Paul le kuitīr rothol ngāi
11
1 Alakte anga kei mona le kei riat nōkna hi ana diarpui u ranga kei na mathēm zōt u,
ataktaka nangnīn nei na diarpui ani na.
2 Pathian manarna lehin kei na manar u ani na.
Asik chu nangni hi nungākte ānthiang anga pasal khat,
hava pasal ha Krista ani na.
Ama kōma inneina ranga chong kei khāp suana ka lei dōn ani na.
3 Tenchu marūl ei ancharna lehan Evi ei huang anga han nangni ngāi lam Krista ranga nei anzīk u na nāta na malung u ei siat rang hi ka ratha ei ta ani na.
4 Asik chu mi senkhat na kōm u na honga koinīn nei hong ril nōk Isua atei khat rēt,
hanūk chu nangnīn nei man u nōk ratha atei,
hanūk chu nangnīn nei pom u nōk thang ahui atei aril hong u le na lei pom u rang hi ka ratha ta nō ni mo?
5 Tenchu hava kuitīr ulian anti ngāi bila alakte ngala asīna anbe makung.
6 Chong aril chu thei luia ka om thei,
tenchu riatna lama chu hianna adōn ka ni.
Hava ngāi ha chu alom peia kongtin rēnga na kōm u na anthiang vanga nei manlang ani na.
7 Man abuia nangni kōma Pathian thang ahui kei na ril u hin nangni ansānga nei om thei u na ranga,
ka ninga annuaia kei om hi āsia thō mo kei chang?
8 Nangni na haso le na dorbo u kei dom theina ranga kuibing atetei ngāi kōma anzonna ranga sum kei lāka kei manthām u ani na.
9 Nangni ngāi bila ka om lāi han kan sam ām nisela nangni ranga tutē kōma puakrik chang makung.
Asik chu Makedonia ram āta unāi ngāi ahong u na kei ansamna ana hong zon u.
Hantin han nangni na puak arik kei chang nōkna ranga rui tin peia kei anrung ani na,
kei anrung chian rang um ani na.
10 Ka tak chunga Krista chongtak ei om sika araming asāl chunga kei ti ani zei,
Akaia rama tutēn hiva kei anlianpuina ngāi hi ana khār thei rang om mak.
11 Hava ha imo asik?
Nangni ngāi kei na dit u nōk ti na mo?
Kei na dit u na hi Pathianin ariat.
12 Hanūk chu koini ding mun anānrualpuina a ena anlianna athō ngāi nei pei theina ranga kei thō rang chu kei la thō tir rang ani na.
13 Hava anga miring ngāi chu kuitīr rothol,
mi huangna sin athō ngāi le Krista kuitīr mēl anga arothol anput ngāi ani u na.
14 Asik chu soitān ama aning lena ra-āng vānpalāi mēl rothol ei raput hi boidongna rang itē om mak.
15 Hasik ha ama dorbōndom ngāiin ādik dorbōndom mēl aphua zek ngal ām nisela boidongna rang itē om mak.
Amāni ei hek u na rang chu asin thō u anga ei ni rang.
Paul ama ei antakna
ngāi anlianpui
16 Kei ti rēt rang ani zei,
tutēn koi hi molma anga na be nō rase.
Tenchu nangnīn na na be u ten,
āmo anga na pom u ro.
Hankēng koi um ni rase atōmtena kei anlian theina rang.
17 Ka ninga anngam sabaka anlianna chong kei ril hi Puma chong anga chu ni mak,
tenchu āmo anga kei ril ani na.
18 Miring tamtakin taksa lama anlianna athō u ten koi um thō ka ti.
19 Nangnīn na theia āhian nei anti u sika āmo ngāi chungām rāisān hiaia nei diar u ani na.
20 Nangni chu mīn suak ranga anakhit u nām,
ana sāk u nām,
mīn ana pot u nām,
mīn na nēka anlian rang azōtām,
na māikhang ana bēn u nām,
nisela nei diar papei u ani na.
21 Havan tin han aniten,
amāni ngāi nēka koini ngāi chu rāt lui nei ni sika anzakna ka riat.
Hava ruia mi tei angkhat peiin borāi athō ngam ten,
koi um borāi ka thō ngam.
Āmo anga ngal chong kei ril chang ta rase.
22 Amāni ha Hebrai mi mo ani u?
Koi um ka ni.
Amāni ha Israel mi mo ani u?
Koi um ka ni.
Amāni ha Abraham achi mo ani u?
Koi um ka ni.
23 Amāni ha Krista hasōndom mo ani u?
Malung ansam chong ril anga kei ril ngal chang ta rase,
koi vāng chu amāni nēka ātama antakna sin athō ka ni.
Voi ituk mo lung ina ankhuma kei om,
voi ituk mo rāimol ana kei sāk ani na,
voi tamtak ana that ranga ei na pūt u ani na.
24 Jihudi ngāi kōm āta khēp rangā pei,
voi khat dak ansam voi sōmmanli pei nganu ramoi le ana zēm u na.
25 Voi anthum sunrol le ana zēm u na,
voi khat ana that ranga lung ana dēng u na,
voi anthum tipuia rakuang alian anleta kei anchel ani na.
Sūn khat zān khat tipuiliana kei om ani na.
26 Ka lampui panna tina antakna chian kei tiar ani na.
Tidunga anchina,
misuam ngāi āta anchina,
ka nam ngāi kōm āta anchina,
Jentail ngāi kōm āta anchina,
khopui sūnga anchina,
ramzāng kāra anchina,
tipuiliana anchina,
unāi rothol ngāi āta anchina kei tēng kiar ani na.
27 Apōng le asōla sin arik athōna hanūk chu mit akhu chunga kei om,
von anchām le tī anrāla hanūk chu nēk sāk angoia kei om chachak,
hanūk chu adāi ansāka puansil abuia kei om chachak ani na.
28 Aloma hava ngāi dōra ka taksa varāla han,
nikhuan tina kuibing ngāi dōra ranga andonna hi ka malunga ka puak ani na.
29 Tu ei rāt nōka mo koi kei rāt nōk?
Hanūk chu tu dok ei chuainana mo koi ka malung ei anhāng nōk?
30 Anlianna kei thō rang ngēt aniten,
kei rāt nōkna ngāi ruia kēng kei anlianpui rang.
31 Puma Isua Krista Pathian le Pa,
tāituan tāituana anpāka om rase.
Ama len milak kei thō nōk chu ana riatpui ani na.
32 Damaska khopuia rēng Areta thuaia om ram oppu hān ansūrna ei na val sika Damaska mi ngāi khopui ei manrung ani na.
33 Tenchu tukver tiang āta kok sūnga khua rakul bang tiang āta thuaia ana masum u na.
Han tin han ama kut āta chu kei zōk
ani na.