3
1 En u ta,
Pain ei na ditna ituk mo ei lian zia,
Pathian nāi ngāi nei anti thei hi!
Hava ha nei ni lele ani na.
Hasik han maniapūrin koini na riat mak.
Asik chu amānīn riat u mak.
2 Kei madit ngāi,
atun hin Pathian nāi kēng na ni zei,
nangkana imo nei la ni rang Pathianin la man lang mak.
Tenchu ama ahong anlang tika koinīm ama ei ni anga ni inti ti hi nei riat ani na.
Asik chu ama ei ni anga ama chu mu inti.
3 Tukareng ama chunga hivan tina ansabeina adōn tak chu ama ei anthiang anga anthianga om rase.
4 Tukareng om āsia thō tak chu dān atel nōk ani na.
Asik chu om āsia thō hi dān tel luina ani na.
5 Koinīn āsia nei thō ngāi tin ana chōi pe ranga Pathianin ama chu ei hong manlang ti hi nei riat u ani na.
Hatuka chu ama chunga āsia reng om mak.
6 Tukareng ama kōma a om tak chu āsia thō ngāi mak.
Hatuka tukareng āsia thō chu ama mu ngāi mak,
ariat um riat ngāi mak.
7 Nāi ngāi,
tutēn lam anvāina tianga na ruai u nō rase.
Krista mi dik ei ni anga adik athō tak chu mi dik ani na.
8 Tukareng āsia thō tak chu diabol ami kēng.
Asik chu aphut āta diabol chu āsia ahong athō kēng.
Hanūk chu diabol asin thō dōra apei ranga Pathian Nāi Pasal chu ei hong anlang ani na.
9 Pathian āta anpiang chu āsia thō ngāi mak.
Asik chu Pathian ru ha atak chunga anron ani na.
Hatuka chu Pathian āta anpiang ei ni sika āsia reng thō pial thei lāi mak.
10 Hivan tin hin hova mo Pathian nāi ngāi hanūk chu hova mo diabol nāi ngāi ti ei hong anlang theina ani na:
tukareng ādik thō lui le aparual madit lui chu Pathian nāi ni mak.
Andit anlōm u ro
11 Asik chu aphut āta chong anril nei riat u ha hiva hi ani:
koini le koini ngāi nei andit rang hi ani na.
12 Kain ha soitān āta asuak ani na hanūk chu anāipa athat ani na.
Ama anga om u nō rei.
Ichanga mo anāipa ha ei that?
Asik chu asin thō ngāi ha āsia ani na tenchu anāipa asin thō ngāi ha ādik ani na.
13 Ka unāi ngāi,
maniapūrin ana mumāk u le na boi mandong u nō ro.
14 Koini hi thīna nāta damnana ankān sua kēng na ni zei,
hava ha koini na unāi ngāi chunga anditna nei dōn sika nei riat ani na.
Tukareng aparual madit lui chu thīnana a om kēng ala ni.
15 Tukareng aparual anmumāk tak chu mi that kēng.
Hatuka chu mi that kōma tāituan damna reng om ngāi mak ti ha nei riat u ani na.
16 Isua Krista koini ngāi ranga ei damna ei hong phal diai sika amān ei na ditna chu nei hong riat thei ani na.
Hasik han koini ngāi um unāi ranga na damna aphal diai hi ei nāng ani na.
17 Tenchu angkhat peiin hi maniapūra neinung dōn sela hatuka chu aparual angkhat pei hi ābuia amu nām nisela amalung amanpōng nōk ten hontin mo Pathian anditna akōm ei om rang?
18 Ka nāi ngāi,
chong le mūr duai ni luia tenchu sin le ataka andit anlōm u rei.
19 Havan tin han koini hi chongtak tianga mi ati na anriat thei inti.
Hanūk chu amakunga na malung phūkdāi riama siak thei inti.
20 Na malungin āsia ana manlō ngalām Pathian chu koini malung nēka ālian kēng,
hanūk chu amān aloma ariat zita.
21 Kei madit ngāi,
koini na malungin āsia ana manlō nōk ten Pathian makunga anngamna nei man ani na.
22 Hanūk chu nei zongtak pei ama kōm āta nei man.
Asik chu achong pēk ngāi dōra nei zī hanūk chu amit mu na ama ei zōt zāt kēng nei thō ani na.
23 Hatuka chu achongpēk chu hiva hi ani:
koinīn anāi Pasal Isua Krista raminga nei iamna rang le achongpēk anga koini le koini ngāi nei andit anlōm rang hi ani na.
24 Ama achongpēk āzī tak chu amana a om kēng ani zei.
Hanūk chu amām ama kōma a om kēng ani zei.
Havan tin han amān koini kōma ei na pēk Ratha lehan ama chu koini na malung sūnga a om ati na nei hong riat thei ani na.