Pathian mi ngāi
ranga pōngansana
4
1 Hasika han,
achi u rei,
asik chu ama pōngansanana alūt ranga chong ati nām nisela nangni bila senkhat chu hava ha vaphā luia om ving u tani.
2 Amāni kōma thang ahui ei anril anga koini na kōm am anril ani na.
Hanum nisela chong ei rangāi u ha iamna ei anchel nōk sika ei nemna om mak.
3 Tenchu koini iamna adōn sua ngāi chu hava pōngansanana alūt rang na ni zei,
asik chu Pathianin hintin hin ati na:
“Ka taksitna chunga khomāk
ansama kei ti,
‘Amāni chu ka pōngansana
muna lūt pial u lāi nō ni.’ ”
(Sām 95:11 )
Hanum nisela maniapūr ansin aphut len āta asin thō ngāi chu ei makhip sua kēng ani zei.
4 Hanūk chu hova Lekhabu khata mo ni sari ruia hintin hin ati na:
“Ni sari nikhuana Pathian chu
asin thō dōr āta pōngansa,”
(Anp. 2:2 )
“Amāni chu ka pōngansana
muna lūt pial u lāi nō ni,”
(Sām 95:11 )
ati na.
6 Hanum nisela tu tu mo chu hava pōngansanana alūt rang ala om a,
hanum nisela mānsana thang ahui anrila andōm sua ngāiin ei iam u nōk sika lūt thei u lāi mak.
7 Hanūk rēt chu,
hun asōtpa suale,
David alekhabūna han,
“Avian hin,”
ati na nikhua angkhat ei mandang a om a.
Mānsana kei ti anga:
“Avian hin arōl na riat u ten,
Mi atei ngāi anga na malung
mankhir u lāi nō ro,”
(Sām 95:7,8 )
ati na.
8 Asik chu Joshuan amāni rang pōng amansa thei ten,
hava suale nikhua atei rēt rang chu Pathianin ril lāi nō ni hale.
9 Hasika han Pathian mi ngāi ranga pōngansana hun khat ala honga om rang ti na ani na.
10 Tukareng Pathian pōngansanana alūt chu Pathianin ei ti anga amām asin thō nāta pōngansana om inti.
11 Hasika han tukareng hava aiam nōk ngāi om anga a om u nei lāk nōkna ranga hava pōngansanana alūt ranga tak asāta na tep mannēl u rei.
12 Pathian chong chu ādam,
sin athōthei,
khendāi sābe kiang anni āngei nēka āngei ani na.
Hava ha sūngrīl le ratha,
hanūk chu rathari le rūnnui ngāi dōra asun chita ābāk thei ani na.
Malung sūnga mandon le derdīn ariat vang thei ani na.
13 Ansin ngāi hi ama mitmuna angkhatte ngal anlang nōk om mak.
Koini ngāi na rui na tāng hisāp dōra nei mantungna rangpu mitmuna aloma sāikorong le anlong kiara ei om rang ani na.
Isua Chāizūng alian khīt
14 Hasika han chungvāna ākalpu chāizūng alian khīt Isua,
Pathian Nāi Pasal chu nei man sika hin nei iamna bul hi sūrtit u rei.
15 Asik chu koini nei rāt nōkna ngāia lungpōngna dōn lui chāizūng alian ni mak nei dōn.
Tenchu koini anga ama chu kongtin peia anthēmna achulām nisela ama chu āsia thō mak.
16 Hasika han,
lungkhamna le riangvāina chu asan anāng huna ana san thei ranga lungkhamna chōmphāng chu angam chunga vadēp u rei.