2
1 Hasika han na kōm u nāta alom peia anmumākna dōra le anhuang anphilna dōra le phuazekām om athō,
manar āsia le mi siat rilna dōra ha māk zit u ro.
2 Nāite anzir thar anga ratha ranuti ansīm vang chu anēk ranga ningōl u ro.
Hava lehan na rang u na ansōnna man un na ti.
3 Asik chu Puma chu āsing kēng ati na atem sua kēng na ni u zei hale.
Lungpui ādam
le ei athang ngāi
4 Krista chu miring makunga anhenga anpei sua,
tenchu Pathian makunga chu anthang le alu khīt Krista lungpui adam kōma apan kēng na ni u.
5 Nangnīm nisela lungpui adam ngāi anga han ratha in chu nei manding u na chāizūng ānthiang achanga Isua Krista zāra Pathianin ei pom rua,
ratha lama anbōlna dāli ha dar thei un na ti.
6 Hasika han Pathian Lekhabūna hiva chong hi anziaka:
“En u ro,
Ziona lung khat ka
phuna,
Hava ha akila lung anthang le
alu khīt ani.
Tukareng ama aiam tak chu
mualphui ansak pial nō ni,”
(Isa. 28:16 )
ati na.
7 Hasika han nangni aiam ngāi ranga chu hava lung ha alu khīt ani na,
tenchu aiam nōk ngāi ranga chu:
“In asin ngāiin lung ei heng u
ha in kila lungpui ahong
achanga,”
(Sām 118:22 )
a ti na.
8 Hankēng,
“Hava lung ha mi ngāi ranga
anbana asik ahong achanga,
Hanūk chu hava lungpui ha ei
chul u na achanga,”
(Isa. 8:14 )
ati na.
Asik chu hē ei tel u nōk sika han chonga ei anpal u ani na.
Havan tin han ei ni u rang ngala Pathianin ei mansūk kēng.
9 Tenchu nangni ngāi hi nam anthang,
rēng sūngkuana chāizūng,
nam ānthiang,
le Pathian ta ranga mipui ngāi na ni u.
Ama anliana ei anpāk theina ngāi anlang ranga azīng āta tichang abui thaka ama ra-ānga anān lūt ranga ankui kēng na ni u.
10 Tian lāi han Pathianin ei pom mi ni u mak chena,
atun chu Pathian ta ranga mi kēng na ni u zei.
Tian lai han riangvāina man u mak chena,
atun chu riangvāina amansua kēng na ni u zei.
11 Ka lōm madit ngāi,
maniapūra khuala mi le ram ateia mi nei ni u sika kei na mathēm u ani zei,
na ratha u le andui chachak taksa ningōlna ngāi dōra nāta ankhāi ro.
12 Nam atei ngāi kāra nei lēng u ha sin āsa thō ranga asa dima anrēng u ro.
Āsia thō kēng ati na mīn āsiat ana ril ngal u nām nisela na om āsa u ei mu u na ruiril nikhua tika Pathian chu ei manpāk thei u na rang.
Ruirilpu ngāi le apuma
ngāi rachama om dān
13 Puma sika han miringin ei phun ningneina tin rēng adōn ngāi racham taka om u ro.
Alom pei chunga ālian khīt ei ni sika Rēng aracham taka om u ro.
14 Hanūk chu āsia thō ngāi ansinsak rang le āsa thō ngāi anpāk ranga Rēngin ei tīr ram oppu ngāi rachama om u ro.
15 Asik chu Pathian malung vong chu hiva hi ani na- om āsa thō lehan riatna buia āmo ngāi chong ril hi nei manmong u rang hi ani.
16 Azōka a om kēng na ni zei ati na nei zōk u na ha āsia neinun athupna ranga mang u nō ro.
Tenchu Pathian suak kēng na ni u ti hi re u ro.
17 Lalchi nei thōna mi tin kōma manlang ro.
Aiam unāi ngāi adit u ro.
Pathian achi u tānla,
Rēng chu lalchi thō u ro.
18 Mi ina suak anlō ngāi,
alom peia lalchi lehan na puma u ngāi rachama om u ro.
Puma āsa le āsing ngāi kōm rong ni mak,
tenchu apuma anrum ngāi rachamām om u ro.
19 Asik chu tukareng Pathian ranga riatna ei dōn sika mīn dik lui taka antak ana mantēnga dūk adiar zām thei ten hava ha aranga Pathian kōma anpomna kēng.
20 Āsia nei thō sika mīn na bēn u sela,
na rang u na imo nei man u rang?
Tenchu āsa nei thō u sika dūk adiar chunga antak na tiar zām thei u ten,
hava ha na rang u na Pathian kōma anpomna ani na.
21 Asik chu hava rang piala anpāi kēng na ni u hale.
Asik chu Kristān na rang u na antak ei tiarna lehan ama ke nūk nei zī thei u na ranga,
na rang u na enrua khat ei na māk pe u.
22 Asik chu:
“Ama chu itē āsia thō mak,
Amūra anhuangna chong itē
om mak.”
(Isa. 53:9 )
23 Mīn mani ēro athō u lāi han mani ēro dēn le thuan mak,
antakna atiar lāi han rathatāk thōna manlang mak.
Tenchu adik taka rui arilpu Pathian kuta ama achang rang chu anbetōka.
24 Āsia thō ruia chu athī nei ni rang,
tenchu dikna ruia chu adama nei om theina ranga ama chu aninga taksa ngēt lehan thing kros chunga āsia nei thōna ngāi dōra ei na pēl pe kiar ani na.
Ama ei popna ngāi ngēt lehan nangni ngāi chu adam sua na ni u zei.
25 Asik chu bera anga lampui anvāi kēng na ni u zei,
tenchu atun hin chu na ratha u a Enpu le Achōmpu kōma ahong akīr kēng na ni u zei.