1
1 Paul,
Pathian suak,
Pathianin ei athang ngāi iamna anga le Pathian biakna lama chongtak dōra riatna anga Krista Isua kuitīr ani na.
2 Hava iamna le riatna chu tāituan damna ansabeina adōn chunga,
Pathian milak ril thei ngāi lui hān ramual ansin māna han chong alei tin ani na.
3 Tenchu ama ahun taka han achong chu ei rila han ei hong manlang ani zei.
Hatuka hava thang ahui chong rilna chu Pathian koini na Sandampu chongpēk anga ka kōma ei na mandōn ani na.
4 Nei iamna munkhat sika ka nāi pasal tatak Tita kōma:
Pa,
Pathian le Puma Krista Isua koini na Sandampu kōm
āta lungkhamna,
riangvāina le phūkdāina om rase.
Kret mualanlāna Tita asinthō
5 Kret mualanlāna kei na mākna asik chu hiva hi ani na- aloma rui tāng lān sua lui ngāi azēk vang rang le kei na ril anga han kho tina upa ngāi āphun tir rang ani na.
6 Upa chu demna bui,
nungāk khat dak adōn pasal,
anāi ngāi chu dān dōn lui anga āsia anlō lui le nupa hē tel lui nōk le Pathian a iam mi ei ni bak rang ani na.
7 Kuibing avongpu chu Pathian sūngkua avongpu ei ni sika demna bui ei ni rang anāng,
malung azāng,
malung abong,
zūn du mi,
mīn rum,
āsa nōk lama sum manna ranga huat anham nōk mi ei ni rang ani na.
8 Tenchu khual aphām athei,
om āsa andit,
malung phūkadāi,
mi dik tak,
mīn thiang le aninga anrung thei mi ni rase.
9 Anchūna dik tianga mi ei ruai theina ranga le adui ngāi makhal chu ei manduai theina ranga anchūna āsa aiam rua ei man anga apomtit thei mi ni rase.
10 Asik chu dān tel lui ngāi,
chong koronga achong papei zōt ngāi le mi huang chachak ngāi hi ātampa a om le le ani na,
aliaktena serantan ngāi bila mi ani khīt u na.
11 Hava ngāi mūr akhār pe anāng,
hanūk chu mi senkhat āsa nōk tianga manna rang apūta anchū nōk rua mi ei manchū u na insūngkua tina ei manpōn u chachak ani na.
12 Amāni ngāi bila mi deari khat lenin ei ti:
“Kreta mi ngai chu milak athei babang u kēng,
hanūk chu aruangru ankhir,
andōk le anruak duai u kēng,”
ati na.
13 Hiva chong ei na manriatna hi chong ādik ani na.
Hasika han hava ngāi ha iamna lama han ei dik thei u na rang han anchang maia chūnngō thō ro.
14 Hankēng Jihudi ngāi tiana sim marua ngāi le miring āta chongpēk ngāi tianga malung pe u nō rase.
15 Mīnthiang ngāi ranga aloma ānthiang kiar ani na,
tenchu mīnthiang lui le āiam nōk ngāi ranga chu alom peia ānthiang khat ngal hi om chachak mak,
asik chu amalung u le siat le sa riatna ei dōn u ha ānthiang lui rit ani na.
16 Pathian ariat ati na chu ei anbe u tenchu a om thō u lehan ei pom u nōk,
hava mi ngāi chu antīr rua,
hē tel lui le om āsa tin athō ranga mi ting lui ani u na.