Iamna rui
11
1 Iamna chu koinīn nei manganga ansabeina le nei mu thei nōk neinun a om ngēt ti andang theina ani na.
2 Iamna sika pātar ngāi chu āsa ati na anril ani na.
3 Maniapūr dōra hi Pathian chong le ansin ani ti hi iamna lehan nei hong riat ani na.
Amān mu thei lui neinun āta anlang thei neinun ei hong sin ani na.
4 Iamna sika Abel chu Kain nēka anbōlna dāli āsa ual chu Pathian kōma avadara.
Hava lehan ama chu mi dik ani ti ariatpuina chu ei lō ani na.
Pathianin aneinun dar tak chunga ariata.
Iamna sika han ama chu athi nām nisela ala chongtita.
5 Iamna sika Enok chu thīna tong luia Pathianin chung tianga alāk viaka,
anlāk viak sika han amu thei om lāi mak.
Pathianin alāk viak mān āta,
ama chu Pathian rāi ansān mi ani ti riatpuina adōn ani na.
6 Iamna abuia tutē Pathian rāi ansān thei hi om mak,
asik chu Pathian apan ngāiin Pathian chu a om kēng,
ati na iamna ei dōn rang anānga.
Hanūk chu tak asāta ama anvān ngāi kōma rātpākna apēkpu ani na.
7 Iamna sika Nova chu Pathianin la hong anlang lui neinun rui ahong manthei lāi han,
ama chu Pathian anchi chunga sīngansana ainsūng ngāi zōkna ranga rakuang atuka.
Hava iamna lehan maniapūr āsia aman lōna.
Iamna sika dēn lehan dikna dōngaluapu ahong achanga.
8 Iamna sika Abraham chu Pathianin ei pēk rang mun avalua ranga asuaka asē lāi han Pathian pāina hē atela,
ei panna rang mun ariat ngal nōkam nisela asuaka ei pan ani na.
9 Iamna sika chongtin rama khual anzina riat lui rama ei vaom ani na.
Chongtin munkhat aluapui rang ngāi Isaak le Jakob abila puan ina ei lēng u ani na.
10 Asik chu amān khopui abul adet,
Pathianin ei manding le ei sin ha amu ranga ei ngāk ani na.
11 Iamna sika Sari chu āching ani suanām nisela nāi avong theina ranak adōn rēta.
Akum atheng sua nūkam nāi ala mazir theia.
Asik chu ama kōma chong atinpu chu aiamrua ati na ei pom ani na.
12 Hasika han mi khat dak āta,
hava ngal ha athi ranga toto,
hava mi khat āta chi ahong asuaka.
Hava mi achi ha anvāna ārsi anga tam le tīpui kōla atel sua lui zāt bāli ramal anga tam ani u na.
13 Hiva mi ngāi hi alom u na iamnana āthi u ani na,
tenchu Pathianin akōm u na achongtin ngāi chu man u mak.
Hanum nisela varāl alapa nāta alei thīr u na achālaka aphāma alei pom sabak u ani na.
Hanūk chu ramuala hin khual anzin le om mun adet dōn lui kēng na ni ti hi ei man lang u ani na.
14 Asik chu havan tina chong aril ngāi chu amāni omna rang ram anrok ani u ti hi anthiang vanga anlanga.
15 Hanūk chu ātataka,
ei suak u na ram ngāi ha mandontit u sela chu akīr rēt theina hēr ātampa ei mu u ani na.
16 Atun chu hava nēka mun ahui,
vānram mun kēng ning ei ōl ual ani u zei.
Hasika han Pathianin,
amāni Pathian anti ranga anzak mak,
tenchu amāni ranga kho khat alei vamansūk kēng ani zei.
17 Iamna sika Abraham chu ansinna achul lāi han Isaak chu avadara.
Amān chongantin ngāi aman ngalam nisela anāi pasal nei salep chu ala vadara.
18 Asik chu Pathianin Abraham kōma:
“Isaak āta kēng nang na chi
chu ei āntel rang,”
(Anp. 21:12 )
ati na.
