Mi mandang dōn
lui ranga anchūna
2
1 Ka unāi ngai,
koini na Puma Isua Krista anlianna Puma chu nei iam u sika mi ranga mandang dōn u nō ro.
2 Asik chu nei ankhōm u na ina mi tukhat mo rāngkachak zaketam abun le puan āsa antianga ahong lūt theia,
hankēng chu anriang khat um puan asiatte antianga ahong lūt theia.
3 Tenchu nangnīn puan āsa ahong antiangpu chu na lei poisak u na akōma:
“Hong ta ro,
hiva mun āsa hin hong ansut ta ro,”
na lei ti thei u na.
Tenchu anriang khat kōma chu:
“Sova son nang chu vān ding ro,
hano ten hiva ka ke siakna kōla ngal ansut ro,”
na lei ti thei u na.
4 Havan tin han nangni kāra na mi mandang nei dōn u chachaka hin malung āsia anput chunga rui aril chang u mak che mo?
5 Ka unāi andit ngāi,
rangai u ta,
Pathianin anriang ngāi hi maniapūra iamna tianga anei rang le ama andit ngāi kōma aruirilna achang ranga ei thang ni mak mo?
6 Tenchu nangnīn anriang ngāi hi mualphui nei sak u ani na.
Hatuka anei ngāi hi ni mak mo nangni ngāi anān sisōm u chachak,
hanūk chu amāni ni mak mo ruirilna muna ana thāl u chachak?
7 Amāni ni mak mo araming ahui nei raput u tak chunga siat aril u chachak?
8 Tenhu Pathian Lekhabūna nei mu anga:
“Nang na ninga nei andit anga
na inkōl mi madit ro,”
(Lev. 19:18 )
ati na lal dān hi na zī anten na sin thō hi adik ani zei.
9 Hanum nisela na mi mandang na dōn u ten,
āsia thō kēng na ni u,
Dānin um dān ansiatpu anga ei na manlō u ani na.
10 Tukareng dān dōra azōm zitām nisela,
dān khat dak ama chāi anten aloma ānchāi zit anga anlō kēng ani zei.
11 “Uire nō ro,”
atipu dēnin
“Mi that nō ro,”
(Ant. 20:13,14 Dān. 5:17,18 )
atipu ani rēta.
Hasika han uire na thō nōkām,
mi na that ten,
dān ansiatpu dēn kēng nei chang.
12 Hasika han,
nei ril u ang le nei thō u anga zalēnna dānin na chung u na rui ei ril rang ani zei.
13 Mi tak chunga riangvāi muna dōn lui chu riangvāina bui dēna achunga rui anrila om inti.
Asik chu riangvāi muna chu ruirilna nēka ansāng kēng.
Iamna le asinthō
14 Ka unāi ngāi,
mi khatin,
“Iamna ka dōn,”
ati theia,
tenchu asinthō abui ten imo ei nemna?
Hava iamna hān mandam thei ni mo?
15 Ankhīna parual angkhat mo,
ole sarzuar angkhat mo,
puansil rang abui le nikhuan tina anēk rang nēk-sāk ansama a om theia.
16 Hatuka akōma nangni bila mi khatin:
“Phūkdāi taka vaom tānla,
alum ītta le akhop mara vaom ro do,”
ti sela,
tenchu ataksa ranga anāng ngāi apēk nōk ten imo ei nemna?
17 Hantin dēn han iamna chu asinthōna anchel nōk ten athei duaia chu athi kēng.
18 Tenchu mi senkhatin:
“Nangin iamna na dōna,
hatuka koiin asinthōna ka dōn,”
ati theia.
Hasik han nei iamna chu asinthō anchel luia na man mu ro,
hatuka koi um kei iamna chu asinthō lehan na man mu ka ting.
19 Pathian chu angkhat a om ti nei iam ani na,
hava nei ti ha āsa len ani zei.
Tenchu ratha sia ngāi um ama a iam u,
hatuka annōk u kēng ala ni.
20 Nang miring āmo!
asinthō anchel luia iamna duai chu athi kēng ti hi nei riat zōt mo ani zei?
21 Koini na chipui Abrahamin anāi pasal Isaak māichām chunga ei vadar han,
hava asinthō sika ni mak mo adik ei anlō?
22 Ama ei iamna le asinthō ha anloprita sin athō ani na,
hatuka asinthō sika ama ei iamna ha ei anzui ani ti riat mak che mo?
23 Pathian Lekhabūna chong:
“Abraham chu Pathian aiama,
ha ei iamna ha ama ranga
dikna ati na ei anruat pe,”
(Anp. 15:6 )
ti chong ha ei kip ani na.
Hatuka ama chu Pathian mal ati na ei anpāi ani na.
24 Hiva hin iamna sika duai ni mak,
tenchu asinthō sika kēng mīn adik ei lō ti hi na riat thei u na.