5
1 Chāizūng alian ngāi tin hi miring kār āta anlāk ani na.
Hava ngāi ha Pathian rui lampanga āsia thō sika miring rathūla dāli dar rang le anbōlna athō ranga anphun ani u na.
2 Ama chu āriat nōk ngāi le lampui anvāi ngāi chungām ni rase phūk asei chunga a ompui thei ani na,
asik chu ama len ha rāt nōkna tin le anhual ani na.
3 Hava ei rāt nōkna ngāi sika han,
mi ngāi masial rathūla anbōlna ei dar anga ama masial um andarpui babang anāng.
4 Tutēn hava ang chāizūng anlalna atheia alāk thei om mak,
Aaron anga Pathianin ei pāi mi rong nōk chu om mak.
5 Havan tin anga Kristām aninga chāizūng alian khīt achanga anlalna ei man ni mak,
tenchu Pathianin akōma ati na:
“Nang hi ka Nāi Pasal na ni,
Avian kei na nei ani zei,”
(Sām 2:7 )
ati na.
6 Havan tin han lekhabu ateia:
“Nang hi Melkizedek
dingmun anga,
Umor tāituan chāizūng kēng
na ni,”
(Sām 110:4 )
ati na.
7 Isua taksana a om lāi nikhua han thīna āta ama andam thei kōma achālaka ankhēk le mit rathi zān chunga bōrzongna le niai thōna ngāi adara,
hava ha amān Pathian lalchi thōna ei dōn sika arangāi pena.
8 Ama chu Nāi Pasal ani nām nisela,
antakna tin ei tiara hin hē telna ei anchū ani na.
9 Hatuka ama chu kipa anzui sua vang le ahē tel ngāi dōra ranga tāituan sandamna abul ahong achang.
10 “Melkizedek dingmun anga,”
chāizūng alian ani ranga Pathianin ei pāi ani na.
Nūk ankei nōk
ranga anrēng u ro
11 Ama ruia han aril rua chong ātampa na dōna,
tenchu na kuar ei sēt u sika anthiang vanga chong aril um antaka.
12 Asik chu ahun ruia na mandon tenchu mīnchūpu achang pha kēng na ni u zei.
Tenchu Pathian ruia chong aphutna ngāi ha athara anchū rēt kēng nei nāng ani u zei.
Būn rum ni mak,
tenchu ranuti kēng nei la nāng u hile.
13 Tukareng ranuti nēk ngāi chu dikna ruia chong riatna rēng dōn u mak,
asik chu nāitesen ei la ni u sika ani na.
14 Tenchu būnrum chu puiting sua ngāi rang ani na.
Hava ngāi ha chong ei riat u na siar ei sep u chachak sika han āsa le āsiat azēk thei u na.