Anania le Saphira
5
1 Tenchu mi khat araming chu Anania ani na,
anungāk Saphira lehan aram azuar u na.
2 Hatuka anungāk um ariat uama hava amantuk āta ituk mo chu a ipa ei khāia kuitīr ngāi ke kunga ahong siaka.
3 Hatuka Peterin akōma:
“Anania,
ichang mo Ratha Ānthiang tak chunga milak athō ranga soitānin na malung ei manbit?
Asik chu na ram nei zuarna man ha asen chu nei ipa nei khāi ani na.
4 Na zuar mān āta na ta zēt ni mak mo?
Na zuar suanām na ningneina anga nei mang thei ni mak mo?
Hanle ichang mo havan tina malung nei vong?
Milak nei thō hi miring kōma ni mak,
tenchu Pathian kōma thō kēng na ni hile,”
ati na.
5 Hatuka Ananian hava chong ariat sua le anluai raka athi lena.
Tukareng hava rui ariat dōra chu achālaka arathāta u na.
6 Hatuka ruathar ngāi asuak u na Anania aruak chu azuala arazōn u na avaphūm u.
7 Hatuka dār anthum dām atheng suale anungāk chu rui tāng itē riat luia ahong alūta.
8 Hatuka Peterin alei rakela:
“Na manthei ta,
hiva tuk lehin mo ram chu nei zuar u?”
ati na.
Hatuka amān:
“O hanle,
hava tuk lehan ani,”
ati na.
9 Peterin akōma:
“Ichang mo Puma Ratha ansinna ranga chong khata nei anrual u?
Enta,
na ruathar avaphūm ngāi ake u so makot honga suak phing u zei.
Nang um atun na razōna na ruai unti,”
ati na.
10 Hatuka Peter amatona anraptena anluaia athi lena.
Ruathar ahong alūt u na ei thi ahong mu u na.
Hatuka arazōn u na aruathar kōl tak dēna avaphūm u na.
11 Hatuka chu kuibing aloma le hava rui ariat ngāi dōra chu achālaka arathāta u na.
Kuitīr ngāiin mi
tamtak amandam
12 Hantin han kuitīr ngāi chu Pathianin amanga mipui kāra sinsiana le tichang abui sin tamtak athō u na.
Hatuka aiam ngāi chu lokona malung mun khata Solomon tuamāia ankhōm babang u chachaka.
13 Hanum amāni chu mīn amanpāk sabak u nām nisela tutē amāni bila anchel ngam om u mak.
14 Tenchu aiam ngāi chu nupang le pasal tamtak Puma kōma ahong ansaptira.
15 Hasika han,
ana ngāi um nisela ahong razōn u lampuia ei siak u.
Zamun le munpha ngāi amanga ei manzāl u ani na,
asik chu Peter ei anlōinana aralīm luan chu achung u na ei del theina ranga ei manzāl u ani na.
16 Hantin han Jerusalem khopui kōl dāma kho ngāi āta mipui adam nōk le ratha annimin ei sinsak chachak ngāi ha ahong ruai u na.
Hatuka Pathianin alom u na alei mandama.
Kuitīr ngāi chunga ansinsakna
17 Hatuka chāizūng ulian le alōm u ngāi anding u na achālaka atak asi u na.
Hiva alōm u ngāi hi Sadduki pōla mi ani u na.
18 Hasika han kuitīr ngāi chu asūr u na mipui vāntāng ankhumna ina avakhum u na.
19 Tenchu zāna Puma vānpalāi khatin ankhumna suakkhār dōra ahong malonga ahong mazōk zita.
20 Vānpalāiin amāni kōma ati na:
“Sē u tānla,
Pathian biak ina vān dinga,
mi ngāi kōma hiva damna chong ngāi hi varil u ro,”
ati na.
21 Hankēng hava chong ariat u na,
khua vār rang tiang Pathian biak ina avalūt u na mi ngāi kōma chong avamanchū u na.
Hava lāi tak han chāizūng ulian le abila om ngāi chu ahong asuak u na,
hatuka amānīn ruiril ansānga ulian ngāi le Israel nama ruaitu ngāi dōra amankuia amanbūm zit u na.
Hatuka kuitīr ngāi avalāk ranga mi atīra aman sē u na.