19 Asik chu Pathianin athi nāta ngal ama thui pe rēt thei ti hi ei iam ani na,
hava ha amān āthi sua anga a om chu adama aman rēt tina ani na.
20 Iamna sika Isaak chu amatona rui ala honga suak rang sika Jakob le Esau kōma bōr apēka.
21 Iamna sika Jakob chu athi rang tiang Joseph anāi ngāi bōr apēk rita,
hatuka asunrol mēr aboka Pathian āmōka.
22 Iamna sika Joseph chu athi rang tiang Israel nāi ngāi Aigupta ram āta ei suak u rang rui arila.
Hanūk chu ama aruak anphūm ruia chong apēka.
23 Iamna sika Mosi chu anzir suale han anu apa ngāiin tha anthum chu athup u na.,
asik chu nāitete amēl achālaka āsana ei mu u ani na,
rēng achong ngal achi u mak.
24 Iamna sika Mosi chu alian ahong atung suale Pharao nāinupang nāi pasal anti rang maham mak.
25 Amān chomo khat bak āsia thō lama huina nēk ten,
Pathian mi ngāi le achālaka antakna atiar rang athang viaka.
26 Aigupta rama neinung ngāi nēk ten,
Krista sumdemna hi neinung alian uala ei tet ani na.
Asik chu amān rātpāk ei lan pēk rang ha ei thīr ani na.
27 Iamna sika Mosi chu rēng taksitna lian um achi mak.
Aigupta ram ei mathān ani na,
asik chu amu sa lui ha amān ei mu sua anga ei belbo sika han antak ei tiar ani na.
28 Iamna sika Zōkna pānta le hanūk chu thisen anthekna ngāi ahong mangpuia,
asik chu nāi atontīr athatpūn ei hong that thei nōkna ranga.
29 Iamna sika Israel ngāi chu tāng ahul rum anga Tipuisen chu ei rakan u ani na.
Aigupta mi ngāiin hantin han dēn athō rang apūt u na aloma anning zit u na.
30 Iamna sika Jeriko rakulpui chu mipuin ni sari ahīl sua le ei chim zut ani na.
31 Iamna sika nōtizuar Rahabi chu hē tel nōk ngāi kāra anpei mak,
asik chu mi si ngāi phūkdāi taka alei mantung ani na.
32 Hong zāt mo atei kei na la ril sa u rang?
Asik chu Gideon,
Barak,
Samson le Jeptha ngāi rui le hanūk chu David le Samuel ngai rui hanūk chu deari ngāi rui aril zit ranga hunin na ti nō ni.
33 Iamna sika hiva mi ngāiin ram ngāi ei zui u ani na,
dikna om ei thō u,
chongantin ngāi achang u na hanūk chu
sīng bāikua ei khār thei u ani na.
34 Moi sūmpui rātna ngāi ei manthi u,
khendāi mariam āta ei zōk u,
aduai āta rātna achang u na,
anduinana rālrāt achang u na,
ram ateia mi sipai ngāi chu aman rot u na.
35 Nupang ngāiin athi ngāi chu anthuia adama aman rēt u na.
Atei ngāi um nisela taksa ansuisakna ei tiar u ani na.
Asik chu amānīn anthui rētna āsa ual ei chang thei u na ranga zōkna man rang zōt u mak.
36 Hanūk chu atei ngāi um ēro ansaka ei om u,
mīn nganu ramoi le ei zēm u ani na.
Tenchu,
hava ngāi panga,
mīn ei khit u na ei khum u ani na.
37 Mīn lung adēnga
ei that u,
mīn korat le ei āta bong anni ei manchang u,
mīn ansinnana ei nei u,
mīn khendāi le avita ei that u,
bera vun le kēl vun ansila ei chei anvāka ei om u,
hanūk chu rāl anzūma,
antakna liantak atiara,
ansinsak chunga ei om u ani na.
38 Amāni ngāi ranga maniapūr hi omna rua ni mak.
Amāni chu philchār rama,
muala,
khur anpūk le khur ankhuar ngāia ei anvāk titir u ani na.