Malei arung rui
3
1 Ka unāi ngāi,
nangni nāi bila tamtak mīnchūpu anga lei anbe u nō ro.
Asik chu nei riat u anga,
koini mīnchū ngāi hīn atei ngāi nēka ankhir sabaka na chunga rui anril rang kēng na ni.
2 Asik chu koini na loma lampui tamtaka rui ateteia anpal kēng na ni.
Tenchu tukareng achong rila anpal lui mi chu anzui ani na,
ataksa pumpui um arungtit thei ani na.
3 Rangāi u ta,
koini na hē ei tel theina ranga sakor mūra lakam na manlāk ten,
apumpui um ni rase kēng nei nuamna taka nei malīm thei ani na.
4 Hanūk rēt chu rangāi u ta,
rakuangpui ngāi um ni rase alian sababak ani na,
hava ha thīnthi rātin ei zōtna taka ei vei thei ani na.
Hava ngāi ha rakuangpuia aveina amantha asīnte lehan aveipūn ei nuamna tiang taka ei vei titir thei ani na.
5 Havan tin dēn han malei um taksa apēng ngāi bila asīnte khat ani na,
hanum nisela achālaka chong ansāng aril chachak ani na.
Hanūk chu moi rasi asīnten ram alianpa ngāi ei hāl thei zia ha mandon u ta!
6 Malei hi moi ang kēng.
Malei hi na taksa apēng ngāi bila āsiat tin anchunna rabu ani na,
hava hān taksa pumpui ei mannim ani na,
ei damna nun chu ei anhāla aninga lena gehenna moia ei anhāl ani na.
7 Ramsa tin dōra,
vātin dōra,
nuk anei alōn dōra,
tipuia nuk anei dōra hi atep thei kiar ani na,
miringin um aman tep thei zita.
8 Tenchu malei hi tutē āntep thei la om mak.
Hava ha āntep salui āsiat le thīna tūra ābit ani na.
9 Hava malei dēn lehan Pathian le Pa chu nei manpāk ani na,
hava dēn lehan Pathian anga ansin miring um khomāk nei sam chachak ani na.
10 Mūr khat āta anpākna le khomāk samna ei suak rit ani na.
Tenchu ka unāi ngāi,
havan tin han ei ni ranga chong ni mak.
11 Tinār khat āta ti ānthiang le ti ānnim mo aluang rit thei ngāi?
12 Ka unāi ngāi,
theichang kung āta maruan mo anra ngāi?
Hanūk,
gerep kung āta theichang mo anra ngāi?
Havan tin anga tinār khat āta ti ānnim le ti ānthiang um suak rit thei ngāi mak.
Hianna anni rui
13 Na kār u na tu mo āhian le āriat a om na ni u?
Hava mi ha chu hianna nāta honga suak om annuaina lehan asinthōna zāra om dān āsa manlang rase.
14 Tenchu na malung u na khāmaret ana le huat anhamna mandon na dōn u ten,
hava nei hian u na lehan borāi thō luia chong tak milak thō u nō ro.
15 Hava anga hianna chu chungvān āta ahong ni mak,
tenchu ramual taksa le diabol āta ahong kēng.
16 Asik chu khāmaret le huat anham mandon ei omna taka anpōnna le siat tin thōna kēng
a om chachak.
17 Tenchu chungvān āta hianna honga chum chu mānsa khīta chu ānthiang ani na,
hava suale chu anngoina andit,
āsing azōt,
mi thunuaia om thei,
riangvāimuna lehan ābit,
mara āsa,
mi mandang abui le malung ānzīk adōn ani na.
18 Anngoina asin ngāi chu dikna mara akham ranga anngoina chimu kēng ei
tu u.