Chāizūng Melkizedek
7
1 Hiva Melkizedek hi Salem Rēng le Chungnung khīt Pathian chāizūng ani na.
Abrahamin rēng ngāi avathat suana ahong akīr lāi han amān antongpuia bōrsāng apēka.
2 Abrahamin ama kōma neinun dōra sōma angkhat apēka.
Araming omzia na malet ten,
mānsa chu “Dikna Rēng,”
ani na,
nukhōna chu “Salem Rēng” ani na,
hava omzia chu “Anngoina Rēng,”
ti na,
ani na.
3 Ama chu pa dōn mak,
nu dōn mak.
Ama chu akhūk om mak,
anikhua ei anphutnām om mak,
ama ei dam ei heknām om mak.
Ama chu Pathian Nāi Pasal anga ansin,
tāituana chāizūnga om chian ani na.
4 Atun hiva miring ei lian zia hi mandon ta,
koini na chipui Abraham ngalin rāl avaduia neinun rusum ei thō ngāi bila sōma angkhat chu akōma ahong pēka.
5 Levi achi nāta chāizūng achang ngāi dōra chu dānin ei ti anga aparual ngāi kōm āta kēng sōma angkhat ei lāk u chachak ani na.
Hava ngāi ha Abraham akhūk āta asuak ani u ngalām nisela ei lāk u ani na.
6 Tenchu hiva miring chu hava ngāi chi nāta khūk dōn mak,
hanum nisela Abraham kōm āta sōma angkhat alāka chong antinna amanpu chu bōrsāng aman tunga.
7 Asik chu itē chong ankhalna abuia ulianpu hīn nāipangpu kēng bōrsāng apēk ngāi.
8 Hiva hin āthi thei miring ngāiin sōma angkhat alāk u na,
sova son chu ‘adam chian rangpu,’
ati na Pathian lekhabūn arui ei manriat hān sōma angkhat alāka.
9 Sōma angkhat ālāk chachak Levi hām ni rase Abraham azāra kēng sōma angkhat ei pēk u,
na ti theia.
10 Asik chu Melkizedekin Abraham antongpui lāi han,
Levi chu apa sūnga kēng ei la om ala ni.
Isua chu Melkizedek
dingmun aphua
11 Hatuka chu Levi achina mi ngāi chāizūng ei chang u sika akipna ei om ani thei ten,
Aaron dingmun ang ni luia tenchu Melkizedek dingmun anga chāizūng atei ei la om hi imo ei la nāngna?
Asik chu hava tak chung āta Israel ngāiin dān rui chu ei man u ani na.
12 Asik chu chāizūng sin thō athūl ei nāng chachak sika dān um athūl ei nāng chachak ani na.
13 Hivana mīn arui ei rilpu hi nam atei viak ani na,
hiva nam āta tutē māichāma dorbo andom la om ngāi mak.
14 Koini na Puma chu Juda nam āta ahong ani ti hi anthiang vanga anlanga.
Chāizūng achang ruia hiva nam ruia itē ei ril om mak.
15 Hanūk chu Melkizedek aphua zek chāizūng atei ala honga om ten,
ama ruia anthiang vanga anlang riam ani na.
16 Hava chāizūng chu miring chongpēk dān anga chāizūng achang ni mak,
tenchu hek thei lui damna ranak ang taka chāizūng achang ani na.
17 Asik chu Pathian Lekhabūn ei ti anga:
“Nang chu Melkizedek
dingmun anga,
Umor tāituan chāizūng kēng
na ni,”
(Sām 110:4 )
ati na.
18 Tenchu chongpēk mānsa ha ei rāt lāi nōk le ei nem lāi nōk sika anpei ani na.
19 Asik chu dānin itē ei makhip thei om mak.
Tenchu koinīn nei mangang alian khat ahong asuaka,
hava lehan Pathian chu nei vanāi theina ani na.
20 Hanūk chu ama ha khomāk ansam luia chāizūng manchang mak,
tenchu atei ngāi chu khomāk ansam luia chāizūng ei manchang ani na.
21 Tenchu Isua chu khomāk ansam chung ngēta chāizūng ei manchang ani na.
Asik chu amān khomāk ansama akōma:
“Nang chu Melkizedek
dingmun anga,
Umor tāituan chāizūng kēng
na ni.
Pumān hiva hi akhomāk
ansam ani na,
Ansīr rēt rang ni lāi nō ni,”
(Sām 110:4 )
ati na.
22 Asik chu hava nēka dān ankhit āsa ual ranga Isua chu ahong andetpu ei hong chang
ani na.
23 Hava ngāi ha chu ei thi u chachak sika han chāizūng chang chian thei u mak,
hasika han chāizūng ātampa om ei hong nāng ani na.
24 Tenchu Isua chu tāituana a om chian ei ni sika han achāizūng changna anthūl ngāi mak.
25 Hasika han ama zāra Pathian kōma āsē ngāi dōra chu amān akip zita alei mandam thei ani na.
Asik chu amāni ngāi ranga bōr azong pe ranga ama chu adam chiana a om kēng.
26 Hiva sika hin hiva anga chāizūng alian,
ānthiang,
ademrua abui,
annim lui le mi salui ngāi āta ankhāi,
anvān nēka ansāng ha kēng nei nāng ani na.
27 Ama chu chāizūng atei ngāi anga nikhuan tina mānsa khīta aninga masial sika anbōlna athō suale nukhōna mi pui ngāi masial sika anbōlna athō babang nāng mak.
Asik chu ama aninga ranga anbōlna voikhat renga anpēk diai han,
mipui ranga ei makhip kēng ani zei.
28 Dān chu achuai thei miring kēng chāizūng alian ani ranga ei phun chachak ani na,
tenchu dān a om suale nukhōna ahong,
khomāk ansama chong hān Nāi Pasal chu tāituan anzuina chāizūng ranga ei phun ani na.