Hun ahek tika Pathian
poisak nōkna rui
3
1 Hanūk chu hiva hi re ro,
nikhua honga hek tik chu rathatākna hun ngāi la hong om inti.
2 Hava tika mīn aning anditna,
sum anditna,
borāi athei,
chongpāk ansal,
chong āsia mang,
nupa hē tel lui,
phāmna dān re lui,
anthiang lui.
3 Anditna dōn lui,
mi le anngoi zōt lui,
mi siat aril,
anrēng thei lui,
āsing nōk,
āsa anmumāk ngāi.
4 Mi raming azuar,
anrum,
aning anlian ngāi,
hanūk chu Pathian andit nēk ten aninga andit ngāi ei la ni u
rang ani na.
5 Pathian abiak aphua anga om ūnti,
tenchu asin thōtheina iam u nō ni.
Hava ang mi ngāi āta ankhāi ro.
6 Hava ang mi senkhakhat chu a inrāpa alūt u na āsia puakarik apēl le ningōlnān ei vei nupang āmo ngāi chu aning neinana ei ruai u chachak ani na.
7 Anchūna adōn chian u nām nisela alom peia chongtak rui chu vaphā sua lui ngāi ani u na.
8 Havan tin han Janni le Jambri hān Mosi ei dui u anga hava ngāi um chongtak chu ei dui u ani na.
Hava mi ngāi ha amalung u ei annim sika iamna lampuia Pathianin ei pom lāi nōk ani u na.
Hasika han chongtak chu ei dui u chachak.
9 Tenchu hava chung lam chu amāni ansōn thei u lāi nō ni,
asik chu hava mi ngāi anga amānīm ei mo u na chu mi dōra kōma anlang zita om inti.
Timothi kōm Paul achongpēk
10 Tenchu nangin kei na manchūna ngāi,
ka omdān ngāi,
ka derdīn ngāi,
kei iamna ngāi,
ka malung anchualna ngāi,
kei maditna ngāi,
ka dūkdiarna ngāi na riat kiar.
11 Hanūk chu Antiokei khuana,
Ikonia khuana le Lustra khuana antakna le ansinsakna kei tiar ngāi na riat kiara.
Hanum nisela Pumān hava antakna ngāi dōra nāta ana mazōka.
12 Ani tatak kēng,
tukareng Krista Isuana Pathian andonna dōn chunga a om
rang azōt chu ansinsaka om inti.
13 Tenchu mi salui le mi huang ngāi chu mīn um amāni ngāi huang untia āsiat āta āsiat riam lama ansōn ūnti.
14 Tenchu nang tu kōm āta anchū mo na ni ti ha riat tānla anchūna nei man ngāia le anthiang vanga nei riat sua ngāia omtit ro.
15 Nāipangte len āta Pathian lekhabu ānthiang ruia nei anchū ngāi ha na riata,
hava ngāi hān Krista Isuana iamna lehan sandamna manna ranga hianna ana pēk thei ani na.