2
1 Hasik han nang ka nāi pasal,
Krista Isua lungkhamnana han arāta lei om ro.
2 Hanūk chu anariatpui mi tampa matona ka mūr āta chong nei rangāi ha,
mi aiamrua,
mi tei ānchū thei rang ngāi kōma han manlōn ro.
3 Krista Isua sipai āsa anga antakna na tiarpui ro.
4 Sipaia anthangpu rāi ei mansān theina rang āpūt sipai chu andui lāi tak tutēn damsūng omna sākna ruia anzēl ngāi mak.
5 Havan tin anga,
mīn rualsiak andāiām chum sela,
dān ngāi anga athō nōk ten rātna lukhum lehan ankhum ngāi mak a.
6 Luinīng athōpu chu luinīng mara aman mānsa rua ngal ani na.
7 Ka chongril ngāi ha mandon chachak ro,
Pumān alom peia malung vārna na pēk rase.
8 Isua Krista,
David akhūka mi,
thang ahui kei ril anga athī ngāi bil āta anthui rēt ha retit ro.
9 Hava thang ahui sika han āsiat athō miring anga ankhitna ten peia antakna ngāi kei tiar ani na,
hanum nisela Pathian chong chu ankhita om thei nō ni.
10 Hasika han Krista Isuana a om sandamna ha tāituan tāituana annlianna lehan ei man thei u na ranga anthang sua ngāi sika aloma kei diar kiar ani zei.
11 Hiva chong hi aiama apomrua chong ani na:
“Ama ei thīna bila na thī ten,
Ama ei damna bilām dam inti.
12 Ama bila na tiar anten,
Ama aruirilna bila ruiril inti.
Ama na tel nōk ten,
Amānīn um na tel nō ni.
13 Koini chu aiamrua na ni
nōkām,
Ama chu aiamrua ei ni chian
rang ani na,
Asik chu ama le ama antel
luia om thei ngāi mak.”
Pathianin ei
pomrua sin athōpu
14 Hiva rui ngāi hi manriattit ro.
Rui papei chunga chong ankhal nōkna rang Puma mit muna achālaka rakōk ro,
asik chu hava ngāi han itē ei nemna om mak,
tenchu anngāi ngāi ranga anpeina kēng.
15 Sin athōpu,
chongtak chong chu ei dik angtaka amang thei chu anzakpui rua om mak a,
havan tin ang han Pathian kōma āsana nei anpom theina ranga arāta sin thō ro.
16 Tenchu Pathian lalchi thō nōkna chong korong anril papei ngāi chu nūksīr son ro,
han tina chongkam ngāi chu Pathian
andon nōkna tiang kēng ei ruai.
17 Havan tina anchūna chong ngāi chu pān aringin ei sāka ahek tir anga ei na sāk tir kēng.
Amāni bila Humenai le Phileta anchel u na.
18 Amāni ngāi hān,
‘anthuirētna chu atun hin ani sua kēng ani zei’ ati na chongtak lampui chu ei tok u nōka mi senkhat iamna chu ei masiat pe u chachak ani na.
19 Tenchu Pathian lungphūm anchang chu andingtita om a,
hava han andangna sīlmōra hiva chong hi anziak:
“Pumān ama ta ami ngāi chu ariata,”
(Nah.1:17 )
ati na,
hanūk chu “Krista raming apāi tak chu adik nōk āta ankhāi rase,”
ati na.
20 Tenchu in aliana hin rāngkachak le sumruna ansin bēl rong om mak a,
thing le bephila ansin um a om a,
senkhat chu maritansuan ual a om a,
senkhat chu maritansuan nōk ual a om a.
21 Hasika han,
hava ngāi āta anthiang vanga a om thei miring chu maritansuan bēl le anthiang vang,
apumān ei mangrua le sin āsa tina anmang thei maritansuan bēl chang thei inti.
22 Hatuka vānglāi āsia ningōlna ngāi āta ankhāi tānla dikna,
iamna,
anditna,
anngoina ngāi chu malung anthianga Puma āpāi ngāi bila han razūl ro.
23 Tenchu ansualna ama suak chachak ti ariat chunga,
āmo le omzia bui ankhalna ngāi bila anlop nō ro.
24 Puma suak chu ansual ankhal hi ei thō rang ni mak,
tenchu mi dōra ranga āsing,
mīnchū thei sabak,
phūkasei nisela.
25 Hatuka mi duipu ngāi chu om annuaia kēng achālaka nei manchū sabak rang ani na,
havan tin han amānīn chongtak rui chu asa dima ei hong riat thei u na Pathianin ansīrna hun alei pēk ving thei kēng.
26 Hanūk chu anriat theina ahong dōn u na diabol ei zōt zāt athō ranga chāngtena ankhit āta ahong azōk ving thei kēng.