Dān akhēlpu
2
1 Koini na Puma Isua Krista ei hong rētna le ama bila mun khata nei anchunna ruia andon ranga unāi ngāi atun nei na mathēm ani na.
2 Krista nikhua chu āhong kēng ani zei,
ti hi ratha mo ani,
miring chong mo ani ole koini na lekhamathuan mo ani,
itē rengin na malung u sōkmancha nō rase,
manbuai um nō rase ati na nei mathēm.
3 Angkhat pei sika tutēn na huang pial u nō rase.
Asik chu hava nikhua ha Pathiana chongtak āta aselna hong suak mānsa inti,
hava suale Āsia athōpu,
anpei rang ngala nāi ha ahong asuak māseng chu hava ha hong tung nō ni.
4 Ama chu Pathian ta nei ti ngāi dōra le Pathian biakna lampui ngāi dōra dui intia,
hava ngāi dōra chunga ama chu ansānga anbēnti.
Harong ha la ni mak,
ama chu Pathian biak ina kēng Pathian anga ansuta ‘Pathian’ ka ni ei anti rang ani na.
5 Nangni ngāi bila ka om lāi han hiva ngāi dōra hi kei na ril u ani na,
hava ha na malung u na re u mak che mo?
6 Ama ahun taka ei hong anlangna ranga atun hin akhār angkhat ala om ti rui ha na riat u na.
7 Asik chu dān akhēlpu chong anthup rui chu atun lāi tak um sin ei thō chian ala ni na.
Tenchu hava akhārpu akhāi māseng chu ei la khār chian rang ala ni na.
8 Hava tika han dān akhēlpu chu hong anlang inti,
hatuka Puma abāia thīnthi le ama chu hong hāl inti,
anlianna le ei honga ama chu hong pei inti.
9 Hatuka ama chu ahong tika soitān aninga ei rātna ngāi angtaka,
milak sinsiana ngāi dōra le boidongkhap sin ngāi dōra hong thōnti.
10 Hanūk chu anpei ranga om ngāi bil āta
dik luina tinrēnga anhuangna lehan hong inti.
Asik chu amāni sandamna ranga chongtak anditna ha ei poisak u nōk sika anpei unti.
11 Hasika han milak ei iam u na ranga Pathianin amāni bila anhuangna ranak arāt khat ei hong man hong ani na.
12 Hasik han chongtak iam u mak,
tenchu ādik nōk tianga rāi ei mansān u sika alom u na āsia anlōna unti.
Pumana adettita om rui
13 Pumān ei madit unāi ngāi,
nangni ranga Pathian kōma rāisān chong aril babang hi nei nāng ani na,
asik chu Pathianin aphut āta anānthiang thei Ratha le chongtaka iamna lehan sandama nei om thei u na ranga anthang kēng na ni u.
14 Hiva sik taka hin koini na Puma Isua Krista ei lianna achang ranga koini na thang ahuia amān ei na pāi u ani na.
15 Hasika han unāi ngāi,
angīrtita om u ro,
hanūk chu koini na mūra chong le mo koini lekha mathuana anchūna rachi ngāi ha sūrtit u ro.