Mi tin ranga anchūsna chong
2
1 Nang chu anchūna dik nei manchū theina ranga chong anhuia chong ril ro.
2 Pātar ngāi chu om adāia,
lalchi thō ruana,
anrēng thei,
iamna lama ādik,
anditna le dūk diarna ei dōn theina ranga manchū ro.
3 Havan tin dēn han nutar ngāi um a om dān u na Pathian lalchi dōna ei om thei u na ranga,
mi siat aril mo ole achālaka zu andu mo ni nō rase,
tenchu om āsa anchū thei mi ei ni thei u na ranga manchū ro.
4 Hankēng amāni hān nupang avāng ual ngāi kōma aruathar u ngāi le anāi u ngāi chip ei dit thei u na ranga manchū thei untia.
5 Hanūk chu anrēng thei,
anthiang thei,
inrui tianga anrēl thei,
om āsa dōn,
aruathar u ngāi rachama a om thei mi ei ni u ranga manchū thei unti.
Hantin han Pathian chong um tutēn āsiat ei ril thei nōkna ranga.
6 Havan tin han ruathar ngāi chu aninga anrēng thei ranga manchū ro.
7 Tenchu nang alom peia sin āsa tin rēnga enruana anlang tānla,
na mi manchūna han ei sat zia le lalchi ei omzia ha manlang ro.
8 Hanūk chu na mi manchūna na chong ril ei dik zia,
adem rua bui ei ni zia ha manlang ro.
Hantin han ana dui ngāiin koini na chunga āsiat aril rua ei dōn u nōka ei anzak thei u na ranga.
9 Suak ngāi rang manchū ro.
Amāni ha alom peia apuma rachama ei om thei u na rang,
alom peia apuma ngāiin ei phām thei u na rang le makhal ei dōn u nōkna ranga manchū ro.
10 Itē maruk u nō rase,
aiam rua sabak ei ni thei u na ranga anlang u rase.
Hankēng Pathian koini na Sandampu ruia alom peia anchūna lam panga andit rua om a manliang thei unti.
11 Mi tin ranga sandamna ahong antung ranga Pathian lungkhamna chu ei hong manlang ani zeia.
12 Hiva hīn ei na manchūna chu:
Pathian biak nōkna le ramual ningōlna ngāi amāka,
atun taka huna hin anrēng thei le adik taka le Pathian abiak chunga nei om rang ti hi ani na.
13 Havan tin nei om a han nei mangang vān āsa,
koini na Pathian alian le Sandampu Isua Krista anliana ei anrālna chu nei ngāk ani na.
14 Asik chu amān dān nei masial ngāi dōra nāta ei na ratana sin āsa athō ranga tepannēl le ama ta chang ranga ami ngāi ei manthiang theina ranga koini rathūla ei hong anpēk ani zei.
15 Hasika han hiva ngāi rui hi na ningneina manga manchū tānla rakōk ro.
Tutēn ēlsēl na thō nō rase.