui nei chang thei ani na.
8 Hiva chong hi a iamrua ani na.
Hatuka chu Pathian a iam sua ngāi chu asa dima sin āsa ei thō chiana ei om thei u na ranga na malung apēka chong nei ril rang hi kei na zōt ani na.
Hiva chong ngāi mi tin ranga āsa le anlāppuina ani na.
9 Tenchu āmo chong ril anga ankhalna,
khūk rachi athūn,
bāi makhal azon,
dān ngāi ruia anbuaina ngāi āta ankhāi ro.
Asik chu hava ngāi ha ei nāngna le ei nemna bui ani na.
10 Hatuka chu ansenna asinpu tak chu khēp khat khēp anni ten na rakōk sua ten ma suak ro.
11 Asik chu hava ang miring chu chongtak lampui āta ankhāi le āsia ei thō lehan anininga āsia anlō u kēng ti ha riat ro.
Chongbe hekna
12 Hatuka Artema mo,
Tukika mo na kōma ka hong tīr suale anrarapa nang chu Nikapoli khuana ka kōma ahongna thō ngēt ro.
Asik chu sova son nudin adāi avamang ranga kei masuk ani na.
13 Dān ariatpu Zena le Apollo ngāi ha akhual anzin u na lampuia le ansanpui tānla itē dang nei anda u nōkna ranga lei san sabak ro.
14 Koini na mi ngāi chu mara dōn luia ei om u nōkna ranga dang andana na om u tika nei nāng ngāi ansuak theina ranga sin āsa thō ranga anchū u rase.
15 Ka bila a om ngāi dōrān chibai ana hong thō u.
Iamnana koi anān dit ngāi ha chibai na mantung pe ro.
Nangni na lom u tak chunga lungkhamna chu om rase.
Amen.