Pathian abiak ruia anchūna
2
1 Hasika han mānsa khīta chu mi dōra ranga bōrazong rang,
mi rathūla bōr azong rang,
niai athō chunga angēnna le rāisān chong antung ranga ka na mathēm u.
2 Hanūk chu rēng ngāi le ningneina dōn ngāi rang um zong ro,
Pathian andon le lalchi thōna anngoia le phūkdāia nei lēng thei u na ranga.
3 Hava ha koini na sandampu Pathian mit muna āsa le apom rua ani na.
4 Amān chu mi dōra hi sandama om rang le chongtak riatna adōn ranga ei na zōt ani na.
5 Pathian angkhatdak a om a,
Pathian le miring kong kāra palāi um angkhatdak a om a,
ama chu miring,
Krista Isua ani na.
6 Ama chu mi dōra anratan ranga ahong anpēk ani na,
hava ha ahun taka ei hong anriata ei hong anlang ani zei.
7 Hava athō ranga koi hi tāng anhāipu le kuitīra ei na ruat ka ni na.
Chongtatak kēng kei ril,
milak thō makung,
iamna le chongtak ruia Jentail ngāi anchūpu ranga anruat ka ni na.
8 Hasik han kei zōt chu,
pasal ngāiin mun tina kut anthiang anlānga taksitna buia le ankhalna buia bōr zong u rase.
9 Havan tin dēn han kei zōt chu,
nupang ngāi um raliang anhui lui le raliang aliakput thō luia,
raliang ei anhui u zotor lehan anliang u ro.
Hong zazāt mo samtuma ankhoptete ngāi mo,
rāngkachak mo,
lunglu vār ngāi mo,
puan anthang ngāi le mo anliang u nō rase.
10 Tenchu Pathian lalchi thō anti nupang ngāi anga sin āsa lehan anhui raliang thō u rase.
11 Nupang chu alom peia hē tel chunga adāi riama anchū rase.
12 Nupngin pasal ei manchū rang le pasal chunga ningneina ei dōn ranga phal makunga,
hanēk ten dāireka om sela kei zōt.
13 Asik chu Adam ansin mānsa ani na,
hava suale kēng Evi ei ansin ani na.
14 Hanūk chu Adam anhuanga om mak a,
tenchu nupang kēng anhuanga ei om a masiala ei chul ani na.
15 Hanum nisela iamna le anditna le anthiangna adōna,
rilru diktaka a om ten,
nāiha ei tēng sika han adama om inti.