Pathianin anāi
ngāi chūnngo athō
12
1 Hasika han sūmpui alianpa anga ana riatpui ngāiin ei na hual ving sika hin,
koini anān ōktit thei ārik tin le abei cheka koini taksa ākoptit āsia tin chu khāi u rei.
Hanūk chu na matona om rualsiak atān chu dūkdiar chunga tān u rei.
2 Koini nei iamna anasinpe le anānkhippe Isua tiang anhoi u rei.
Amatona alei om phāmna sika mualphui ansakna chu poisak luia krosa ei tiara Pathian chōmphāng chang tianga avānsuta.
3 Asik chu na malung ei chuaia ei anvuai nōkna ranga mi salui ngāiin Isua chunga let phonga āsia athō u lāia ei tiar zia ha mandon u ro.
4 Āsia chu nān duipui u nām nisela thisen suak khopa chu la duipui u mak chena.
5 Nāi anga na kōm u na lungharna chong ei na ril u ngāi ha nei mangil mo ani zei?
Asik chu hintin hin anziaka:
“Ka nāi pasal,
Pumān ei na
rakōkna hi poisak luia om
nō ro.
Hanūk chu chūnngo ei na
thōna hin na malung
manngūi nō ro.
6 Asik chu Pumān ei madit
chu amān ei rakōk ani na.
Hatuka anāi pasala ei pom
ngāi kēng amān ei zēm.”
(Hnc. 3:11,12 )
ti ani na.
7 Amān ei na rakōkna hin antak na tiar zām thei u ten,
mīn anāi chunga ei thō anga Pathian um na chunga ei na thō u ani na.
Asik chu hova nāi pasal mo apān ei rakōk nōk ei la om ngāi?
8 Tenchu nāi ngāi dōra hi ankōk alūt kiar ani na.
Pathian āta ankōkna na man u nōk ten,
kholāia nāi kēng na ni u zei,
thongkār nāi ni u lāi mak che.
9 Hava ngāi panga,
koini ngāi anāndik rang taksa lama pa nei dōn ani na,
lalchi nei thō ani na.
Tenchu hava nēka han koini na ratha ngāi Pa racham taka ni mak mo nei lēng riam rang?
10 Pa ngāi chu amānīn āsa ati na ei mandon u anga chomokhat bak ranga koini ngāi hi ei na rakōk chachak ani na.
Tenchu Pathian chu ama ei anthiangna nei chang theina ranga koini nei satna ranga ei na rakōk ani na.
11 Hanūk chu ankōkna dōra hi atuna hun len ranga ahui na pe mak,
dūkna kēng ei pēk,
tenchu nukhōna
chu hava ankōkna le chūnngona aman ngāi kōma phūkdāina mara,
dikna kēng ei masuak
ani na.
12 Hasika han akut alāng
thei lui ngāi na kut alāng u ro.
Amankhūk chak lui ngāi na mankhūk manchak u ro.
13 Hatuka ake khorin ake sir sōk ei cha nōka ei dam theina ranga,
“Na ke ngāi ranga lampui chu mandīn u ro.”
(Hnc. 4:26 )
Pathian apom
nōkna ruia anrēng u ro
14 Alom peia mi tin lehan anngoia om u tān anthiangna chu razūltit u ro.
Asik chu hava anthiangna buia tutēn Puma mu thei nō ni.
15 Pathian lungkhamna nāta tutē nei anpei u nōkna ranga asa dima en u ro.
Hanūk chu akhāna razung ei hong suaka ei na manbuai thei u nōkna ranga anrēng u ro.
Asik chu hava han mi tamtak chu ei mannim ani zeia.
16 Tutēn hurna tianga anmang mo ani,
ole Esau anga Pathian biakna dōn lui mo ani,
hava ang mi nei om thei u nōkna ranga anrēng u ro.
Esau chu phathi khat bak sāk sika nāi atontīr changna chu ei zuar diai ani na.
17 Nukhōna chu bōrsāng alua rang azōtām nisela ama chu pom lāi mak ti ha na riat u na.
Ama chu mit rathi zān chunga bōrsāng apūt sabaka ārokām nisela malung ansīrna rang hēr man lāi mak.
18 Nangni ngāi chu mual atōn āsa,
moiin ei kāng thei,
ahāng le azīngkhap hanūk chu phāivua hongna muna ni mak nei hong u hi.
19 Totorōt maring le chong rasa maring ei omna mun ani na,
hava chong rasa maring ariat mipui ngāiin chong atei rasa reng akōm u na ei riat u lāi nōkna ranga Mosi amathēm u na.
20 Asik chu “Sake manli ngalin
hava mual ha avatōn ten,
lung adēnga mo ole,
thal le akāpa mo nei that u rang,”
ati na chongpēk a om ha diar thei u mak.
21 Amānīn ei mu u neinun ha achālaka rathatāk a oma,
Mosīn:
“Ka rathāta raheia kan nōk
sabak zei,”
(Dān. 9:19 )
ei ti rak thei ani na.
22 Tenchu nangni Zion mual le Pathian adam khopui,
vān Jerusalema,
tel sua lui zāt vānpalāi rual ngāi kōma kēng nei hong u hi.
23 Rāisānnabit khōmpui le nāi atontīr ngāi raming anziakna kuibinga,
aloma mi dōra ruirilpu Pathian kōma,
anzui sua mi ādik ngāi ratha kōma kēng nei hong u hi.
24 Hanūk chu dān ankhit athara palāi achang Isua kōma,
le thisen anthekna,
hava thisen ha Abel athisen nēka chong āsa ual ahong arilpu kōma kēng nei hong u ani zei.
25 En u ro chong arilpu hi pom lui lama om ving u ta ni.
Asik chu phil chunga amāni ranga chong arilpu lua mana ei pom u nōk sika antakna nāta azōk u nōk ten,
anvān āta koini ranga chong ahong arilpu vāng chu nūksīr na son ten,
zōk pial nō mani.
26 Machin lāi han ahē lehan phil chu ahong anīka.
Atun chu amān chongatina:
“Hanūk voi khat anīk rēt ka ti,
phil rong ni lāi mak tenchu
anvān um anīk ka ti,”
(Hag. 2:6 )
ati na.
27 Hatuka “Hanūk voi khat anīk rēt ka ti,”
ti na chu neinun annīk lui ngāi chu ei om chian theina ranga,
hatuka annīk ngāi chu neinun ansin ngāi anga han ei ankhāi rang ti ei manriatna ani na.