1
1 Simon Peter,
Isua Krista suak le kuitīr hīn,
Koini na Pathian le Sandampu Isua Krista dikna zāra koini nei chang anga iamna alutak achang ngāi kōma kei maziak:
2 Pathian le koini na Puma Isua ruia riatna nei dōn u zāra lungkhamna le phūkdāina chu na kōm u na atam sabaka pung rase.
Pathian kuina le anthangna
3 Koini ana kuipu zāra han ama ei lianna le ei satna sika a Pathian thōtheina ranak lehan alom peia damna le Pathian biakna ruia ama nei riatna zāra alom peia nei nāng dōra ei na pēk ani na.
4 Hanūk chu hava lianna le satna zāra achongtin alu khīt le alian khīt chu koini ngāi ei na pēk,
hatuka hava ngāi lehan āsia ningōlna hi maniapūra om āsiat thei āta ankhāia a Pathian nīna ha vachangpui u ro.
5 Hasika han nei thei dōr pūt u tānla iamna bila satna manchel u tānla,
satna bila han riatna manchel u tānla,
6 Riatna bila han anrēng theina manchel u tānla,
anrēng theina bila han diar theina manchel u tānla,
diar theina bila han Pathian biakna manchel u tānla,
7 Pathian biakna bila han sūngsuakpui anditna manchel u tānla,
hatuka sūngsuakpui anditna bila han anditna tatak chu manchel u ro.
8 Asik chu hiva ngāi dōra hi na tak chung u na na dōn u na ansōntir anten,
koini na Puma Isua Krista riatna lama rāt luia le mara buia na siak u nō ni.
9 Tenchu tukareng hiva ngāi dōn lui mi chu ala mu thei lui le mit acho ani na.
Amān āsia ei thō amarua ngāi dōra ei mansāipe ha ei mangil kēng ani zei.
10 Hasika han ka unāi ngāi,
anpāi sua le anthang sua nei ni u ruia han atak ei ni ngētna ranga taksat riam u rei.
Hava ngāi dōra ha na thō zit u ten anpalna dōn thak u nō ta ni.
11 Hankēng havan tin han koini na Puma le Sandampu Isua Krista tāituan tāituan rama alūt theina chong na pe unti.
Pathian chong ruia
Peterin ei manriatna
12 Nangnīn hava ngāi rui ha aloma na riat zit u nām hanūk chu atuna na kōm u na chongtak a om han adettita anphun sua na ni u nām nisela hiva ngāi rui hi athara kei na manriat rēt u rang ani na.
13 Hiva ka taksa ina ka om sūng chu hiva rui hi na malunga anān riata kei na manhar chian u rang hi anānga ka riata.
14 Asik chu koini na Puma Isua Kristān hiva hi ka kōma ei hong manlang chu,
anrapa hiva ka taksa in hi kei māk rang anāng zei ati na.
15 Hatuka chu ka na māk sua u nām nisela hiva rui ngāi hi na malunga anān riat chian u ranga kei thei dōr na rang u na kei la pūt chian rang ani na.
16 Koini na Puma Isua Krista thōtheina le ei hong rētna rang ruia koinīn nei na ril hi mīn ei hianna lehan ei phua sim rachi papei ni mak,
tenchu koinīn na mit ngēta ama ei anlianna āmu ngāi na ni zei.
17 Asik chu Pa Pathian kōm āta lalchi le anlianna achang suana anlian anlal khīt kōm āta hintin hin ama kōma hē ahong atunga:
“Ama hi ka Nāi Pasal,
kei madit,
ama chunga hin
ka rāi ei sānna khīt ani,”
(Mt. 17:5 Mk. 9:7 Lk. 9:35 )
ati na.
18 Hava han mual ānthianga ama bila na om lāi han anvān āta hava hē ha koini kuar ngēta nei riat ani na.
19 Hatuka chu koinīn deari ngāi anga chong ril theina nei dōn ha adet riama nei riat ani na.
Hava chong lehan khua ahong avār māseng,
sikhovār chu na malung u na ahong ēl māseng,
azīng kāra ra-āngin ei ēl anga na malung na pēk tatak u ten nei thō u ha āsa ani zei.
20 Hatuka chu hiva chong hi mānsana chu riat u tānla,
Pathian Lekhabūna deari chong ril theina ngāi hi tutēn aning bārcha u na ei manvār thei om mak.
21 Asik chu tian lāia deari chong ril theina hi miring ei zōt anga ahong asuak ni pial mak.
Tenchu Ratha Ānthiangin mīnthiang ngāi ei maruai anga Pathian āta chong asuak ha mīnthiang ngāiin ei ril u ani na.