Chibai thōna
1
1 Jakob,
Pathian le Puma Isua Krista suak hīn,
Mun tin antheka om nam sōmleianni ngāi kōma chibai ka thō.
Anthēmna le ansinna
2 Ka unāi ngāi,
anthēmna tin na tong u tika hava ha rāisānna kiara be u ro.
3 Nei iam u na ansinna hān dūk diar theina ei rasua ti re u ro.
4 Hankēng,
itē ansama nei om u lāi nōkna ranga akip le anzuia azōk hiaia nei om u na ranga dūk adiarna hān asin thō mantung rase.
5 Na kār u na angkhat peiin hianna ansam ten Pathian kōma zong sela,
amān lei pēk inti.
Ama chu mi dōra angō luia le manar luia apēkpu kēng.
6 Tenchu malung ringna buia iamna dōn chunga zong rase.
Asik chu malung ringna adōn tak chu tipuia tiduar ansok thinthīn ei suka ei vōr ang kēng.
7 Havantina mi chu,
Puma kōm āta itē aman ranga sabei nō rase.
8 Malung anni chōi miring chu ei thōna tina tak anchang
nō ni.
9 Unāi annuaina dingmuna a om ngāi chu arāi man sān rase,
asik chu ansāngna dingmuna a om ani u na.
10 Hanūk chu anchongpa chu arāi mansān rase,
asik chu annuaina dingmuna a om ani na,
phila pār anga achuaia anpei rang kēng.
11 Ani ahong asuaka ahong aluma hatuka ahong raema hava akung aman thēma apār achula ei rīlna dōra asiāta ei anpei ani na.
Hava anga han anchongpa chu asīngansana tina ei chuaia ei chul rang ani na.
12 Tukareng ansinna adiar zām thei tak chu bōrsāng atung kēng,
asik chu ansinna adiar sua ngāiin chu damna rēng lukhum man unti,
ama andit ngāi kōma Pumān apēk ranga hava ha achongtin ani na.
13 Tukhatīn mo anthēmna atong le Pathian āta anthēmna kei tong kēng ti nō rase,
asik chu āsia thō hān Pathian chu mathēm thei ngāi mak.
Hanūk chu Pathian um tutē āsia le mathēm ngāi mak.
14 Tukareng āsia aningōlnān le asāk pār ningōlnān ei ruaia anthēmnana ei masul chachak.
15 Hatuka chu hava ningōlna hān asūnga avonga āsia ahong mazira,
hanūk chu āsia ha ahong alian sua le chu thīna ahong mazir chachak.
16 Ka unāi andit khīt ngāi,
anhuanga om u nō ro.
17 Bōrsāng āsa le pēkna akip dōra chu chung tianga ra-āng ngāi Pa kōm āta ahong achum kēng.
Ama kōma chu anthot ngāi lui le aralīm anthotret ang ngala anthot ngāi lui ani na.
18 Ama akut suak ngāi kāra mara mānsa khat nei ni theina ranga ama ei zōt anga chongtak chong lehan ei na mazir kēng.
Chong anngāi le azom
19 Hasik han ka unāi andit ngāi,
hava ngāi ha nangnīn na riat u,
mi tin hi chong anngāia anrap thei mi ni u ro,
tenchu chong arila anrap thei lui le ataksi anrap lui mi ni rase.
20 Asik chu miring taksitna hān Pathian dikna makhip thei mak.
21 Hasik han nangnīn annim le āsa nōka ābit tin pei u tānla koini na ratha anān dam thei chong koini malunga antu ha om annuai taka pom u ro.
22 Chong anngāi duaia chong anril ngāi zōm lui mi chu aninga anhuang kēng,
nangni chu hantin han om u nō ro.
23 Tukareng chong duai anngāia chong zōm lui mi chu dapōna andang siai luia amēl a en ang kēng.
24 Nukhōna asē suale amēl en anrapa anngil len ang kēng.
25 Tenchu tukareng zōkna ana pēk dān akip chu malung apēk le asa dima anngāia anngil len nōk le chong anril azōm len mi chu asin thōna tina bōrsāng atung ani na.
26 Nangni kāra tu khatin mo Pathian andon mi anga aphua theia,
tenchu sakor mūra lākam ankhop anga amaleia lākam makhop lui mi chu aninga anhuang kēng,
ama asakhua biaknām akorong ani na.
27 Koini na Pathian le Pa mit muna sakhua ānthiang le demna kāi lui chu hiva hi ani:
Antak huna sakāngcha le arōng ngāi kiavāng asak le maniapūra itē manu buia alēng om hi ani.