Pēkna ruia malung anharna
8
1 Unāi ngāi,
Makedonia rama kuibing a om ngāi kāra Pathian alungkhamna ei pēk rui ha anān riat u ranga nei zōt.
2 Antakna kāra ansinna liantak atong u kārām arāisān u na ei liam hanūk chu ahek thaka anriang u kārām achālaka pēkna lama ei liam u ani na.
3 Asik chu amānīn ei mator u nēka,
amāni
ei nuam u ang taka ei pēk u
ti hi koiin kei riatpui u ani na.
4 Mīn thiang ngāi ranga hiva lungkhamna dorbōndoma anchela amāni ranga lungkham pēk neinun achōi ranga ei na mathēm sabak u ani na.
5 Hava ngal ha koinīn nei iam anga ni mak ei thō u,
tenchu Pathian zōt ang taka mānsana chu Puma kōma aninga anpēk bak u na hava suale koini na kōma anpēk u na.
6 Hava sik han,
Titan hiva lungkham pēkna dorbōndom sin hi māna alei phut ei ni sika nangni kōm dēna ankhip ranga ama hi nei mathēm ani na.
7 Nangnīn kongtin peia,
iamna lama,
chongril lama,
riatna lama,
asat lama tepanēlna kong tina hanūk chu koini sika na lungkham u na ei liam anga hiva lungkham pēkna sinām aliama om u ro.
8 Chongpēk anga kei na ril u ni mak,
tenchu mi tei ngāi lehan ankhī ranga nangni ngāi nei andit u na malung taktaka ei ni zia ansin ranga kei na zōt sika hiva chong kei ril ani na.
9 Asik chu nangnīn koini na Puma Isua Krista lungkhamna ha na riat u na.
Ama chu anchong ani ām nisela nangni ngāi sika anriang ei chang ani na,
asik chu ama ei anriangna zāra nangni ngāi anchonga nei om thei u na ranga.
10 Hiva ruia hiva hi nangni ngāi satna ranga koi ka malungvong chu kei na ril u.
Kum khat mān āta han apēka aphut mānsa duai la ni u mak che,
tenchu athō ranga azōt mānsām na ni u na.
11 Hasika han athō ranga zōtna nei dōn u anga nei mator thei u anga hava sin ha zui u ro.
12 Asik chu apēk zōtna pei a om ten,
ama ei buina lehan ni mak,
tenchu ei dōn tuk lehan apēk ten,
hava anpēk ha Pathianin alei pom ani na.
13 Tenchu mi tei ngāi ahui ahēka ei om a nangni rong antak abui puakrika nei om u rang kei ti na ni mak,
tenchu anrual chianga ei om theina ranga kei ril ani na.
14 Tenchu,
atun taka huna nangni ngāi nei dōnlup u lehan amāni ei ansam u nana zon u ro,
hatuka amāni ngāi ei dōnlup u lehan nangni nei ansam u nana na zon u rase.
Aloma ei anrual chiang theina ranga.
15 Lekhabu ānthianga anziak anga:
“Ātam ansuangin aliaka
anniangpui mak,
hanūk chu
atōm ansuangin um aliaka
ansampui mak,”
(Ant.16:18 )
ti ani na.
Korinth khuana Tita atīr
16 Nangni ranga asa lama tepannēlna kei dōn anga Tita amalungām asa lama tepannēlna apēkpu Pathian kōma rāisānna om rase.
17 Asik chu Titan koini nei mathēmna ronga asē ni mak tenchu ama asa lama atepannēl sabak sika aning bārchana na kōm u na asē ani na.
18 Ama bila hin hiva parual angkhat hi na hong tīra.
Ama hi thang ahui aril lampanga kuibing dōrān ei manpāka anthang khat ani na.
19 Hava rong ha la ni mak,
Puma anlianna rang le nangni ranga koini asa lama na tepannēlna anmu ranga hiva lungkhamna sin nei thō bila koini nūk ana zī ranga kuibing dōrān ei thang sua ani na.
20 Hiva nuam pēk neinun amang le asem lampanga tutēn āsia ei na ril thei nōkna ranga asa dima nei anrēng ani na.
21 Asik chu Puma mit mu duaia ni mak,
tenchu miring mitmunām sin āsa thō ranga malung nei pēk ani na.
22 Hanūk rēt chu amāni ngāi bila hin koini na parual angkhat rēt hi na hong tīra.
Ama hi voi hotuk mo lampui tamtaka nei mansina hin asa lama atepannēl ati na nei riat,
atun vāng chu nangni ngāi chunga ei anngam riam sika hin aliakte atepannēl ani na.
23 Hatuka Tita aruia chu,
ama hi ka lōm changpui le nangni ranga ka sin thōpui mi ani na.
Hanūk chu hiva parual ngāi ruia chu,
amāni hi kuibing ngāi ranga mi tīrtōn le Krista anlianna ranga mi ani u na.
24 Hasika han amāni tak chunga na lungkham mu u na le na rang u na chongpāk nei ansalna ngāi ha kuibing ngāi matona amāni kōma manriat u ro.