Pathian ranga nunchang
4
1 Krista chu ataksana antak ei tiar sika han nangnīm havan tin ang malung chōi u tān ansin chip u ro,
asik chu tukareng taksana antak atiar tak chu āsia nāta ankhāi ani na.
2 Hasik han ama chu hi ei damna ataksa ala om a hi āsia lama miring ningōlna tianga anmang lāi luia tenchu Pathian malung vong ang ei anmang theina ranga ani na.
3 Koini na nūk sūl tāng nei hong mang sua ngal hi ahun kēng ani zei.
Asik chu nam atei ngāi anga hurna,
taksa ningōlna,
anrīna,
rahāi ansakna,
zu bual sāk sum le antīrrua ramīl anmōkna ngāi tianga nei pan u ha ātam kēng ani zei.
4 Hatuka chu amāni bila han hūihōk ansaknana nei anliai u lāi nōk sika han aboi adonga na chung u na siat ei na ril u chachak ani na.
5 Tenchu āring le āthi ngāi rui aril ranga ansina a ompu kōma ahisāp u ngāi chu la pēk chip unti.
6 Hiva sik tak hin athi ngāi kōma thang ahui ei anril ani na,
achung u na taksana miring anga ruirilnana ei om thei u na rang,
rathāna Pathian ei zōt anga adama ei om thei u na ranga thang ahui chong ei anril ani na.
7 Tenchu alom peia ei hekna rang chu ahong anāi zei.
Hasika han malung anthianga bōr zong u ro,
hanūk chu anrēng chunga om u ro.
8 Hava ngāi panga han malung taktaka anditna dōn u ro.
Asik chu:
“Anditnān masial ātampa hi ei mahīp thei kēng,”
(Hnc. 10:12 )
ti hi ani na.
9 Anditna lehan bāiankham luia khual antung u chachak ro.
10 Mi tinin Pathian lungkham pēk ngāi ei man ang chipa han Pathian āta lungkham pēk āsa tin rēng adōnpu ang han mi tin satna ranga mang u chachak ro.
11 Tu mo angkhat peiin chong aril anten ama chu Pathian chong aril anga ril rase.
Hanūk chu tu mo angkhat peiin hasōndomna sin athō ten Pathianin rātna ei pēk anga haso adom rase.
Han tin han kong tin rēng Isua Kristana Pathian chu anpāka ei om theina ranga.
Anlianna le thōtheina chu tāituan tāituana ama kōma om rase.
Amen.
Kristian sika antak tiarna
12 Ka lōm andit ngāi,
nangni ngāi ansinna ranga ana sabak ansinna nei tiar u hi atei bīk kēng ati na boi mandong u nō ro.
13 Tenchu Krista antakna bila antak nei tiar u anga rāi mansān u ro,
asik chu ama ei anlianna ahong anlang tika rāisānna lian sabaka rāi nei mansān thei u na ranga.
14 Krista raming sika mīn māimōk ana sak u ten ravān āsa na ni u zei,
havan tin han na om u ten anlianna Ratha,
Pathian Ratha ha na chung u na om inti.
Ama chu mi ranga mualphui ansakna,
tenchu nangni ranga anlianna ani na.
15 Nangnīn antakna nei tiar u hi mi that sika mo,
anru sika mo,
masial thō sika mo,
mi ruia akop titir sika mo chang nō rase.
16 Tenchu tukareng Kristian ei chang sika antakna atiar ten anzakna nei nō sela,
tenchu ama raming ei raput sika Pathian manpāk rase.
17 Ruiril anphutna rang hun ahong suak zeia,
hava ha Pathian sūngkua mi ngāi āta anril bak inti.
Hava ha koini nāta ei anphut rang aniten,
Pathian Thang ahui aiam nōk ngāi ei hekna rang vāng chu hontin mo ei ni rang tāk?
18 Pathian Lekhabūna ei ti:
“Mi dik ngāi zōkna rang lua
mana antak anten,
Pathian tel lui le mi salui ngāi
dingmun vāng chu imo
chang ni?”
(Hnc. 11:31 )
19 Hasika han Pathian ei zōt anga antak atiar ngāi chu sin āsa thō chunga aiamrua Asinpu kuta ei damna anbetōk u rase.