Mīnchū arothol ngāi le
achung u na ruirilna
2
1 Tenchu tiana mipui ngāi kāra deari rothol ngāi ei suak u anga han nangni na kār u nām mīnchū rothol ngāi chu hong suak unti.
Hava ngāi hān maruka anānsiat thei anchūna dik lui hong chōi unti,
hanūk chu amāni anratanpu Puma ngēt um nisela ei māk phat u sika han anrapa achung u na siatna tung inti.
2 Hatuka chu mi tamtakin amāni nunchang salui lampui chu zī untia,
amāni sika mi tamtakin chongtak ruia ril siat unti.
3 Huat ei anham u sika hava mīnchū rothol ngāi ha phuachop chong rachi papei amanga na kōm u nāta sum manna hong thō unti.
Tenchu machina āsia thō ei anlō u na rui anril chu ansiak chian ala ni,
amāni ei anpei u na ranga ruiril chu akorong chang nō ni.
4 Āsia thō vānpalāi ngāi lua Pathianin mazōk mak.
Hatuka ruirilna āngāk ranga āzīng khur anthūka ankhita ei siak ani na.
5 Pathianin tian lāi ramual ha,
Pathian tel lui ngāi omna ramual chunga tī ahong manlian lāi han mazōk mak,
tenchu Nova,
dikna tāng anhāipu chu atei mi sari ngāi lehan amazōka.
6 Sodom le Gomora khopui ngāi ha āsia amanlōna ahāla ravut ei amanchang bianga ei sinsak ani na.
Hava ha Pathian tel lui ngāi chunga ala honga tung ranga aenrua ei manchang ani na.
7 Hanūk rēt chu Pathianin Lot,
mi diktak ha amazōka.
Ama chu anuam le aninga om hur achāng ngāi sika malung akānga om ani na.
8 Asik chu hava mi diktak ha amāni bila a om lāi han dān adik nōk om āsia ei thō u ha amitin ei mu le akuarin ei riat sika nikhuan tina amalung anthiang chu ei na pēk chachak ani na.
9 Havan tin han Pathian atel ngāi chu ansinna nāta amazōk thei,
hanūk chu adik nōk ngāi chu ruiril nikhua ten peia ansinsak ranga ei siak chian thei ti hi Pumān ariata.
10 Hanūk chu taksa āsia ei thō zōt anga antīrrua āsia ningōlna tianga anmang le ningneina dōn tel lui ngāi chu ataktaka ansinsakna ei la tiarngēt u rang ani na.
Hava mīnchū rothol ngāi ha ani zei malung anrum le azōt aninga a om ngāi ani u na.
Hava ngāi hān chungvāna anlian ngāi chunga siat aril um achi u mak.
11 Hava mīnchū rothol ngāi nēka arāt le thōtheina adōn ual vānpalāi ngāi lua mana chungvāna anlian ngāi chunga āsiat rilna ranga chong āsia Puma makunga chōi ngam u lui ani na.
12 Hava ngāi ha ei riat u nōk ha kēng āsiat ei ril u.
Hava mi ngāi chu sake manli mīn ei thunga ei that rang duaia andōn itē riatna dōn lui ramsa ang ani u na.
Amāni chu hava ramsa ngāi anga āsia ei thō u na lehan anpei phat unti.
13 Hava ngāi ha adik nōk ei thō u sika hava adik nōk mara dēn ha lō unti.
Sūn avāra zūnri mēnhāia om hi kēng rāisānna ei be u ani na.
Hava mi ngāi ha atak chung u na annim le ademrua manu dōn ani u na.
Hava ngāi ha na kār u na nēk sāk ei hong thō u hin anhuangna tianga ei na ruai u chachak.
14 Uire thōna lampui kēng ei thūn u,
hanūk chu āsia thō ranga bāng pial u lui ani u na.
Havan tin han malung azāng ngāi chu ei manchāng u na,
asūngrīl u huat anhamna lehan ābit ani na.
Hava ngāi chu Pathian khomāk tungna rang sanāi ani u na.
15 Hava ngāi ha lampui anzīk amāka lampui ateia adik nōk le uama anditpu Beor anāi pasal Balaam alampui azī ani u zei.
16 Tenchu a om thō masial sika han sake manli chong thei lui sakuarpar khat amanga angōna.
Hava sake manli hān miring chong anga achonga ha deari ei mona ha ei khār pe ani na.
17 Hava mi ngāi ha tīnār ākang le thīnthīn ei chōi ansūm atān ang ani u na.
Hava ngāi ranga azīng raheia behāng muna tāituana ranga ansiaka om ani na.
18 Hava ngāi ha akoronga chongpāk ansala chong alianpa ngāi ei ril u na taksa ningōlna le sake manli anga hurna adōn ngāi lehan lam dik apana azōk sua ngāi ha ei mathēm u ani na.
19 Hava ngāi ha aninga siatna suaka ei anpēk u,
tenchu zōkna apēk thei ranga mi kōma chong ei tin u chachak.
Tenchu nang ana zuipu kōm ngēta kēng suak achanga nei om rang ani na.
20 Koini na Puma le Sandampu Isua Krista riatna sika maniapūr annim annok āta azōk sua u na athara hava han dēn anpola ankhit rēt u ten māna ading mun u nēka nukhōna ading mun u chu aliaktena ei siat rang ani na.
21 Hanuk chu dikna lampui ariat sua u na chongpēk ānthiang akōm u na anpēk sua ha nūksīr ason rēt u ten amānīn ei riat pial u nōk ha arang u na sa ual inti.
22 Hiva chongsual tak hi amāni ngāi chunga ei hong kipna:
“Ui chu amaluak tiang
kēng ei kīr rēt,
Vok um tīnbual sua chu
dialpok dēna kēng ei
anbual rēt,”
(Hnc. 26:11 )
ti hi adik ani na.