4
1 Pathian mit muna le Puma Krista Isua raminga chong kei na pēk ani zei.
Ama chu ahong anlang nikhua le aram ahong atung tika ādam le āthī ngāi rui aril rangpu ani na.
2 Thang ahui chong chu ril chian ro,
hun asana mo hun āsiāta mo aril ranga ansin ro.
Malung anchuala asa dima manchū tānla ei dik u nōkna chu mandik ro,
chūnngō thō tānla amalung u manhar ro.
3 Asik chu anchūna dik ei la maham zōt u nōkna hun la hong tung inti,
hava tika akuar ūn asia ei rangāi zōt anga amāni ei zōt anga mīnchū thei ngāi ātampa la būm unti.
4 Hankēng chu chongtak tianga akuar sung u luia chong rachi tianga anhoi unti.
5 Tenchu nang,
lampui tina anrēng tānla antakna tiar ro,
thang ahui arilpu sin chu thō tānla na dorbōndom sin ha zui ro.
6 Koi chu atun hin māichāma dāli anzān chian anga andar sua kēng ka ni zeia.
Kei suakna
rang hun um ahong anāi zeia.
7 Anduina sa chu ka sua zeia,
kei tānna rang ten,
ka tān sua zeia,
iamna chu ka vongtit zei.
8 Atun chu ka ranga alei ansiak sua dikna rēng lukhum a om chu Puma,
ruirilpu dik hān sova nikhua tika na pēk inti.
Hava tika koi rong ni mak a,
tenchu ama ei hong anlangna rang nikhua aleia phām ngāi dōra kōmām ei pēk rang ani na.
Chongbe hekna
9 Anrapa ka kōma ahong ngētna thō zām ro.
10 Dema chu atun lāia hi ramual damsūng rui ei dit sika ana māka,
Thessalonika khuana asē zei.
Tenchu Kresken chu Galatia rama asēna,
Tita chu Dalmatia rama asē.
11 Luka athei dak kēng ka kōma om ani zei.
Marka ha na bila hong ruai tān hong ro,
asik chu ka sin thōna lampuia ama chu achālaka ana san thei ani na.
12 Tukhik chu Ephesi khuana ka mansē zei.
13 Na hong tik le Troa khuana Karpa kōma ka kultāi anchual kei siak ha hong chōi ro,
hanūk chu ka lekhānzual ngāi,
aliaktena mevun lekhabu ngāi ha hong chōi ro.
14 Alekzandar,
thīr asutpa hān ka chunga achān āsia ana thōna,
Pumān asinthō anga ratha thuan bō ni.
15 Nang um ama kōm āta achān anrēng ro,
asik chu amān koini na chongril ngāi hi ana dui sabak a.
16 Ka rang satna chong ka ril mānsa lāi tutē ana san ranga ka kōla anding om u mak alom u na ana māk kiar u na,
tenchu Pathianin hava ha amāni chunga āsia masul nō rase.
17 Tenchu chong anril dorbōndomna chu koi amanga ei anril theina rang le nam atei ngāi dōrān ei riat thei u na ranga Puma chu ka kōla andinga rātna ana pēk.
Hanūk chu sing bāikua nātām ana mazōk zeia.
18 Pumān ka ranga āsia tin ana thō rang āta na rung intia,
hatuka avānram muna azōk hiaia na siak inti.
Umor tāituana ama kōma anlianna om rase.
Amen.
Anthānna chibai
19 Priski le Akuila,
hanūk chu Onesiphora insūngkua ngāi ha chibai na mantung pe ro.
20 Erasta chu Korinth khuana a om chian ani na,
Trophima chu Mileta khuana adam nōka kei māk ani na.
21 Nūdin phāmān ahong ngētna thō zām ro.
Eubula,
Pudena,
Lina,
Klodi le aloma unāi ngāi dōrān chibai ana hong thō u.
22 Puma chu na ratha bibila om rase.
Lungkhamna chu na kōma om rase.
Amen.