Bōrzong ranga
anthēmna chong
3
1 Ahekna chu hiva hi ani na,
unāi ngāi,
Puma chong chu ei anrapa ei anthek theina ranga le anpāka ei om theina ranga koini ranga bōr na zong pe u ro,
nangni kāra ei thō babang u anga han.
2 Mi rua nōk le mīn siatna athō ngāi āta nei zōk theina ranga bōr na zong pe u ro.
Asik chu iamna hi mi dōrān ādōn zit ni mak.
3 Tenchu Puma chu aiam rua ani na,
amān adettita na man ngīr unti,
mi rua nōk āta na mazōk unti.
4 Koinīn chong nei na pēk ngāi dōra na tel tir u na,
atun um la tel tir un na ti ati na Pumana ansabeina na dōna.
5 Pumān na malung u chu Pathian anditna tianga le Krista dūkdiarna tianga na ruai tir u rase.
Āndōk ngāi ranga anchūna
6 Unāi ngāi,
koini na Puma Isua Krista raminga chong nei na pēk ani zei koini na kōm āta anchūna chong nei man u anga om thō lui ngāi le unāi andōk ngāi kōm āta ankhāi u ro.
7 Nangni ngēt hi ni mak mo koini na om dān anga om sin athō ana riat u?
Asik chu na bil u na om lāi han andōka om mak me.
8 Tutē kōm āta man abuia bu nēk mak me.
Tenchu na bil u na tutē puak nei manrik nōkna ranga asūn azāna apōng le asōl sabak chunga sin nei thō ani na.
9 Ningneina dōn lui ni mak me,
tenchu nangnīn koini om nei lāk thei u na ranga nei zōt sika nei thō ani na.
10 Asik chu nangni bila na om lāi um hiva chong hi koinīn nei na pēk:
“Tukareng sin athō zōt nōk tak chu nēk sāk nō rase,”
nei ti ani na.
11 Na bil u na senkhat chu asin thō rang thō luia mi om dāna sel ansok le andōka a om ngāi ha na riat u na.
12 Havan tina miring ngāi chu adāi riama sin athōna,
nēksāk athō ranga koini na Puma Isua Krista raminga chong nei pēk ani na.
13 Hanūk chu unāi ngāi,
sin āsa thō ranga na zām manzal u nō ro.
14 Tukareng hiva koini na lekhana chong ātel zōt nōk tak chu mandang u ro.
Hatuka chu anzakna ei mu theina ranga ama chu anloppui u nō ro.
15 Tenchu anānduipui anga be u nō tānla unāi anga manchū u ro.
Anthānna chibai
16 Hatuka chu phūkdāina Pumān kongtin rēnga alom peia phūkdāina na pēk babang u rase.
Puma chu aloma na bila na ompui u rase.
17 Koi Paul,
ka raming ka kut ngēt le kei maziaka hiva hi chibai kei hong thōna lekha ani na.
Hivan tin hin lekha ka mathuan rang kip kei mandangna kei maziak chachak ani na.
18 Koini na Puma Isua Krista lungkhamna aloma na tak chung u na om rase.
Amen.