Dān athara Chāizūng alian
8
1 Atuna koinīn nei ril ngāi bila abul khīt chu hiva hi ani:
Koinīn hiva ang chāizūng alian,
chungvān sānga Anlal khīt chōmphāng chang kut tianga ansut chu nei man ani na.
2 Ama chu miring kutin sin lui tenchu Pumān ei sin mun anthianga le puan biakin diktaka dorbōndom ani na.
3 Asik chu chāizūng alian dōra hi dān apēk le anbōlna ngāi ādar rit ranga Pathian phun ani u na.
Hasika han hiva chāizūng alian um nisela hongte mo chu ādar rua adōn anānga.
4 Taktaka ama chu ramuala a om nisela chu chāizūng chang pial nō ni,
asik chu alei om sa ngāi kēng dān anga anbōlna dāli ādar u rang ani na.
5 Amāni ngāi chu chungvāna biakin ramīl le aralīm dorbodom ani u na.
Mosīn biakin asin rang ati lāi han,
Pathian āta ngēt anchūna amana.
Asik chu hintin hin ati na:
“En ro,
alom peia muala han
kei na man ena kei na man
mu anga aphuazeka sin ro,”
(Ant. 25:40 )
ati na.
6 Tenchu atun Isuan hiva nēka dorbōndom sin āsa khīt achang zeia.
Hava rong ha ni mak,
dān ankhit āsa uala palāi chang theinām ei man ani na.
Hiva dān ankhit hi chongtin āsa ual chunga Pathianin ei manding ani na.
7 Asik chu dān ankhit mānsa ha ademrua bui nisela chu,
dān ankhit athar angkhat rēt rang rathūl anrok nāng lāi nō ni.
8 Hasika han Pathianin ami ngāi dem akāia ei mu sika:
“En u ro,
nikhua ahong rang
ani zei,”
ati na,
Pumān chong apuanga.
“Hava nikhua tika Israel
sūngkua le Juda sūngkua
ngāi kōma dān ankhit athar
angkhat sin ka ti.
9 Achipui u ngāi lehan dān
ankhit athar ka dōnpui u na,
Aigupta ram āta ka hong
asuak pui u na,
Akut u ka sūra ka hong
maruai u lāia dān ankhit
marua ang ha ni lāi nō ni.
Asik chu ka dān ansin ei zī u
nōk sika amāni chu nūksīr
son ka ting,”
Pumān ati na.
10 “Tenchu hava nikhua ngāi
atheng suale Israel sūngkua
ngāi kōma hiva dān ankhit
athar hi sin ka ti.
Ka dān ngāi chu amalung
sūng u na siak pe u ka ti.
Hanūk chu amalung pēk u na
maziak pe ka ti.
Hatuka koi hi amāni Pathian
chang ka ti,
Amāni chu ka mi ngāi chang
unti.”
11 Hanūk chu mīn,
a inkōl mi
kōma mo aparual kōma:
“ ‘Puma riat u ta ro,’
ati na
manchū chip u lāi nō ni.
Asik chu annuai khīt āta
ansāng khītin alom u na
koi chu na riat kiar unti.
12 Asik chu amāni ngāi ei dik
nōkna dōra koiin riangvāi
lei mu ka ti.
Hanūk chu āsia ei thō u ngāi
le dān ei khēl u na ngāi
dōra retit bang lāi nō ning,”
(Jer. 31:31 -34 )
Pumān ati na.
13 Hiva dān ankhit hi “dān ankhit āthar,”
ei ti na hin dān ankhit mānsa chu ‘amarua,’
ei man chang ani zei.
Hava ha atun chu amarua achanga,
ahong ātara anpei sua rang vit ani zei.