Pathiana anpe ro
4
1 Nangni na kār u na ansualna le anzēmna ngāi hi hovan āta honga suak chachak mo?
Hava ha na taksa u na om ansualna ansuak chachak āsia ningōlna nāta ahong asuak ni mak mo?
2 Āman ranga na zong u,
tenchu man u mak chena.
Huat anhamna aman rang nei zōt u sika mi nei that u,
tenchu hava ha man u mak chena.
Āman ranga nei ansual nei anzēm u,
tenchu man u mak chena,
asik chu Pathian kōma zong u mak chena.
3 Na zong u tikle man u mak chena asik chu nei zong u na derdīn adik nōk ani na.
Asik chu nei man u ngāi rahāi nei ansakpui u na ranga nei zong u ani na.
4 Nangni uiare athō chachak ngāi,
ramual le mal anchang hi Pathian andui kēng ti hi re u mak che mo!
Hasik han tukareng ramual le mal anchang azōt chu Pathian arāldui kēng ei chang.
5 Hanūk rēt chu,
“Koini na kōma om ratha ha,
manar tataka manar ei na thō,”
ti hi Pathian Lekhabūna ānziak hi itē omzia buia ranga mo nei mandon u!
6 Tenchu aliaka lungkhamna ātam kēng Pathianin ei na pēk ani na.
Hasik han Pathian Lekhabūna chongin:
“Pathianin chongpāk ansal
ngāi chu aduia,
Tenchu om annuai athō ngāi
chu lungkhamna apēk
chachak,”
(Hnc. 3:34 )
ati na.
7 Hasik taka han Pathian thunuaia om u ro.
Tenchu diabol chu duititi u ro,
hankēng na kōm u nāta rota ankhāi inti.
8 Pathian vadēp u ro,
hankēng amām na dēp unti.
Mi salui ngāi,
na kut u ngāi rasūk u ro.
Malung anni adōn ngāi,
na malung manthiang u ro.
9 Malung dūk manna u ro,
malung manngūi u ro,
hatuka chapa ankhēk u ro.
Nei anni u chu lunghāngna lehan anthūl rase,
na rāisān u na chu malung anngūina lehan anthūl rase.
10 Puma makunga annuaia om u tānla,
amān na mansāng unti.
11 Unāi ngāi,
nangni le nangni ngāi siat anril u nō ro.
Tukareng aparual chunga āsiat aril le aparual chunga rui aril anten,
ama chu dān siat aril le dān rui aril kēng ani zei.
Tenchu nangin dān chunga rui na ril ten,
dān āzōmpu ni lāi mak chena tenchu rui arilpu kēng nei chang ani zei.
12 Dān apēkpu le rui arilpu chu angkhat dak ani,
ama chu andam thei le ansiat thei ani na.
Tenchu mi chunga rui aril ranga tu mo na ni?
Nangtūka rui anlianpui u nō ro
13 Atun rangāi u ro,
nangni hiva chong aril ngāi:
“Avian mo,
nangtūk mo,
ha khopuia han sē inti,
hava han kum khat vamang intia,
sum vamaphunga sualup inti,”
na ti u na.
14 Tenchu nangtūka nikhuana imo a om rang re u mak chena.
Nei dam u na neinun ngal ha hong mo?
Hava ha tīlum rahuna moikhu asuak chomo khata om anpei len rēt ang kēng na ni u.
15 Hanēk anten:
“Puma azōta na dam ten,
hava thō inti,
sova thō inti,”
kēng nei ti u rang dan ani na.