Chibai thōna
1
1 Koi Paul,
koini na Sandampu Pathian le nei mangang Puma Krista Isua achongpēk anga Krista Isua kuitīrin,
2 Iamnana ka nāi pasal tatak Timothi kōma ka hong maziak:
Koini na Pa Pathian le Puma Krista Isua lungkhamna,
riangvāina le phūkdāina na kōma om rase.
Anchūna dik lui āta anrēngna
3 Makedonia ram ka pan tik lehan,
Ephesi khuana a om ranga kei na mathēm ani na.
Hava han mi senkhatin anchūna dik lui adōn a om u na,
hava ngāiin mi manchū u lāi nō rase ati na anrēng ranga rakōk ro.
4 Tiana sim marua ngāi le hek thei lui phung le khūk rachi tiang malung pēk u lāi nō rase,
ati na rakōk ro.
Asik chu hava ngāi hān ankhalna kēng ei masuak,
iamnana Pathian tianga masōnna masuak mak.
5 Malung dik tak le sia le sa riatna anthiang le iamna dik tak āta ahong asuak anditna dōn theina rang ha ka chongpēk derdīn ani na.
6 Mi senkhat chu hava chongpēk ngāi ha nūksīr ason u na sim korong rilna tianga ei kīr u ani na.
7 Achong ril u ngāi omzia le ansong sabaka achong ril u ngāi re lui ta na,
dān anchū ngāi ani rang chu ei zōt u chachak ani na.
8 Mīn adik laka amang ten,
dān chu āsa ani ti na riata.
9 Hiva hīm na riata:
Dān hi mi dik ngāi rang ni mak,
tenchu dān dōn lui ngāi le dān tel ngāi rang,
Pathian tel lui ngāi le mi salui ngāi rang,
mīnthiang lui ngāi rang le Pathian lalchi thō lui ngāi rang,
apa that le anu that ngāi rang,
mi that ngāi rang ani na.
10 Mi hur ngāi rang,
pasal le pasal anōk tianga anthō ngāi rang,
miring anruk ngāi rang,
milak athei ngāi rang,
milaka khomāk ansam ngāi rang,
hanūk chu anchūna sa dōra anduipui ngāi ranga dān hi ei hong suak ani na.
11 Hava anchūna dik ngāi ha bōrsāng atung Pathian thang ahui anlian āta ahong asuak ani na.
Hava thang ahui ha ka kōma ei na betōk sua ani zeia.
Isuan ei na madit ei lianna
12 Koi ranak ana pēkpu koini na Puma Krista Isua kōma rāisān chong ka mantunga,
asik chu amān aiamruana ei na riat sika hiva dorbōndompu ani ranga ei na ruat ani na.
13 Māna han Pathian siat arilpu le mīnsinsakpu le mi mualphui asakpu ka ni nām,
nisela la iam luia riat lui kara kei thō sika han riangvāina kei chang ani na.
14 Hanūk chu Krista Isuana iamna le maditna lehan koini na Puma alungkhamna chu ka chunga achālaka ei hong liam ani na.
15 Krista Isua mi salui ngāi sandamna ranga maniapūra ei hong ti hi aiamrua le aloma apomrua ani na,
hatuka hava ngāi kāra koi hi mi salui khīt ka ni na.
16 Hanum nisela hiva sika hin riangvāina kei chang,
asik chu Isua Kristān mānsa khīta koi mi salui khīt ka chunga adūk diar theina ei hong manlang theina rang le,
atun āta tāituan damna aman ranga ama ala iam rang ngāi dōra ranga enrua kei ni theina ranga kei chang ani na.
17 Tāituan Rēng,
chuai thei ngāi lui,
amu salui,
Pathian ahian khīt kōm rong tāituan tāituana lalchina le anlianna om rase.
Amen.
Timothi kōma Paul achongbe
18 Ka nāi pasal Timothi,
aphāmāna na ruia deari chong ril theina ang han,
ha anchūna chongbe ngāi ha na kōma kei na manlōn ani zei.
Hava lehan anduina sa chu duipuina ro.
19 Hatuka chu iamna hanūk sia le sa riatna anthiang nei dōn ha vongtit ro,
tenchu mi senkhatin hava ngāi ha ei mathāna amāni ei iamna chu rakuang alian akui anning anga ei anpei u ani na.
20 Hava ngāi bila han Humenai le Alekzandar ngāi anchel u na.
Amānīn Pathian siat aril ei anchū u nōkna ranga Soitān kuta ka betōk u zei.