Paulin anrālna ei man le
atak chunga raling khat
12
1 Kei anlianpui rang hi ka ranga anāng ani na.
Ka ranga ei nemna abui ām nisela Puma kōm āta anlangna tin
dōra le anrālna kei man ngāi dōra rui kei ril bang rang ani na.
2 Kristana a om mi khat ka riat,
ama chu kum sōmleimanli mān han vānram anthumna tenpei ei makhal ani na.
3 Tenchu hava mi chu taksana mo taksa nōka mo chu riat makunga,
Pathianin ariata.
4 Hava mi ha paradisa ama khala,
hava mi hān aril salui khop chong avariata,
miringin ei ril thei ranga anphal mak.
5 Hava ang miring ruia kēng kei anlianpui rang,
kei rāt nōkna ngāi rong nōk anten atei itē sika ka ninga anlianna thō nō ning.
6 Anlianpui rang zōt inlāng,
āmo ni pial nō ning.
Asik chu chongtak kēng kei ril rang ani na.
Tenchu tutēn kei thō le kei ril ngāi sika ansānga ei na be nōkna ranga kei bāng ani na.
7 Hava chong anlangna alian sabak sika han chongpāk kei ansalpui nōkna ranga ka taksana raling khat ana pēka,
borāi kei thō nōkna ranga koi ana zēm ranga soitān palāi khat ana pēka.
8 Hava ha ka kōm āta ei na khāi pena ranga Puma kōma voi anthum kei zong ani na.
9 Tenchu amān ka kōma:
“Ka lungkhamna hi nang na ranga ahun kēng.
Asik chu kei rātna hīn nei rātna nōkna ei na mantung pe ani na.”
Hasika han Krista rātna chu ka chunga ei om riam theina ranga,
kei rāt nōkna ngāi dōra lehin anlianpui ka ti.
10 Hasik tak han Krista sika kei rāt nōkna ngāi,
māimōkna ngāi,
abui antakna ngāi,
ansinsakna ngāi,
antakna ngāi dōrāna ka phūk adāi,
asik chu ka rāt nōk lāi hin kei rāt ani na.
Korinth mi ngāi rang
Paul amalungpōngna
11 Ka ninga borāi kei thō hin āmona kei anlō ani zei?
Tenchu hava ha nangni kēng anān chang u.
Nangni ngāi kēng koi anānlian rang na ni hale,
asik chu itē ka ni ngal nōkām,
hava kuitīr ulian anti ngāi bila alakte ngala anthuai makung.
12 Nangni na kōm u na kuitīr andangna aloma sinsiana ngāi,
tichang abui sinthōna ngāi,
boidongkhap sinthōna ngāi dōra dūkdiar chunga kei manlang ani na.
13 Hong ngala mo kuibing atei ngāi ranga nei duai tham u na?
Nangni na ranga puak arik kei chang duai nōk rong ni mak mo?
Hava kei dik nōkna chu na madual u ro.
14 En ro,
atun hin voi anthum changna na kōm u na ahong ranga kei ansin.
Nangni ngāi puak arik achang rang ni makung.
Nangni na neinun u ngāi ni mak ning kei ōl,
tenchu nangni ngāi aman ranga kēng kei na zōt u.
Asik chu,
nu pa ranga dōnglua antīng rang hi nāi ngāi ni mak,
tenchu nu pa ngāi kēng nāi ngāi ranga antīng rang.
15 Hasik han nangni na ranga kei nei dōra rāisān hiaia thām ka ti,
ka pumpui len ahek diaia anmang ka ti,
atam sabaka kei na dit u sika mo,
alakte nei na dit u rang?
16 Āni chu ni ta rase,
nangni ngāi puak arik chu chang makung.
Hanum nisela,
athei athiama mo ani zei ni mak mo zei,
kei na vala kei na man ani u zei.
17 Nangni ngāi kāra mi khat kei hong tīra hin kei na manthām mo ani u zei?
18 Na kōm u na atīr ranga Tita kei mathēm.
Ama bila koini na parual um ka hong manhong.
Tita hān ei na hong manthām u mo?
Koini anni hi malung munkhat achōia lampui khat āzī ni mak me mo?
19 Atun tenpei koinīn nangni ngāi kōma anthēmna chong nei la ril bang ati na mo nei la mandon chian u ala ni?
Kristana om mi anga Pathian matona koinīn chong nei ril ani na.
Kei madit ngāi,
alom peia nangni nei rāt thei u na ranga nei thō zit ani na.
20 Asik chu na kōm u na ka hong tikle kei na mu zōt u anga kei na mu nōk rang hanūk chu nangnīm nei na mu zōt u anga,
nei na mu u nōk rang hi kei chi ani na.
Ansualna hongtete ngāi mo,
khāmaret,
taksitna,
ansukna,
siat anrilna,
āchiar,
malung alian,
anbuaina ngāi a om thei ti hi kei anrīng ani na.
21 Na kōm u na ka hong rēt tika Pathianin na maton u na annuaia ei na siak rang ti hi ka ratha ei ta ani na.
Aphamān len āta āsia thōna ansīr lui ngāi hurna annim ngāi,
hurna ngalna adōn ngāi le hurna sa nōka ānnok tamtak ngāi ranga kei chap rang hi ka ratha ei ta ani na.