Krista thīna mi tin
ranga tāituan anbōlna
10
1 Dān chu rui āsa ala honga suak ranga aralīm ani na,
anphuapui zek ataktak ang chu ni mak.
Asik chu akum tina anbōlna munkhat chian ei dar babang u sika han hava anbōlna hān ahong apan ngāi manzui thei mak.
2 Havan tin han nisela chu anbōl babang hi ei mong ranga ni lāi mak mo?Asik chu anbōlnān voikhat renga tāituana ranga anbōl ngāi aman thiang thei ten,
āsia lei thō u ruia siat le sa riatna ei dōn u hān manriat rēt chachak lāi nō ni.
3 Tenchu akum tina hava anbōlnān āsia ei manlōna ei manriat rēt chachak ani na.
4 Asik chu serāt tang le kēl thisenin āsia dōra pei thei mak.
5 Hasika han Krista chu maniapūra ahong alūt rang lāi han ati na:
“Anbōl le dāli andar hi
nangin zōt mak chena.
Tenchu nangin ka ranga taksa
nei na mansūk pe a om a.
6 Hanūk chu nangin anhāl dāli
andar le Āsia anbōlna dāli
andar um phām mak che.
7 Hasik han kēng,
‘Enta, O
Pathian,
lekhānzuala ka rui
anziak anga:
Nang nei zōt dān athō ranga
ahong ka ni,’ ”
(Sām 40:6 -8 )
ati na.
8 Mānsa dānin anāng ei ti chu,
‘‘Anbōlna le dāli andar hi nangin zōt mak chena.
Hanūk chu anhāla andar dāli le āsia anbōla andar dālīm pom mak che,”
ati na.
9 Hava suale chu:
“Enta,
O Pathian nang nei zōt dān athō ranga ahong ka ni,”
ati na.
Asik chu Kristān dān ankhit annina ei manding theina ranga mānsapu ha ei hong pei ani na.
10 Isua Kristān Pathian zōt zāt taka ataksa chu voikhat renga tāituana ranga ei hong andar sika han koini ngāi ei na manthiangna ani na.
11 Chāizūng ngāi tin chu anikhuan tina anding chunga chāizūng sin ei thō u ani na.
Hanūk chu āsia pei thei lui anbōlna munkhat chian ha ei dar rerēt u ani na.
12 Tenchu ama chu tāituana ranga āsia anbōlna voikhat dak adar suale Pathian chang kut tianga avān suta.
13 Hava hun āta len han arāldui ngāi chu akepha siakna mun aman chang pe māseng Pathian chang kut tianga ei ngāk ani na.
14 Asik chu anbōlna angkhat dak lehan amān ei man thiang ngāi chu tāituana ranga anzui kēng ani u zei.
15 Hiva dēn hi Ratha Ānthiangin um koini na kōma ei na manriat chu ani na.
Amān ei ti mānsa chu:
16 “Hava hun ngāi atheng
suale,
Amāni le kei sin rang dān
ankhit chu hiva hi ani,
Amalung u na ka dān ngāi chu
siak pe ka tinga,
Amalung pēk u na maziak pe
ka ti,
Pumān ati,”
(Jer. 31:33 )
ati na.
17 Hava suale ati rēta:
“Āsia ei thō u ngāi le dān ei
khēl u na ngāi dōra chu
retit bang lāi nō ning,”
(Jer. 31:34 )
ati na.
18 Hasika han atun chu āsia andualna ei om sika āsia anbōlna ranga dāli dār nāng lāi mak.
Dūk adiarna ranga anthēmna
19 Hasika han unāi ngāi,
Isua thisen zāra Mun Ānthiang khīta alūt theina ranga ngamna nei dōn ani zei.
20 Amān puanzār lehan koini ranga athar le lampui adam chu ei na malong pe ani na,
hava ti na chu ama ataksa len ei belbona ani na.
21 Koinīn Pathian sūngkua avongpu chāizūng alian khīt nei dōn ani zei.
22 Hasik han tho,
malung diktak anput chunga iamna akip sua adōna Pathian chu vanāi u rei.
Asik chu amān koini malunga om siat le sa riatna salui dōra ana manthiang pena,
koini taksām nisela tī avār vang lehan ei na manbual ani na.
23 Hanūk chu koinīn nei iamna anngam hi annīk lui adettita sūr u rei.
Asik chu chong atinpu hi aiamrua ani na.
24 Hanūk chu anditna le sin āsa nei thō riam theina ranga malung anhar anlōm u rei.
25 Tenchu mi senkhatin ei thō u anga mun ruala ankhōm chachak hi māk u nō rei,
hava nēk anten malung harna anpēk riam u rei.
Asik chu nikhua aliak tena hi ahong anāi riam zei ti hi nei riat u ani na.
26 Koinīn chongtak ruia riatna na dōn suana athara azōt uama āsia na vathō rēt ten,
koini na ranga āsia anbōlna itē om lāi mak.
27 Tenchu koini na mabāk chu rathatākna ruiril le Pathian adui ngāi āhāl ranga taksitna moisūmpui duai kēng ani zei.
28 Mosi dān poisak lui ngāi lua mana,
ariatpu anni mo anthum mo mi lehan riangvāi amuna bui thaka ei that u ani na.
29 Hasika han Pathian Nāi Pasal akepha le anthin ngāi,
ama athisen ānthiang chu thisen annima abe ngāi le lungkhamna Ratha sumdem athō ngāi vāng chu ituk ansinsakna ana mo aman rua ei ni u rang ani na,
mandon ta!
Asik chu hiva dān ankhita thisen lehin amān koini ngāi ei na manthiang ani na.
30 Hatuka Pumān,
“Phuba lāk rang chu koi ka ni,
koin ratha thuan ka ti,”
(Dān. 32:35 )
ati na.
Hanūk chu ati rēta:
“Pumān ami ngāi rui chu ril
inti,”
(Dān. 32:36 Sām 135:14 )
atipu hi koinīn nei riat ani na.
31 Pathian adam kuta achul hi achālaka rathatākna kēng.
32 Tenchu nangnīn avārna na man sua u na anduina antak alianpa na tiar u lāia nikhua ngāi ha retit u ro.
33 Kiang khat tianga chu mipui vāntāng mit muna mualphui ansaka antakna atiar le mani tāngzār ei na thō u ani na,
hanūk kiang khat tianga chu havan tin han machina ei thō u chachak ngāi alōm nei chang ani na.
34 Ankhita ka om lāi han nangnīn lung nei na manpōng u ani na.
Hanūk chu mīn na neinun u ngāi ana pot u nām na rāi nei mansān u,
asik chu dōngluana āsa ual le om mun adet ual vānrama na dōn ti nei riat u ani na.
35 Hasika han hava nei anngampui u na ha pei u nō ro,
asik chu hava hān rātpāk alianpa dōn kēng.
36 Pathian zōt zāt nei thō u hin antak atiar nei nāng u ani na,
henkēng na rang u na achongtin ha nei man thei u rang.
37 Achongtin chu hiva hi ani:
“Hun alakte suale,
Ahong rangpu chu ahong
rang kēng ani zei,
Sōt lāi nō ni.
38 Tenchu mi dik chu iamna
lehan dam inti.
Tukareng anūk ankei anten,
Ama chunga ka malung rāisān
lāi nō ni,”
(Hab. 2:3,4 )
ati na.
39 Tenchu koini ngāi chu amāni anga nūk akīra anpei rang ni lāi mak me.
Tenchu koini na ratha damna ranga aiam ngāi bila mi kēng na ni zei.