7
1 Hasik han kei madit ngāi,
hiva chongtin ngāi koinīn nei man sika hin taksa le ratha anānnim thei neinun ngāi dōra nāta annim luia om chip u rei.
Pathian anchi chunga anthiangna akip lehan anthianga om chip
u rei.
Paul arāisānna
2 Na malung u na mun na pe u ro.
Koinīn tutē chunga āsia nei thō om mak,
tutē chunga nei masiat om mak,
tutē chunga nei sisōm um om mak a.
3 Nangni ngāi āsia anlō ranga hiva chong nei ril ni mak,
asik chu apha māna han ka na lei ril u ani na,
koini malunga hin nangni ngāi nei na mandon chian ani na,
asik chu thī le thīn rual ring le ring anruala nei om theina ranga.
4 Nangni ngāi na chunga achān anngamna ka dōna,
nangni ngāi chunga achān anlianna ka dōna,
nangni ngāi chunga achān lungngamna ka dōna.
Koini ngāi alom peia antakna tin kārām nisela ka rāisānna aliama ei om ani na.
5 Asik chu Makedonia ram na hong tung suanām nisela hiva koini na pum hi pōngansa mak a.
Alom peia kil tina antakna nei tēng,
apang tianga ansual ankhalna,
asūng tianga rathatākna nei dōn ani na.
6 Hanum nisela annuaia om ngāi lungngamna apēkpu Pathianin,
Tita ei honga han lungngamna ana pēka.
7 Ama ei hong sika duai ni mak,
tenchu nangni na kāra ei honga lungngamna na lei pēk u lungngamna lehan koi um lungngamna ka dōn.
Asik chu amān na ningbui u na ngāi,
na malung chap u na ngāi hanūk chu ka ranga tep nei annēl u ngāi ana hong ril a,
havan ual han ātama ka rāi asāna.
8 Ka lekha mathuan lehan lungnana ka na pēk u nām atun chu ansīr lāi makung,
māna han kan sīr ām.
Asik hava ka lekha mathuan ha hun alakte ranga lungnana ei na pēk u kēng ti hi ka mu na.
9 Atun hin na malung u kei na manna u sika ni mak ka rāi ei sān,
tenchu hava lungnana hān malung ansīrna tianga ei na ruai u sik ani na.
Pathian derdīn anga lungnana nei man u ani na,
koini na sika nangni nei siat u nōkna ranga.
10 Pathian derdīn anga malung natna chu sandamna ranga malung ansīrna ei masuak ani na.
Hasika han malung ansīrna om lāi mak.
Tenchu maniapūr āta lungna asuak chu thīna kēng ei rasua.
11 Tenchu en u ta,
hiva Pathian derdīna lungna nāta ei masuak ngāi hi,
hotuk asa mo,
hotuk annuai zōtna mo,
hotuk thang thuaina mo,
hotuk lalchina mo,
hotuk ningōlna mo,
hotuk ratha thuan zōtna mo,
hotuk āsia thō ngāi andang zōtna mo,
hotuk ādik athō zōtna mo ei masuak ani na.
Hiva ngāi dōra ruia hin nangni chu āsia buia nei manlang u ani na.
12 Hasik han na kōm u na ka maziak ngalām,
asa nōkpu ranga ni mak,
hanūk chu asa nōk athōpu rang um ni mak kei maziak.
Tenchu nangnīn koini na chunga na tepannēl u ha Pathian matona ei anlang theina ranga kei maziak ani na.
13 Aloma hiva ngāi dōra sika lungngamna na dōn.
Hatuka hava koini na lungngamna nēka han Tita arāisānna nei mu hin aliaktena na rāi asāna.
Asik chu nangni ngāi na lom u sika hin ama amalung hi nei manhar u ani na.
14 Asik chu ama kōma kei na manpāk u sika hin nangnīn nānzakpui u mak chena.
Alom peia na kōm u na chong nei ril ngāi hi atak ei ni anga Tita ruia kei ril ngāi um adik ani ti anlanga.
15 Hatuka nangni ngāi na lom u na hē nei tel zia u le anchi le annōk chunga ama na lei pom u ha amandona nangni ngāi ei na dit u na hi ansōn riam kēng ani zei.
16 Alom peia hin nangni ngāi chunga ka nān ngampui thei u zei ati na ka rāi asān.