Mosi nēka Isua alian
3
1 Hasika han unāi ānthiang ngāi,
chunglam tiang āta kuina aman ngāi,
koinīn nei iama nei ril chachak kuitīr le chāizūng alian Krista Isua rui ha mandon u ro.
2 Mosi chu Pathian insūngkua ngāi ranga aiamrua ei ni anga Isuam ama anthangpu ranga aiamrua ani na.
3 Asik chu in asinpan a in sin nēka anpākna lian ei man anga Pathian um Isua chu Mosi nēka anpākna lian aman ranga ei ruatsa ani na.
4 In tin hi mi senkhakhatin ei manding ani na,
tenchu aloma asinpu chu Pathian ani na.
5 Hatuka nūka chong ala hong aril rang ngāi ānriat ranga Mosi chu Pathian sūngkua ngāi kār āta dorbōndom āiamrua khīt ani na.
6 Tenchu Krista chu Ama sūngkhua ngāi ranga Nāi Pasala aiam rua ani na.
Ahek tenpeia nei iamna le nei mangang rāisānna hi adettita na sūr ten,
koini hi ama sūngkua ngāi na ni zei.
Iam nōkna nāta anrēng u ro
7 Hasika han Ratha Ānthiangin ei ti anga:
“Avian len ama arōl na riat u
ten,
8 Mi tei ngāi anga na malung
mankhir u lāi nō ro,
Philchār rama aselnana na
om u lāia atak nei mansi u
anga.
9 Hava muna han na chipui u
ngāiin,
koi hi ei na
mathēma,
ei na mansin u.
Ka sin thōtheina ngāi chu kum
sōm manli amu u na.
10 Hasika han hava khūka mi
ngāi chunga ka tak asi
chunga kei ti:
‘Amalung u ngāi chu chei
anvāi chian u kēng,
Ka lampui chu re pial u lāi
mak,’
kei ti ani na.
11 Hasik han ka taksit chunga
hintin hin khomāk ansama
kei ti:
‘Amāni chu ka pōngansana
muna lūt pial u lāi nō ni,’ ”
(Sām 95:7 -11 )
ati na.
12 Unāi ngāi,
hava ha anrēng u ro,
Pathian adam āta arota iam nōkna malung āsia lam nangni bila a om ving theia.
13 Hanēk tenchu Pathianin na rang u na,
“Avian,”
ati sūng pei hin nikhuan tina nangni le nangni lungngam ansak u ro.
Tutē āsia lama anhuangna lehan na malung manchang u nō rase.
14 Asik chu ahek tenpei koini nei iamna mānsa ha adettita na sūr anten,
koini hi Krista bila anchelpui ngāi na ni zei.
15 Lekhabūna anziak anga:
“Avian len ama arōl na riat u
ten,
Mi tei ngāi anga na malung
mankhir u lāi nō ro,
Hava aselnana na om u lāia
atak nei mansi u anga han.”
(Sām 95:7,8 )
16 Hanle tu ngāi mo Pathian tak ansi u ati na ariat ha?
Hava ngāi ha Aigupta ram āta Mosīn ei hong maruai ngāi bila senkhat ha ni u mak mo?
Tenchu aloma chu ni u mak.
17 Hanūk chu hova ngāi chunga mo Pathianin kum sōmmanli pei atak ei mansi ha?
Hava ngāi ha ani zei,
āsia thō le philchār rama ruak anphūm ngāi ha ni u mak mo?
18 Hanūk chu tu ngāi chunga mo khomāk ansama ka pōngansanana lūt u nō ni ei ti ha?
Hē tel lui ngāi kōma ni mak mo ha?
19 Hasika han,
ei iam u nōk sika pōngansanana lūt thei u mak ti ha na riata.