6
1 Hasika han Krista ruia anchūna chong bul ngāi chu amāka puiting lam pan u rei.
Sin athi sua ngāi āta malung ankhīrna rui le Pathian lama iamna rui ngāi ha athara bul thēng rēt u lāi nō rei.
2 Baptisma ruia anchūna,
kut anlāng rui athi ngāi thi āta anthui rēt rui le tāituan ruirilna ruia anchūna ngai ha.
3 Pathianin aphal ten,
hava ngāi ha anchū tir bo mani.
4 Asik chu voi khat malung vārna amana,
vān nei nun pēk atema,
Ratha Ānthianga anlopna achang sua ngāi ani u na.
5 Pathian chong āsa aman le machina hun ahong a oma asin thōtheina ariat sua ani u na.
6 Hava ngāi ha akīr rēt u ten,
athara malung ankhīr rēt thei rang tū tē om lāi mak.
Amānīn Pathian Nāi Pasal chu krosa ei mantār rēt u na vāntāng mitmuna mualphui asak ani u na.
7 Roti ei chulna phāiin hava roti chul ha ei madōma ei nuk ani na,
hatuka hava phāi ha phāi athō ngāi ranga asuang rua anna tin ei masuak ani na.
Hava phāi ha Pathian kōm āta bōrsāng andōm ani na.
8 Tenchu hava phāiin raling kung le ramāi kung masuak sela,
mīn amang ruana atet nō ni,
mīn khomāk ei sam duai rang nintia,
ei hekna rang chu moia akāng duai ani na.
9 Hanum nisela nangni andit aruai ngāi,
hivan tin hin chong na ril ngalām nisela,
nangni ngāia om āsa masuak un na tia,
hanūk chu nangni sandamna ranga anchel rui āsa ha na dōn u ti koinīn anngamna na dōna.
10 Asik chu ama raminga na sin thō u ngāi le anditna ranga nei pōng u na mī ānthiang ngāi dorbo nei dom u,
nei la dom zēl u hi anānngil pe thei u Pathian adik nōk ni mak.
11 Hanūk chu atun nangnīn ansabeina anchiang aman ranga ahek ten peia na tep annēl u na ha na sang chip u na anlang ranga nei na zōt ani na.
12 Andōka om u nō ro,
tenchu iamna le dūkdiarna zāra Pathian chongtin alua ngāi om dān ha la u ro.
Pathian chongtin detzia
13 Pathianin Abraham kōma khomāk ansam lāi han,
Ama nēka alian atei ei bui lāi sika Ama aning len le khomāk ansama.
14 Pathianin ati na:
“Bōrsāng na mantung
ngēt ka ti,
Hanūk chu achālaka na
chi na maphung ka ti,”
(Anp.22:17 )
ati na khomāk ansama.
15 Hatuka Abraham chu hun asōtpa adiara a ngāk suale chu Pathian chongtin chu aman lele na.
16 Miring ngāi chu amāni nēka alian khat raminga kēng khomāk ei ansam u,
hava khomāk lehan ankhalna tin ei hek ani na.
17 Havan tin Pathianin ama achongtin alua ngāi kōma aderdīn anthūl ngāi lui anlang rang ei zōt sika khomāk ansama ei hong mandet riam ani na.
18 Pathian milak thō ngāi lui chu anthūl ngāi lui neinun anni lehan khomāk ansama.
Ama kōma
zōk hiaina aman ranga le lungngamna lian tak aman ranga na maton tianga nei mangang asūrtit chunga nei tān ani na.
19 Hava nei mangang ha koini nei damna ranga thīrchingki anga nei dōn ani na,
hava ha angnampui zāt tak le ādettit khat ani na.
Biak in puanzār sūngām avalūt thei ani na.
20 Havan tin han,
Isua chu Melkizedek dingmun anga tāituan chāizūng alian achanga koini rathūla maton ruaitu anga ama chu avalūta.