Ulian ngāi le thuithar ngāi
5
1 Nangni bila kuibing upa a om ngāi ranga kei mathēm ani na.
Koi um kuibing upa chang ngāi bila angkhat ka ni.
Kristān antak atiar lāi han koi hi ariatpui le nangkana ahong anlang rang anlianna achang rang ka ni na.
2 Na bil u na Pathian bera rual a om ngāi ha a bera enpu anga rung u ro.
Na thō ngāi ati na āthō ni mak,
tenchu nang nei zōt le Pathian malung do ang taka rungtit u ro.
Huat anhama sum alō ranga āthō ni mak,
tenchu malung tataka azōt chunga thō u ro.
3 Na kōm u na anbetōka a om sua ngāi chunga anlal rang ni mak,
tenchu bera rual ngāi ranga enrua sin thō u ro.
4 Hatuka chu Bera Enpu Ulian taka ahong anlang tika chu chuai ngāi lui anlianna rēng lukhum chu man un na ti.
5 Havan tin dēn han nangni thuithar ngāi um ulian ngāi racham taka om u ro.
Ani,
na lom u na racham mun khata antela nei om thei u na ranga om dān annuai lehan anliang u ro.
Asik chu:
“Om alian athō ngāi chu
Pathianin ei dui kēng,
Tenchu om annuai athō ngāi
kōma chu lungkhamna
apēka”
(Hnc. 3:34 )
6 Hasika han Pathian kut arāt thuaia han annuaia om u ro,
amān ahun taka ei na dom thei u na ranga.
7 Nei andon u na ngāi dōra chu aloma ama chunga betōk zit u ro,
asik chu amān na rang u na ana mandon pe u.
8 Anrēng u tānla ameng chiana om u ro.
Asik chu na rāldui u diabol chu sīng anrām anga angkhat pei asāk rang anroka āchei titir kēng.
9 Iamnana adettita om u tān ama chu dui u ro,
asik chu maniapūr pumpuia na unāi u ngāi ha hantina antakna dēn ha ei hong tiar u kēng ti na riat u na.
10 Lungkhamna tin rēng Pathian,
tāituan anlianna ana pēk ranga Krista Isua zāra ei na pāi u ani na.
Ama ngēt hān hun alakte ranga antakna na tiar sua u le amān na manzui unti.
Adettita andinga arāta na siak unti,
angīrttita na phun unti.
11 Ama kōma anlianna le thōtheina chu umor tāituana om chian rase.
Amen.
Anthānna chibai
12 Aiamruana kei be, na
unāi u Sila kuta hin hiva lekha
hi ābongtena nangni ngāi lungngamna ana pēk u ranga kei maziak ani na.
Hiva hi Pathian alungkhamna tatak ani ti anariatpui u ranga kei maziak ani na.
Hiva lehin adettita anding u tān om u ro.
13 Babulon khuana om,
nangni ngāi anga anruala nei anthangpui u hīn chibai ana thō u.
Hantin dēn ka nāi pasal Markān chibai ana hong thō u.
14 Anphāmna biang antumna lehan chibai anthō u ro.
Krista Isuana a om nangni ngāi dōra chunga phūkdāina om rase.
Amen.