Mun anthianga
Pathian abiak dāns marua
9
1 Mānsana dān ankhitin um nisela Pathian biakna dān ngāi le phila Mun Ānthiang adōna.
2 Hatuka chu puan biak in asin u na,
amaton khīta ha Mun Ānthiang ati u na.
Asik chu hava han lēm chuangna,
tebul le ruti ānthiang siakna a om a.
3 Hanūk chu puanzār anni changna anūk tiang ha Mun Ānthiang khīt ati u na.
4 Hava han marim ahui ahālna rāngkachak māichām le rāngkachak lehan anluan dān ankhit athara sumduk a oma.
Hava dān ankhit athara sumduk sūnga manna siakna rāngkachak khēng,
Aaron sunrol āncher le dān ankhit athara lungpēk ngāi a om ani na.
5 Hava dān ankhit athara sumduk chunga han riangvāi muna sutmun chu cherub anlian ngāiin ei dūng u ani na.
Atun hava rui ha akip le achanga la ril thei nō mani.
6 Havan tin han hava ngāi dōra aloma ansūk chīt suale chāizūng ngāi Pathian haso andom ranga biak in amaton khīta mun āta ei lūt u chachak ani na.
7 Tenchu anni changna han chāizūng alian rong kēng akuma voikhat dak thisen achōi ngēta ei valūt ani na.
Hava thisen ha ama aninga rang le riat lui kāra mipui ngāi masial rathūla ei vadar chachak ani na.
8 Ratha Ānthiangin hiva hi anthiang vanga ei manlang chu ani.
Asik chu biak in mānsa anding kār pei chu Mun Ānthiang khīta alūtna lampui reng lān lang mak.
9 Hiva hi machina amarua ngāi ha atun lāia hun ranga ankhīna khat ani na.
Hiva hin nei riat thei chu,
anbōlna ranga neinun anpēk ngāi le dāli andar ngāi dōrān taktaka hasōndompu malung mantāi thei mak.
10 Hava ngāi rui chu
anēk le asāk dān,
hanūk chu anthiangna dān atetei ngāi le taksa lampanga anmangna dān ngāi ani na.
Hava ngāi ha chu anthūl rētna hun asuak māseng ranga anruat ani na.
Krista thisen
11 Tenchu Krista chu,
āsa le anzui ual ala honga suak ranga chāizūng alian ei hong changa hin,
biak in alian le akip ual,
kuta ansin luia ei lūt ani na.
Hava kei ti na ani zei,
hiva ansin sua biak in ni mak.
12 Kēl le serātte thisena ni mak,
tenchu ama aninga thisen ngēt lehan koini ranga tāituan anratanna aman suale Mun Ānthiang khīta voikhat ranga umor tāituan ranga ei lūt ani na.
13 Asik chu kēl le serāt tang thisen hanūk chu serāt razelte ravut ngāi ha anthiang lui ngāi chunga ei atheka anthiang ei manchang u ani na.
Hava ha taksa apang anthiang duaia kēng ei man thiang ani na.
14 Tāituan Ratha Ānthiang zāra Krista chu itē annim kop luia Pathian kōma dāli ei andara han Pathian adam haso nei dom thei u na ranga Krista thisenin siat le sa riatna nei dōn u ha sin athi nāta na manthiang unti.
15 Hasika han Isua chu dān khit athara palāi ani na.
Dān khit mānsa thuaia om dān akhēl ngāi ei ratan theina rang le Pathian pāina achanga tāituan dong alua ranga chongtin ei man thei u na ranga,
ama chu ei hong thi ani na.
16 Asik chu dōngluana dān khit ei omna taka han dōngluana dān ankhit asinpu chu ei thīna ei hek rang anānga.
17 Hankēng dōngluana dān ankhit asinpu chu athi suale hava dōngluana dān khit ha atak ei la hong chang thei rang ani na.
Dōngluana dān ankhit asinpu adam kār chu dōngluana dān khit ha atak la hong chang thei mak.
18 Hasika han dān khit mānsa chu Pathianin thisen lehan ei hong mandet riam ani na.
19 Dānbu ang taka chongpēk ngāi dōra Mosīn mipui ngāi kōma aril suale serātte le kēl thisen chu tī le anpola bera mul asen le husop kuang anchia alāka dānbu le mipui ngāi chunga atheka.
20 Hatuka amān:
”Hiva hi dān ankhita thisen,
Pathianin na kōm u na adōn
ranga chong ei na pēk chu
ani,”
(Ant. 24:8 )
ati na.
21 Havan tin dēn han puan biak in le Pathian biakna tinratua ngāi dōra chungām thisen atheka.
22 Dān ankhit lehan aloma thisen zāra han anthiang sua zit ang ani na.
Asik chu thisen suak lui ta āsia andualna om mak.
23 Hasika han chungvān neinun a om ramīl aphua anga om neinun ngāi chu thisenin ei manthiang rang anānga,
tenchu chungvān neinun tak chu hava ngāi nēka anbōlna āsa le kēng ei manthiang rang ani na.
24 Asik chu Krista chu kuta ansin,
atak nōk arothol Mun Ānthianga ni mak ei lūt,
tenchu atun hin Pathian makunga koini rathūla avān ding ranga chungvāna ei valūt ani na.
25 Chāizūng alian hi akum tina atei thisen achōia Mun Ānthianga ei valūt rerēt ani na,
tenchu Krista chu ama aninga andar ranga valūt rerēt lāi mak.
26 Tenchu havan tin han chu ni mak,
asik chu havan tin han nisela chu maniapūr ansin āta amān voi ituk mo kēng andar ei nāng rang ani na.
Tenchu atun hun ahek rang tianga ama aninga ei andarna lehan āsia sāina ranga voikhat dak ei hong anlang ani na.
27 Pathianin miring ranga voikhat kēng thīna ei honga ruat,
hava suale chu ruirilna ei om rang ani na.
28 Havan tin anga han Krista chu mi tin āsia apēl ranga voi khat lena ei andar ani na.
Hanūk rēt chu,
āsia apei rang ni lāi mak,
tenchu ama ei hong rang angāk chian ngāi kōma sandamna ahong chōia voi anni changna ranga ahong anlang rēt rang ani na.