Kuibinga upa
ngāi dingmun rui
3
1 Tukareng kuibing upa āchang zōt aniten,
sin āsa thō rang zōt ani ti adik kēng.
2 Havan tin han a om u ten kuibing upa chu demna bui,
nungāk voi khat alāk pasal,
asing,
anrēng thei,
lalchi dōn,
mi phām athei le mīnchū dān athei sabak mi ei ni rang anāng.
3 Hanūk chu zu nēk lui mi le malung lum lui mi ei ni rang ani na.
Tenchu a om adāi,
āsiat tianga huat anham lui,
ansualna zōt lui,
sum ningōl lui mi ei ni rang ani na.
4 Hanūk chu anāi ngāi lalchi adōna hē tel mi le alom peia ainsūngkhur asa dima avong thei mi ei ni rang anānga.
5 Asik chu ama insūngkhur ngal avong thei nōk ten,
Pathian kuibing vāng chu hontin mo ei vong thei rang?
6 Ama chu iam athar mi ei ni rang ni mak,
havan tin han aniten anlianna adōna diabola asia ei anlō anga asia anlō theia.
7 Hava rong ha ni mak,
apanga mi ngāi kōma raming āsa ei lō rang anānga,
hano ten nukhōna ēro anzona a om le diabola chāngtena ankhit theia.
8 Havan tin dēn han kuibing dorbōndom ngāi chu lalchi thōrua mi ei ni u rang anāng.
Hanūk chu achong thūl lui mi,
zu nēk lui mi,
āsa nōk tianga huat anham lui mi ei ni u rang ani na.
9 Tenchu siat le sa riatna anthiang vang adōn chunga iamna chong anthup arung thei mi kēng ei ni u rang ani na.
10 Tenchu hava ngāi rang ha mansin bak u tānla,
hava suale adem rua abui aniten,
kuibing dorbōndom sinthōranga anthang ni u rase.
11 Havan tin dēn han anungāk u ngāi um lalchi thō rua mi ei ni u rang anānga,
bado thei ni nō rase tenchu a phūk adāi le alom peia aiamrua mi ei ni rang ani na.
12 Hatuka kuibing dorbōndom ngāi chu anāi u ngāi le ainsūngkhur asa dima avonga nungāk angkhat adōn pasal ni rase.
13 Asik chu asa dima kuibing dorbōndom ngāi chu amāni ranga dingmun sa le Krista Isuana ei iam u na ruia ngamna man unti.
14 Anrapa na kōm u na ahong rang an-iam chunga hiva chong ngāi hi kei maziak kēng.
15 Tenchu ka sōt ving anten Pathian insūngkhura mi ngāi bila mi hontin mo ei om u rang hava ha nei riat thei u na ranga kei
hong maziak ani na.
Pathian insūngkhura mi ngāi chu Pathian adam kuibing ngāi,
chongtak chopui amang le ei andingna bul adet ani na.
16 Hatuka Pathian mandonna ruia chong anthup rui hi ankhalna bui thaka anlian sabak kēng.
‘Ama chu taksana ahong
anlanga,
Rathāna adik anlōna.
Vānpalāi ngāi kōma amēl mu
theia a om a,
Jentail ngāi kōma athang tāng
anhāia ei om.
Ramual mīn iamna zāra apom
theia ei om ani na.
Hatuka anlian sabaka
chungvāna akal,’
ti hi adikthap ani na.