9
1 Asik chu mīnthiang ngāi ranga hiva dorbōndom rui hi na kōm u na kei maziak rang hi anāng ni mak.
2 Asik chu nei anphal u na ngāi ka lei riata.
Hatuka Makedonia rama mi ngāi kōma hiva ruia borāi kei vathō ani na:
“Ni kum khat āta Akaia rama mi ngāi chu apēk ranga ansin u zei,”
ati na.
Havan tin han asa lama na tepannēl u na lehan mi tamtak chunga sin aro kēng ani zei.
3 Hanum nisela hiva ruia nangni chunga na borāi thōna hi akorong chang ving ni ati na hiva parual ngāi hi kei hong tīr ani na,
hanūk rēt chu kei na ril u anga na lei ansin thei u na ranga.
4 Asik chu Makedonia rama mi ngāi ka bila ahong ni u sela hanūk chu nangni ngāi ha ansin luia na hong mu u sela,
hadōr peia na chung u na nei anngamna ha koini ranga mualphui ansakna kēng hale.
Nangni ni mak ansak ranga kei na zōt u.
5 Hasika han parual ngāi ha mān uala na kōm u na hong tīr ka tinga,
hatuka aphā māna chong antin zēta apēk ranga na lei ansin u ha ansūk chīta alei om theina ranga parual ngāi hi kei mathēm anāng kei ti.
Havan tin han anpām chunga pēk ni luia manar luia pēk chang inti.
Rāisān taka āpēk ngāi
6 Hiva hi na malunga retit
u ro:
Tukareng atōmtena ātu
ngāi chu atōmte dēna āt inti.
Hanūk chu tukareng ātampāna ātu ngāi chu ātampa dēna āt unti.
7 Mi angkhat angkhat amalunga ei masuk ang chipa pēk rase.
Tenchu nuam luluia le ther khakhaka ni mak.
Asik chu Pathianin malung rāisān hiaia apēkpu kēng ei madit.
8 Pathian chu ātam sabaka lungkham tin rēng ei na pēka ana vūr thei u ani na.
Asik chu nangnīn ruitin peia le kongtin peia alom peia sin āsaitn rēnga nei nāng u dōra le aliama nei om thei u na ranga.
9 Lekhabu ānthianga anziak anga:
“Ama chu aneinun ngāi asem
raka,
Anriang ngāi kōma apēka,
Ama dikna chu tāituan a om
kēng,”
(Sām 112:9 )
ati na.
10 Hankēng chu ātupu ranga chimu apēkpu le anēk ranga sāk azonpu Pathianin nangni na ranga chimu na pēk unti āmān na maphung tir unti.
Amān nei dik u na mara chu na mansōn tir unti.
11 Havan tin han kongtin le ruitina apēk thei nei ni u sika ānei nei chang u.
Havan tin han nangnīn nei pēk thei u na zāra koinīn Pathian kōma rāisānna chong nei mantung thei ani na.
12 Hiva pēkna lama hasōndom nei mantung u hi mīnthiang ngāi ei nāng duai ni mak nei zōn u,
tenchu nangni sika mīn Pathian kōma rāisānna tin rēnga aliama ei mantung ani na.
13 Hava haso nei dom u na lehan aruana nei anlang u hasika Krista thang ahui tianga na hē tel u na le na tepannēl u na ngāi le hanūk chu amāni le mi dōra ranga na lungpōng u na,
pēkna tianga nei anphal u sika mīn Pathian manpāk unti.
14 Na chung u na Pathian lungkhamna liam sika nangni ranga bōr zong untia nangni ngāi ana mu ranga phām unti.
15 Aril sua lui zāt Pathian lungkhamna sika ama kōma anpākna om rase.