Pathian Nāi Pasal aiam
5
1 Tukareng Isua hi Krista ani ati na aiam tak chu Pathian āta anzir kēng.
Hanūk chu tukareng apa andit tak chu anāi um andit ani na.
2 Hatuka chu koinīn Pathian na dita hanūk chu achongpēk ngāi dōra na tel tikle Pathian nāi ngāi um nei madit ani ti na riat theia.
3 Achongpēk ngāi nei tel hi Pathian anditna ani zei.
Hanūk chu ama achongpēk ngāi hi ārik ni mak.
4 Hatuka Pathian āta anpiang tak pei chu maniapūr azui kēng ani zei.
Hanūk chu koini nei iamna hi maniapūr azui ani zei.
5 Hanle tu mo maniapūr hi azui thei?
Tukareng Isua hi Pathian nāi Pasal ani ati na aiam tak ha ni mak mo azui thei?
6 Hiva Isua Krista hi ani tī le thisen āta ahong chu.
Tī nāta duai ni mak,
tenchu tī le thisen āta kēng ei hong.
Hatuka Ratha hān arui ei hong manriat ani na,
asik chu Ratha chu atak ani na.
7 Hanūk chu ama arui ariatpui vānrama anthum a om u na.
Hava ngāi ha:
Pa,
Chong le Ratha Ānthiang ani u na.
Hatuka hiva anthum ngāi hi munkhat ani u na.
8 Hanūk chu ama ruia ariatpui ramuala anthum a om u na,
hava ngāi ha:
Ratha,
tī le thisen ani u na.
Hatuka hava anthum ngāi ha munkhat ani u na.
9 Koinīn miring riatpuina nei pom ani na,
hanum nisela Pathian riatpuina chu hava nēka alian ani na.
Asik chu Pathianin hava ngāi ruia ei hong manriatna ha anāi pasal ruia ei hong manriatna len ani zei.
10 Tukareng Pathian Nāi Pasal aiam tak chu akōma hava anriatpuina ādōn ani zei.
Hatuka chu Pathian aiam nōk tak chu Pathian milak atheia ei manlō kēng ani zei.
Asik chu Pathianin anāi pasal ruia ei manriatna ha amān ei iam nōk sika ani na.
11 Hatuka chu hava riatpuina ha hiva hi ani na:
Pathianin koini na ranga tāituan damna ei na hong pēk,
hava damna ha anāi pasal kōma a om ani na.
12 Tukareng Nāi Pasal aman tak chu hava damna ha aman ani zei,
tenchu Pathian Nāi Pasal aman nōk tak chu hava damna ha man mak.
Chongbe heknas
13 Nangni Pathian Nāi Pasal raminga aiam ngāi ranga hiva ngāi hi kei maziak.
Asik chu tāituan damna na man sua u zei ti nei riat thei u na rang le Pathian Nāi Pasal raminga nei iam thei u na ranga.
14 Koinīn ama kōma
hiva anngamna hi nei man ani na,
ama malung vong angtaka nei zong tak chu amān ana lei rangāi pena.
15 Hanūk chu akōma koinīn nei zongna ana lei rangāi pe ati na na riat ten,
akōma bōr azonga nei zong tak chu nei man kēng ati nām nei riat ani na.
16 Mi tu khatin mo aparual athīna rang khop ni lui āsia thō amu ten bōr zong pe rase,
hatuka Pathianin ama chu damna pēk inti.
Hava damna ha thīna rang khop āsia thō lui ngāi rang kēng.
Hanūk chu thīna rang khopa āsia thō khat a om a,
hava ranga chu bōr zong pe rase ti makung.
17 Diknōkna tin reng hi āsia ani na,
tenchu thīna rang khopa ni lui āsia angkhat a om a.
18 Tukareng Pathian āta anpiang chu āsia thō chian lāi mak ati na nei riat ani na.
Hatuka Pathian āta anpiang mi chu aninga anrungtit theia a om,
hanūk chu soitānin um tōn thei lāi lui ani na.
19 Hatuka chu koini hi Pathian nāi kēng na ni ti hi nei riat ani na,
hanūk chu maniapūr pumpui hi soitān kut chunga a om ani na.
20 Pathian Nāi Pasal chu ei honga koini ngāi kōma chongtak riatna ei na hong pēk ti hīm na riata.
Ama chu chongtak ani na,
hava ha ama Nāi Pasal Isua Kristana om na ni.
Ama hi Pathian tatak le tāituan damna ani na.
21 Nāi ngāi,
ramīl anmōk āta hin anrung u ro.
Amen.