Nupui param dingmun
3
1 Havan tin han nangni inanei sua nupang ngāi,
na pasal u ngāi racham chipa om u ro,
senkhat chu Pathian chong aiam nōk ani u theia.
2 Hanum nisela amāni anunchang u ei mu u han Pathian chong anchel luia anungāk u ngāi nunchang lehan antorsa rēt thei unti.
3 Nei anliang u ngāi ha apang tiang lima sam aphiartete ngāi le rāngkachak raka anli le puan āsa ngāi le ānliang duai hi nei anliang u na ni nō rase.
4 Tenchu Pathian mit muna alu khīt anrua thei lui raliang anga malung phūkdāina le a om adāi neinun na sūng u na anthupa om raliang lehan manliang u ro.
5 Asik chu tian lāia nupang ānthiang ngāi,
Pathian chunga angngamna adōn ngāi ha han tin han aruathar u ngāi racham chipa ei om a ei anliang u chachak ani na.
6 Havan tin han Sari chu Abraham aracham azīna ama rang ha ka puma ati na ei apāia ani na.
Atun um nisela anchina buia na om u ten,
ama nāi nupang ngāi kēng nei chang ani u zei.
7 Havan tin dēn han,
nangni inanei sua pasal ngāi,
na nungāk u ngāi chip lehin asing avāra ompui u ro,
asik chu na bōr zong u ngāia anakhār ei buina ranga amāni chu nangni ngāi nēka hin aduia ual kēng ati na rēng u ro.
Asik chu amāni hīm nangni lehan damna bōrsāng aluapui kēng na ni u.
Om āsa thō sika antakna atiar
8 Nukhōn khīta chu hiva hi ani na,
na lom u na malung anruala om u ro.
Lung anpōngna dōn u tānla unāi anga andit u ro.
Malung anzīk taka om u tānla mi le anmīl thei u ro.
9 Āsia chu āsia lehan ratha thuan u nō ro,
māimōkna chu māimōk dēn lehan ratha thuan u nō tānla ha nēk ten bōrsāng pe viak u ro.
Asik chu bōrsāng alua ranga anpāi kēng na ni u ti ha na riat
u na.
10 “Tukareng damna andit zōt
le nikhua hui amu nuam
tak chu chong āsia rilna
nāta amalei chu rung rase.
Hanūk chu anhuangna chong
aril āta amūr chu khār rase.
11 Āsia nāta ankhāia sin āsa
chu thō rase,
Anngoina aroka ravān rase.
12 Asik chu Puma mit
chu mi dik ngāi tianga
ei manhoi hanūk chu
abōr zong u na anngāi
ranga akuar um ei dō,
Tenchu Pumān āsia thō ngāi
ranga chu nūksīr ason,”
(Sām 34:12 -16 )
ti ha ani na.
13 Sin āsa thō ranga nānsin chakin tu mo anān siat u rang?
14 Tenchu satna sika antak na tiar u ten bōrsāng tung u na ti.
“Tutēn ei na maphut u sika na ratha manta u nō ro.
Na malung um manbuai u nō ro.”
(Isa. 8:12 )
15 Tenchu na malungrīl u na Pathian chu Puma ati na anthianga tel u ro.
Tukarengin na malung u na nei sabei u na asik anān kel u tak nei masang chip thei u na ranga ansina om babang u ro.
Tenchu om annuai le lalchī dōn chunga masang u ro.
16 Hanūk chu siat le sa riatna diktak dōn u tānla na chung u na chong āsia aril ngāi mualphui ei ansak thei
u na ranga,
hanūk Kristana nunchang āsa nei dōn u siat ana ril ngāi mualphui ei ansak thei u na ranga ansin chip u ro.
17 Om āsia thō sika antak na tiar nēk ten,
Pathian ei zōt aniten om āsa nei thō u sika antak nei tiar u chu na ranga āsa ual ani na.
18 Asik chu Pathian tianga ei na ruai thei u na ranga Krista chu āsia thō ngāi sika voikhat kēng antakna ei tiar.
Mi dik hīn mi salui ngāi rathūla voikhat antak ei tiar ani na.
Taksa tianga chu āthi sua ani na,
tenchu ratha tianga chu ahong adam rēt ani na.
19 Hatuka hava ratha ngēt lehan ankhuma om ratha ngāi kōma chong avarila.
20 Hava ngāi ha tian lāia,
Nova huna rakuang atuk lāia Pathianin adiar zāma ei ngāk hē tel lui ngāi ha ani u na.
Hava rakuang han miring alakte,
aloma ariat bak tī nāta azōka ei om u ani na.
21 Hatuka chu hiva tīlian sānga baptisma hīn Isua Krista ei anthui rētna zāra atuna sandama nei om u ha ei ankhīna angkhata ei hong mang ani na.
Hiva baptisma hi na taksana akhel ei mansāi ni mak,
tenchu siat le sa riatna anthiang taka Pathian nei ravānna ranga ankhīna ani na.
22 Ama chu anvāna asēna,
Pathian chang tianga ansuta,
vānpalāi ngāi,
ningneina ngāi le thōtheina ngāi dōra chu ama rachama ei om ani na.