22 Tenchu ankhumna in avasuak u le misūr ngāiin kuitīr ngāi chu vamu u lāi mak.
Hasika han misūr ngāi chu akīr rēt u na avamanthei u na.
23 “Ankhumna in ha adet sabaka ankhār ani na,
arung ngāi um chu suakkhār kōl taka anding chiana om na vamu na.
Tenchu suakkhār na malong le chu asūnga tutē vamu mak me,”
ati u na.
24 Hava chong ngāi ha chāizūng ulian le biak in arung ulian,
le atei chāizūng ulian ngāiin ariat u na,
hong zāt mo ei ni rang ani zei ati na andon sabak u na.
25 Hava lāi tak han pasal khat ahonga hiva thang hi ahong rila:
“En u ta,
ankhumna ina nei khum u ngāi ha Pathian biak in tuamāia andinga mi avamanchū rēt u zei,”
ahong ti na.
26 Hatuka biak in arung ulian le alōm atei misūr ngāi chu asē u na,
kuitīr ngāi chu ahong ruai u na.
Tenchu mipuin lung ei dēng u rang ei chi u sika han anrum rahei u mak.
27 Hatuka ahong ruai u na ruirilna ansāng matona amanding u na.
Hatuka chāizūng ulianin akōma arakela:
28 “Hiva mi araminga hin chong ril thak u lāi nō ta ni ati na chong ankhir sabaka nei na pēk kēng hale?
Hanum nisela en u ta,
Jerusalem khopui pumpui mi nei manchū u na asip zit zei hile.
Hanūk chu hiva miring thisen hi koini na chunga ansul ranga nei val u,”
ati na.
29 Hankēng Peter le atei kuitīr ngāiin amasanga:
“Miring chong nēk ten,
Pathian chong kēng atel ei nāng ual.
30 Nangnīn thingkunga nei makhāia nei that u Isua ha,
koini na chipui ngāi Pathianin ahong mathui rēta.
31 Ama ngēt hi Pathianin Rēng le Sandampu achang ranga achang tianga ei mansāng ani na.
Pathianin Israel ngāi malung ankhīrna apēka āsia andualna ei man thei u na ranga ei mansāng ani na.
32 Hiva ngāi dōra aloma ariatpui ngāi chu koini hi na ni zei.
Hanūk rēt chu Pathian hē tel ngāi kōma ei pēk Ratha Ānthiang um hiva ngāi ana riatpui kēng,”
ati na.
33 Hava chong ngāi ha ariat u na achālaka atak asi sabak u na athat ranga aval u na.
34 Tenchu hava lāi han ruirilna ansānga rui aril ngāi bila mi khat,
araming Gamaliel,
Pharisi ngāi bila mi andinga.
Ama hi dān ariatpu ani na hanūk chu mi tinin lalchi ei thō u ani na.
Amān hava kuitīr ngāi ha chomo khat bak tual panga ansuak ranga chong apēka.
35 Hatuka amān akōm u na:
“Nangni Israel mi ngāi,
hiva mi ngāi chunga athō ranga nei val u hi asadima mandon u ro.
36 Asik chu tian lāi um nisela Thuda hān mi lian khat ka ni ei anti ani na.
Ama bila miring raza manli dām ei kop ani na.
Tenchu ama mīn athata,
ama anūk azī ngāi dōram aloma anthek rak u na itē om mak.
37 Hatuka hava mi atheng suale,
raming anziak hun lāi han,
Galili rama mi khat Juda ati na ahong a om rēta.
Atianga mi tampa arakuaia,
tenchu ama chu athīna,
anūk azī ngāi dōram nisela anthek rak u na itē om rēt mak.
38 Hasika han atun hiva ruia kei na ti ani u zei,
hiva miring ngāi hi tōn u tānla mathān u ro.
Asik chu hiva ngāi mandon le asin thō u hi miring āta asuak aniten,
Pathianin manbāng bo ni.
39 Tenchu Pathian āta asuak aniten,
nangnīn manbāng thei u nō tani.
Hanūk chu Pathian le andui um na chang ving thei,”
ati na.
40 Hatuka achong ril chu loko azōta,
kuitīr ngāi avamankui u na amanzēm u.
Hanūk chu hava pang Isua raminga chong aril lāi nōkna ranga chong anriat chunga ama zōk u na.